တ္ရဲဏအ် သက္ကရာဇ်ဍုင် ကၠုင်စိုပ် ၁၃၈၈ သၞာံ၊ ဂိတုပသာ် (၂) မံက် မဒှ်တ္ရဲသၞာံတၟိမံက်ရောင်။ ပ္ဍဲကဵုသၞာံတၟိ စမံက်တ္ရဲကၠာအိုတ်ဏအ် ပရိသာတ် ညးမကဵုဇြဟတ် မင်ဗဵုက္လင်ဒၟံင် အစဳအဇန် ဌာန်ပရိုင်ဗၠးၜးမန်-IMNA ကီု သီုအလုံကောန်ဂကူမန်အိုဿီု သြဝ်ကဵုဂွံဒှ်တသိုက်စိုတ် တသိုက်ကာယအိုတ်ညိဂှ် နူကောန်ဂကောံရုင် IMNA ဂမၠိုင် ရာဒၞါမိက် ဗယာပ်ဏာမေတ္တာ ဗွဲကိုပ်ကၠာရ။
ပ္ဍဲကဵုသၞာံတၟိ မၞိဟ်တၟိ စိုတ်တၟိအလန်ဏအ်ဂှ် ရန်တၟအ်ကဵုပရိသာတ်ကောန်ဂကူမန် ညးမဒှ်မၞိဟ်တ္ရဲထပှ်ဂမၠိုင် သ္ဂောံတီ၊ သ္ဂောံဒှ်ဗဟုသုတ၊ သ္ဂောံမင်မွဲချိင်ဆတဴမာန် ဒုင်သ္ဇိုင်ကဵုတွံဗေဒင်ဟောရာ နူလိက်သကြႅာန် သွက်မၞိဟ်တ္ရဲထပှ် ပ္ဍွဲသၞာံ (၁၃၈၈) သၞာံဂမၠိုင်ဂှ်တုဲ နူကဵုဌာန်ပရိုင်ဗၠးၜးမန် – IMNA ကၠာဲပ္တိုန်ထ္ၜးလဝ် ဗွဲသရောပ်တအ်ဂှ် ဗှ်လ္ရတ်ကေတ်မာန်ရအဴ။
∆ ညးဒှ်မၞိဟ်တ္ၚဲအဒိုတ်
ပ္ဍဲသၞာံဏံ သ္ဂောံဒၟံင်ကြပ်ကြပ်မွဲစွံကဵု ကလောမသသ္ကံရဲ ကေုာံ ဂကောံမၞိဟ်ဂှ် တင်ဂါတ်ဂါတ်နွံတုဲ ညးမွဲဓဝ် ဒးမံင်တန်တဴဗွဲမလ္ရုလ္ရန်လေပ်ရ။ ညးသၟတ်တံ ဒှ်ကာလ မဒးညိင်ဝတ်တုဲ ကုညးဟွံထေက်ကြိုက်တံဂှ် ဒးဆဵုဂဗ ဂၠိုင်ကဵုဝါလေပ်ရောင်။ ပ္ဍဲကဵုကမၠောန်ကၟိတ်ဂှ် ဗက်တဴပၟိက်စိုတ်ညးမွဲသ္အာင် နဗီုပြင် ဍာ်ဝုန်အာ ဍာ်သွာကၠုင်မ္ဂး ဇၟာပ်ကၠောန်အံင်ဇၞးတုဲ လ္တူညးမနွံဂုန်တံ ဒးသ္ပသမ္တီဗွဲတၟေင်ထေက်ရ။ ပရေင်အိန်ထံင် မိပ်ဇြိပ်သာယာတုဲ ဒှ်ကာလ မ္ဒးသ္ပအဓိကကဵုအခိင် ကုကောန်ဇာတ်တံရ။ ကမၠောန်တၟိဂှ် ကၠောန်ဗွဲမဂံင်သ္ကာမ္ဂး ကလိဂွံဖဵုပရဲခိုဟ်လေပ်ရ။ စပ်ကဵုပရေင်ထတ်ယုက်မ္ဂး မပ္တံယဲကောန်ကၟံ၊ ယဲလတေင်ကြေပ် ကတဵုဒှ်လေပ်ရ။
