သၞာဲဒဴပရေၚ်အုပ်ဓုပ်ခရိုၚ်ရေဝ် ဒးဒုၚ်ရပ်လဝ် ပ္ဍဲသ္ကုတ်ဂၠံၚ်အကြာရေဝ် ကေုာံ ဇြပ်ဗု၊ တွဵုရးဍုၚ်မန်ဂှ် ဟွံက္လေၚ်ဗၠးကၠုၚ်ဏီရောၚ် ဂွံတီကေတ် နူညးစုက်လုက်ကဵု ဂကောံသ္ၚိကၟိန်တံရ။

တခဳဌာနပါ် နူပရေၚ်အုပ်ဓုပ်ခရိုၚ်ရေဝ် ဒဝ်တေန်တေန်ဝေန်၊ တခဳအဆံၚ်ဍောတ် နူပရေၚ်အုပ်ဓုပ်ပွိုၚ်ဍုၚ်ရေဝ် ဒဝ်နိုဲနိုဲမာ၊ ဥူယှေန်တကိုဝ်ကိုဝ် နူဌာနက္ဍိုက်က္ဍိုပ်ဖန်ဇန် ကောပ်ကာဲ ဆေၚ်ကဵုဘဲအန္တရာဲပွိုၚ်ဍုၚ်ရေဝ် သီုညးပိတၠတံဂှ် ဂကောံရပ်လွဟ်မွဲဂကောံ ရပ်ဏာလဝ် ပ္ဍဲဗဒဲါကွာန်ကၠအ်လိမဴ၊ ပွိုၚ်ဍုၚ်ရေဝ်၊ သ္ကုတ်ဂၠံၚ်ရေဝ်-ဇြပ်ဗု၊ ပ္ဍဲဂိတုအေဗရဴ (၁၇) တုဲကၠုၚ်ဏံရ။

သၞာဲဒဴ ဂကောံရပ်လွဟ်တံ ရပ်ဏာလဝ်ဂှ် စဵုကဵုတ္ၚဲဏံ ဟွံက္လေၚ်ဗၠးကၠုၚ်ဏီ ဂးရ။

“ဥူယှေန်တကိုဝ်ကိုဝ်ဂှ်တှေ် တ္ၚဲညးဒးဒုၚ်ရပ်ဂှ် ဂွံအဆက်ကဵုသ္ၚိကၟိန်ဏီရ။ ဗွဲကြဴဂှ်တှေ် မုအဆက်လေဝ်ဟွံဂွံရပုဟ်” သာ်ဝွံ ညးစုက်လုက်ကဵု ဂကောံသ္ၚိကၟိန်ဂှ်မွဲတၠ ဟီုရ။

သၞာဲဒဴဂမၠိုၚ်တံဂှ် ဂကောံဒမၠုက်ရေဝ် (YGF) ရပ်ဏာလဝ်ရောၚ် ပရိုၚ်မံက်တိတ်ဒၟံၚ်တုဲ ဆေၚ်စပ်ကဵုပရူဂှ်တုဲ သွက်ဂွံတီချိုတ်ချိုတ်ပၠိုတ်ပၠိုတ်ဂှ် ကေတ်အဆက်သၟာန်သၟုက် ဂကောံဒမၠုက်ရေဝ်ကီုလေဝ် ဟွံက္လေၚ်ပရိုၚ်မွဲသာ်ဏီရ။

တုပ်သာ်ဝွံကီု ပ္ဍဲဂိတုအေဗရဴ (၂၄) တုဲကၠုၚ်တေံလေဝ် ညးလျိုၚ်ဍုၚ် ဥူကျဝ်တူ ဌာနက္ဍိုက်က္ဍိုပ်ပရေၚ်တဵုလွဳဍုၚ်ခေါဇာဂှ် ဂကောံရပ်လွဟ်မွဲဂကောံ ရပ်ဏာလဝ် ပ္ဍဲဗဒဲါပါၚ်ဂၠံၚ်ကွာန်သၞေဟ်ခြေၚ်၊ သ္ကုတ်ဂၠံၚ်ဇြပ်ဗု-ရေဝ်ဂှ်တုဲ ဂိတုအေဗရဴ (၂၇) ဂှ် က္လေၚ်ဗၠးဏာလဝ်ရောၚ် ဂွံတီကေတ်ရ။