ဗွဲကြဴနူကဵု နာဲဟလာ နူကွာန်ဘာဒေါဝ် ပွိုၚ်ဍုၚ်မုဟ်ဍုၚ် ဒးဒုၚ်ပန်ဂစိုတ်တုဲဂှ် ဩန်ညးကွာန်ပအပ်သၠာဲဂတးလဝ် ကိုတ် (၄) လက်ပြၚ် ဒှ်ခက်ခုဲထုဲထံၚ်အာနွံရောၚ် မသကောဒေံ ပအပ်လဝ်ဩန်ကိုဋ် (၄၀၀) လ္ပာ်လတူမွဲတၠ ဟီုထ္ၜးရ။
သ္ၚိကၟိန် နာဲဟလာ ပ္ဍဲကွာန်ဘာဒေါဝ်ဂှ် ဒှ်သ္ၚိဖျာကပေါတ်နာနာကီု၊ သီုကဵုကၠောန်ဒၟံၚ် ပရေၚ်သၠာဲဂတးဩန်ဇၞော်ဇၞော်မွဲကီုတုဲ ဗွဲကြဴနူကဵု နာဲဟလာ ဒးဒုၚ်ပန်ဂစိုတ်တုဲဂှ် အလုံမွဲသ္ၚိကၟိန် နာဲဟလာ ဒးဂြိပ်ပါဲဒဴဒၟံၚ်နွံတုဲ ဩန်ညးကွာန် ပအပ်ဖျေံစလဝ်တအ်ဂှ် တၠဩန်တအ် ဒှ်မံၚ်ဒဒိုက်သၞာအိုတ်ရောၚ် သ္ဂးရ။
“သ္ဇက်ဟီုဟွံမွဲရ ရဲတၠဩန် ပအပ်ကဵုလဝ် နာဲဟလာ မွဲသ္ကအ် ဒှ်မံၚ်ယဲ သ္ဇက်ဟီုဟွံမွဲရ၊ လ္ၚဵုဂှ် စဟွံဂွံ တိက်ဟွံဂွံ မံၚ်ဟွံဂွံတုဲ ဒးစမံၚ်ဂဥုဲထိၚ်စိုတ်လေဝ်နွံ၊ ၜိုတ်အဲတီ ဗွဲအပြောံတှေ် ပ္ဍဲအရာပ် သ္ၚိနာဲဟလာ သၟးဂှ် ကိုဋ်ၜိုတ် (၂) လက်ပြၚ်၊ နူကဵုကွာန်တံၚ်ပိုအ်ဂှ် ကိုဋ် (၁) လက်ပြၚ် သှေ်နူဂှ် နူကဵုကၠအ်သတ် ကၟာဝက် အတေံ အဏံဂှ် ကိုဋ်ၜိုတ် (၁) လက်ပၠန် ပိုဲတော်ကေတ်တှေ် ကိုဋ်ၜိုတ် (၄) လက်ပြၚ်ဒှ်မံၚ်၊ လၟုဟ်တှေ် ဒှ်ထုဲထံၚ်သ္ဇက်ဟီုဟွံမွဲရ” သာ်ဝွံ မသကောဒေံ မၞိဟ်ပအပ်လဝ်ဩန်မွဲတၠဂှ် ဟီုထ္ၜးရ။
ဩန်ညးကွာန်တအ် (၁၀၀) မ္ဂး နကဵုအိက်ဩန် (၂) ဒ္ကေဝ်ဂှ် ညးကွာန်ဒေသ ဗွိုၚ်ကွာန်ဘာဒေါဝ်ဂမၠိုၚ်တအ် နကဵုဓဝ်ကၠိုဟ်ခၠၚ်ညးမွဲကဵုညးမွဲတုဲ ကဵုကေတ်လဝ်ညးသ္ကအ် နကဵုအခိုက်ကွာန်ရ။
ဆက်တုဲ “သၠဲပြၚ်နူဍုၚ်သေံကီု၊ ဩန်သွံလဝ်ကၠအ် သွံလဝ်ဝါဂှ်တှေ် ညးကွာန်တအ် ဟွံအာအပ်စွံပ္ဍဲဗေန်ပုဟ်၊ ပတှေ်မံၚ် သ္ၚိ နာဲဟလာ ဂှ်ဖအိုတ်ရ၊ ကမၠောန်ဖျေံစဩန်ဗီုဏံဂှ် အခိုက်ကွာန်ဗီုဏံဂှ် နွံမံၚ်ရရတှေ် ပ္ဍဲသ္ၚိနာဲဟလာ ဂှ် ဒှ်မံၚ် ညံၚ်ကဵုဗေန်ကွာန်မွဲကီု၊ ဒးပၠုပ်ဩန်တှေ် စွံဏောၚ်၊ ဒးပတိတ်တှေ် ပတိတ်ဏောၚ်၊ ဒှ်မံၚ်ဗီုဗေန်ကွာန်မွဲကီု၊ ဠ ဒှ်အာဗီုဏံဂှ်မှ ဟွံတော်လဝ်မွဲသာ် ဒှ်အာတှေ် ဒှ်မံၚ်ယဲညာန်” သာ်ဝွံ ညးဆက်ဟီုရ။
ပ္ဍဲကဵုသ္ၚိဆေၚ်ဖျာ နာဲဟလာ ဂှ် ညးကွာန်တအ်ကၠုၚ်ပအပ်စွံဩန် ဖျေံစကီု၊ နူဂှ်မွဲအဆံၚ် တၠကမၠောန် ဒေၚ်ချေဝ်တအ်ကီု၊ တၠကမၠောန်ဒးကေတ်ဩန်တအ်ကီု ကၠောန်မံၚ်ကမၠောန် ပၠုပ်ဩန် ပတိတ်ဩန် သၠာဲဂတးဒၟံၚ် သၞာံဗွဲမလအ်ရ။
ဗွဲကြဴနူကဵု ဂကောံရပ်လွဟ်တအ် ပန်ဂစိုတ်ထောံ နာဲဟလာ တုဲ ဂကောံသ္ၚိကၟိန် နာဲဟလာ၊ သမ္ဘာ၊ ကောန်ဇာတ်တအ်လေဝ် ဒးဂြိပ်ပါဲဒၟံၚ်တုဲ တၠဩန်ပအပ်စွံလဝ် ဂၠိုၚ်ကဵု လက်ကိုဋ်တအ် ဒှ်ခက်ခုဲထုဲထံၚ်မံၚ်အိုတ်ရောၚ် ဂွံတီကေတ်ရ။