ပၠေင်အန္တရာဲ ။ ။ ပ္ဍဲကဵုတ္ၚဲဇကုဒှ်မၞိဟ် အခိင်နူဂယး (၁၀း၄၅) နာဍဳဂှ် ကဵုဒါန် တၞာင်ဂၞု (၂) တၞာင် ပ္ဍဲသ္ၚိကျာ်တုဲ အရာမနွံပၟိက်ဂှ် ရာဒၞာညိ။ မဂၞန်ကဵုဖဵု – (၇၊ ၁၊ ၈)
∆ ညးဒှ်မၞိဟ်တ္ၚဲစန်
ပ္ဍဲသၞာံဏံ ဂွံဓမံက်ရုပ်ရဴ (ကမၠောန်တၟိ) ကမၠောန်ဆန္ဒဇကုနွံမံင် အခိင်ဗွဲမလအ်လဂှ် ဒးကၠောန်သ္ပရေင်တၠုင် နကဵုဂြိုဟ်ချဳချဳရ။ နကဵုသဘဴကမၠောန် ပ္တဝ်အာမံင်လ္ပာ်ခိုဟ်ကီုလေဝ် ဟိုတ်နူစိုတ်ဟွံဂၠိင်၊ ဒှ်ဘဲဇီုကပိုက်လောဲဂှ်ရ ဒးဆဵုဂဗကဵု အမှုအရာ ကေုာံ ညးဒစဵုဒစးတံလေပ်ရ။ နူကဵုသွံ ကွဳစက်၊ ကၠအ်၊ မၞိက်ရတ်ဂှ် ဂွံဖဵုပရဲရ။ ပ္ဍဲကဵုပရေင်ဆာန်ဂှ် မုက်မတ်လျးတၟးတုဲ ဟိုတ်နူပြံင်လှာဲဒၟံင် မွဲနှေံမွဲနှေံဂှ်ရ ဒှ်အခိင်ကာလ ဒးထိင်ပၟိက်ဆန္ဒ နကဵုသိက္ခာရ။ ပ္ဍဲကဵုပရေင်ပညာဂှ် ဍိုန်လျမံင်ညိညတုဲ အကြာတင်ဝါတ်ဂါတ်ဂှ် အံင်ဇၞးလေပ်ရ။ စပ်ကဵုပရေင်ထတ်ယုက်မ္ဂး ဒးဒုင်စသိုင် ယဲဝေဒနာ စၞာံဇကု၊ ကၟက်ဂြိုဟ်ရ။
ပၠေင်အန္တရာဲ ။ ။ ပ္ဍဲကဵုတ္ၚဲဇကုဒှ်မၞိဟ် အခိင်နူဂယး (၉း၃၆) နာဍဳဂှ် ဗဝ်သၟုတ် သတ်ကြေင်မၞိက် (သတ်ကြေင်ထဝ်) ပ္ဍဲသ္ၚိကျာ်တုဲ အတိုင်မနွံပၟိက်ဂှ် ရာဒၞာညိ။ မဂၞန်ကဵုဖဵု – (၀၊ ၃၊ ရ)
∆ ညးဒှ်မၞိဟ်တ္ၚဲအၚာ
ပ္ဍဲသၞာံဏံ အဓိက ညးဒစဵုဒစးဂၠိုင်ခ္ဍင် အံင်ဇၞးဂၠိုင်ခ္ဍင်ရ။ ဒၞာဲဒေသမစိုပ်ဂှ် ပြေပြံင်တုဲ ကလိဂွံအခေါင်တၟေင်လေပ်ရ။ ပ္ဍဲကဵုပရေင်ဆာန် ကေုာံ ပရေင်အိန်ထံင်ဂှ် ၜိုန်တန်ကြန်ကီုလေဝ် ပ္ဍဲကဵုပရေင်မၞိဟ်ဂှ် ယှုက်ထုဲထံင်လေပ်ရ။ ဆေင်စပ်ကဵု ပရေင်မိပ်ဇြိပ် ကေုာံ ညးဗြဴဂှ် ဒးဝေင်ပဲါထေက်ရ။ ဆေင်စပ်ကဵုစိုတ်မ္ဂး ဒးဆဵုဂဗလ္ပာ်ပရေံတုဲ ညံင်ဂွံညိင်ဝတ်တန်ကြန်ဂှ် ဒးဒ္ဂေတ်ဗက် လ္တူဓဝ်ဘာသာထေက်ရ။ ဆေင်စပ်ကဵု ဂၠေံသြန် ကေုာံ လုပ်ဂကောံ (ယှေဝ်ယာ) ဂမၠိုင်ဂှ် စွံသတိကၠောန်ညိ။ စပ်ကဵုပရေင်ထတ်ယုက်မ္ဂး ကတဵုဒှ် ယဲကအ်လီု၊ အာရီုမဆဵုညာတ်လေပ်ရ။
ပၠေင်အန္တရာဲ ။ ။ ပ္ဍဲကဵုတ္ၚဲဇကုဒှ်မၞိဟ် အခိင်နူဂယး (၈း၂၇) နာဍဳဂှ် ဗဝ်သၟုတ် ပုင်ထဝ်ဗာတ် ပ္ဍဲသ္ၚိကျာ်တုဲ အတိုင်မနွံပၟိက်ဂှ် ရာဒၞာညိ။ မဂၞန်ကဵုဖဵု – (၄၊ ၆၊ ၈)
∆ ညးဒှ်မၞိဟ်တ္ၚဲဗုဒ္ဓဝါ
ပ္ဍဲသၞာံဏံ မွဲကရောံကဵု ဇာနှိက်ဆက်စၠောံမၞိဟ်ခိုဟ်ကၠုင်ဂှ်မ္ဂး ပရေင်သွံဗၞိက် နူ ကၟိန်ဍုင်သၟာင် (ဍုင်တၞဟ်တၞဟ်) တံ ကလိဂွံဖဵုပရဲမာန်ရ။ ပ္ဍဲအရာပရေင်ပိုန်ဂှ် ဇိပ်ဂၠိပ်ချိုတ်ပၠိုတ်တုဲ လဆောဝ်မ္ဂး စိုတ်အိုတ်ကၠုင်ကဵု ကိစ္စပရေင်လောကဳလေပ်ရ။ ကောန်ဇာတ်တံဂှ် ပတှေ်ဖျေံစိုတ်ဂွံရ။ ထဝ်၊ သြန်၊ ကောန်ဂကောံသ္ၚိကၟိန်တံ တောတက်/ဂၠိုင်ကၠုင်လေပ်ရ။ အရာချပ်ဗ္စာရဏာညိင်ဝတ်ဂှ် ဒှ်အထံက်အရီုကဵု ပွဳဗွိုင်ဗွဲမဂၠိုင်ရ။ လ္တူသြဇာသဘဴကၠောန်ပလေဝ် မနွံလ္တူသ္ၚိကၟိန်ဂှ် မွဲလ္ပာ်တေံ ဒးဒုင်အုပ်ဓလီုမံင်ရောင် ထေင်ဗၠေတ်လေပ်ရ။ အခိင်ကာလဏံ ပရေင်ပညာ မစိုပ်ကၞောတ်ထောတ်ရောင်။ စပ်ကဵုပရေင်ထတ်ယုက်မ္ဂး ဒးဒုင်စသိုင် ယဲကသအ်ရ။
ပၠေင်အန္တရာဲ ။ ။ ပ္ဍဲကဵုတ္ၚဲဇကုဒှ်မၞိဟ် အခိင်နူဂယး (၁၀း၂၇) နာဍဳဂှ် ကဵုဒါန် (အာလူးဆနွင်းမကင်း) ပ္ဍဲသ္ၚိကျာ်တုဲ အတိုင်မနွံပၟိက်ဂှ် ရာဒၞာညိ။ မဂၞန်ကဵုဖဵု – (၂၊ ၈၊ ၉)
∆ ညးဒှ်မၞိဟ်တ္ၚဲရာဟု
ပ္ဍဲသၞာံဏံ နကဵုမိဿဟာဲခိုဟ်တံ ဘိုင်ရေင်တၠုင်တုဲ ပ္ဍဲကဵုပွဳဗွိုင်တၟိဂှ် အကာဲအရာ ကမၠောန်ကၟိတ်ခိုဟ်နွံရ။ ဟိုတ်နူစိုတ်ဒုင်ဟွံမာန် မကတဵုဒှ်ကၠုင် မွဲဒမြိပ်အကာဲအရာဂှ်ရ သကဵုဒှ်ဒိုက်စိုတ်မာန်ရ။ သွက်ကောန်ဇာတ်တံဂှ် သြန်အိုတ်ဂၠိုင်လေပ်ရ။ ပ္ဍဲကေင်ကာကဵုဒါန်ဂှ်လေဝ် သြန်လ္တူနူကဵုသဒ္ဒါစေတနာဂှ် ဂွံကဵုဒါန်လေပ်ရ။ ညးသၟတ်တံ ပရေင်ဆာန်ကုသဵုခိုဟ်တုဲ သွက်ညးတၠအိန်ထံင်တံ ဒးဗှ်သၞာ နူမစိုပ်ဌာန်သ္ၚောဲလေပ်ရ။ ပ္ဍဲပရေင်ပညာဂှ် ကေက်သ္ကာတုဲ ညးဂမၠိုင်ရှ်ေသှ်ေရ။
ပၠေင်အန္တရာဲ ။ ။ ပ္ဍဲကဵုတ္ၚဲဇကုဒှ်မၞိဟ် အခိင်နူဂယး (၉း၅၄) နာဍဳဂှ် ဗဝ်သၟုတ် အဳကျာကွေ ၜဲ (ပဲအီကြာကွေး) ပ္ဍဲသ္ၚိကျာ်တုဲ အတိုင်မနွံပၟိက်ဂှ် ရာဒၞာညိ။ မဂၞန်ကဵုဖဵု – (၃၊ ၆၊ ၀)
∆ ညးဒှ်မၞိဟ်တ္ၚဲဗြဴဗ္တိ
ပ္ဍဲသၞာံဏံ ကာလကၠောန်ကမၠောန်မ္ဂး ကမၠောန်ဗၠေတ်ကဵုသၞောဝ်ဂမၠိုင်ဂှ် ဒးဝေင်ပဲါထေက်ရ။ ဒဒိုက်စိုတ်ဂၠိုင်တုဲ ကၠောန်သ္ပဏာ နကဵုက္ဍိုပ်ကြံင်ကြံင်နွံဂှ်ရ စိုတ်ဂွံညိင်ဝတ်ဂှ် ဒးထိင်လေပ်ရ။ အောန်အိုတ် ကမၠောန် (၂) ဂကူ ဒးကၠောန်လေပ်ရ။ သ္ၚိကၟိန် ကေုာံ မသကလောကောဒေံတံ ဒးဆဵုဂဗမံင် တင်ဝါတ်ဂါတ်ဂှ် ဒှ်အခိင်ကာလ ဒးယိုက်ဂၠေင်ရေင်တၠုင်ရ။ ပ္ဍဲပရေင်ပညာဂှ် စွံစိုတ်ခိုင်ဗိုန်ဟေင် ကလိဂွံပရေင်အံင်ဇၞးမာန်ရ။ စပ်ကဵုပရေင်ထတ်ယုက်မ္ဂး ဒးဒုင်စသိုင် ယဲဆေင်စပ်ကဵု လတေင်အရီု၊ က္ဍိုပ်အရုတ်၊ ဂရေန်ဂျဳနာလေပ်ရ။ ပ္ဍဲပရေင်ဆာန်ဝွံ မွဲကရောံကဵုမံင်မွဲစွံဟွံညဳသၟဟ် (မံင်ဟွံဒးညးသ္ကံ) ဂှ် ဒးသာဲခြာဒၟံင် မွဲနှေံနှေံနွံရ။
ပၠေင်အန္တရာဲ ။ ။ ပ္ဍဲကဵုတ္ၚဲဇကုဒှ်မၞိဟ် အခိင်နူဂယး (၈း၅၄) နာဍဳဂှ် ဗဝ်သၟုတ် ကွာင်ခၞံ ပ္ဍဲသ္ၚိကျာ်တုဲ အရာမနွံပၟိက်ဂှ် ရာဒၞာညိ။ မဂၞန်ကဵုဖဵု – (၇၊ ၄၊ ၁)
∆ ညးဒှ်မၞိဟ်တ္ၚဲသိုက်
ပ္ဍဲသၞာံဏံ ဒှ်ညးက္ဍိုက်က္ဍိုပ် ဗွိုင်ကမၠောန်၊ သ္ၚိကၟိန်ကီု သီုဒှ်ညးဖ္ဍိုက်ဗပေင်ကဵု တင်မနွံပၟိက်နာနာကီုတုဲ သၞာဲဒဴမ္ဂး စဵုကဵုအဆံင်တာလျိုင်သၠုင်သၠုင် ကလိဂွံမာန်ရ။ ဖအောန်မာန၊ ဒ္ဂေတ်ဗက်ဝတ် ဗွဲမညဳသၟဟ်ကဵု ညးဂမၠိုင်မ္ဂး သာတုဲကလိဂွံဂုန်ဖဵု သွက်ဇကုရ။ အဃောအာတရဴဂှ် ဟွံထေင်လဝ်မွဲသာ် သြန်လုပ်ရ။ နူကဵုကမၠောန်ရေင်တၠုင် ကေုာံ အာတရဴ မတၞဟ်ခြာကဵုညးဂမၠိုင်ဂှ် သြန်လုပ်ခိုဟ်ရ။ ပရေင်အိန်ထံင် မိပ်ဇြိပ်သာယာတုဲ ကလိဂွံကောန်ရတ်လေပ်ရ။ စပ်ကဵုပရေင်ထတ်ယုက်မ္ဂး ဒှ်ယဲထိုင်စၞလေပ်ရ။ ပ္ဍဲပရေင်မၞိဟ် ကေုာံ ပ္ဍဲအရာကမၠောန် သဘဴပလေဝ်လ္ပာ်ခိုဟ်တံ ပါလုပ်ရီုဗင်ကီုလေဝ် ဒးဒုင်ထေင်ဗၠေတ်ရ။
ပၠေင်အန္တရာဲ ။ ။ ပ္ဍဲကဵုတ္ၚဲဇကုဒှ်မၞိဟ် အခိင်နူဂယး (၁၀း၃၆) နာဍဳဂှ် ဗဝ်သၟုတ် ကွာင်သတ်တာ ပ္ဍဲသ္ၚိကျာ်တုဲ အရာမနွံပၟိက်ဂှ် ရာဒၞာညိ။ မဂၞန်ကဵုဖဵု – (၂၊ ၃၊ ၈)
∆ ညးဒှ်မၞိဟ်တ္ၚဲသ္ၚိသဝ်
ပ္ဍဲသၞာံဏံ သွက်ပရေင်အံင်ဇၞးဇကုဂှ် ဒးဝေင်ပဲါနူ ပွမသ္ပဒၞန်ကုညးတၞဟ်၊ စကာညးတၞဟ်တုဲ နကဵုပရေင်ကူချပ်ခိုဟ်ခိုဟ် မကၠးဖ္ဍးတံဂှ် ကလိဂွံပရေင်အံင်ဇၞးလေပ်ရ။ ကုညးကမၠောန်တုပ်၊ အဆံင်တာလျိုင်တုပ်တံဂှ် ဟွံကၠောန်သ္ပဒစဵုဒစးမွဲသာ် ပံင်တောဲမွဲစွံမာန်ဟေင် သာတုဲဒှ်ဖဵုရ။ ညးဂကူသၟာင်တံ ကဵုရီုဗင်ထံက်ပင်လေပ်ရ။ ပ္ဍဲကဵုဒၞာဲဒမၠုက် ခန္ဓကာယဇကုဂှ် ကတဵုဒှ်ယဲသရလေပ်ရ။ ညးသၟတ်တံ ပရေင်ဆာန်ကွိုန်ခိုဟ်တုဲ ပ္ဍဲပရေင်အိန်ထံင်ဂှ် ဟိုတ်နူပရေင်မၞိဟ် လုပ်ယှုက်ပထုဲဂှ်ရ ဒှ်ဒဒိုက်စိုတ်ရ။ နူကဵုသွံရာန် ဍာ်တှ်၊ ကပေါတ်တိတ်နူဍာ်တှ်ဂှ် ကလိဂွံဖဵုပရဲမာန်ရ။
ပၠေင်အန္တရာဲ ။ ။ ပ္ဍဲကဵုတ္ၚဲဇကုဒှ်မၞိဟ် အခိင်နူဂယး (၁၁း၃၆) နာဍဳဂှ် ဗဝ်သၟုတ် ကွာင်ဧလ (ဧလမုန့်) ပ္ဍဲသ္ၚိကျာ်တုဲ အရာမနွံပၟိက်ဂှ် ရာဒၞာညိ။ မဂၞန်ကဵုဖဵု – (၁၊ ၅၊ ရ)
