အပ္ဍဲအကြာပဋိပက္ခကၟိန်ဍုၚ်ဗၟာဏံဝွံ ကောန်ၚာ်အဝဲမံၚ်ဘာဂမၠိုၚ် သွက်သ္ဂောံဂွံအခေါၚ်ဗ္တောန်ပညာဂှ် ခက်ခုဲမံၚ်ဖိုဟ်တုဲ ပ္ဍဲသၞာံဗ္တောန်ပညာဏံ ဟိုတ်နူပရူပရာနာနာတုဲ ကောန်ၚာ် (၆ ဒသမ ၃) ပြကောတိကိုဋ်ပြၚ် ဆောံလေၚ်ဒၟံၚ်အခေါၚ်ဗ္တောန်ပညာရောၚ် ဂကောံလ္ၚတ်မူဝါဒ ကေုာံ မဟာဗျူဟာဗၟာ ISP Myanmar လလောၚ်ပ္တိတ်လဝ် ပ္ဍဲဂိတုဂျောန် (၂၃) နူတနေံဏံရ။
ပ္ဍဲသၞာံဗ္တောန်ပညာလၟုဟ်ဏံဝွံ နကဵုအလုံမွဲကၟိန်ဍုၚ်ဂှ် လၟိဟ်ညးပအပ်ဘာ (၆ ဒသမ ရ) ပြကောတိကိုဋ်နွံရောၚ် ဌာနဝန်ဇၞော်ပရေၚ်ပညာကမ္မယှေန်ပၞာန် ဂးရ။
အတိုၚ်စရၚ်လၟိဟ်မၞိဟ် သၞာံ (၂၀၁၉) ကဵု (၂၀၂၄) ဂှ်မ္ဂး ကောန်ၚာ်အဝဲမံၚ်ဘာ နွံအကြာ (၁၃) ပြကောတိကိုဋ်ဂှ်ရ ယဝ်ပတောံၜတ်ကဵုလၟိဟ်ဂှ်မ္ဂး ကောန်ၚာ်ဆောံလေၚ် အခေါၚ်ဗ္တောန်ပညာ (၆ ဒသမ ၃) ပြကောတိကိုဋ်ပြၚ်ရောၚ် ထံက်ထ္ၜးလဝ်ရ။
လၟိဟ်ပမာဏဂှ်ဝွံ ဒှ်သွက်သၞာံဗ္တောန်ပညာ (၂၀၂၆ – ၂၀၂၇) မွဲဟေၚ်တုဲ သီအဝဵုတုဲ အပ္ဍဲကာလ (၅) သၞာံဂှ် လၟိဟ်ညးဆောံလေၚ် အခေါၚ်ဗ္တောန်ပညာသဇိုၚ် ဂၠိုၚ်နူလၟိဟ်ဏံမာန်ရောၚ် ဂးရ။
ပရေၚ်ပညာဗၟာဝွံ သွက်သ္ဂောံက္လေၚ်ဒှ် ဗီုကာလကၠာဟွံသီအဝဵုဂှ် ဝါတ်ဂါတ်တုဲ ဟိုတ်နူအကာဲအရာ ပရေၚ်စသုၚ်မံၚ်စံၚ်ကဵု ပရေၚ်ဂီုကၠီုဂှ်ရ ညးဒဴတိတ်နူဌာန်၊ ကောန်ၚာ်တိတ်အာကၠောန်ကမၠောန်ပ္ဍဲဍုၚ်မ္ၚး ဂၠိုၚ်မံၚ်ရောၚ်ဂှ်လေဝ် အ္စာဘာ နူဌာနပရေၚ်ပညာကောန်ဂကူမန်မွဲတၠ ဟီုကဵုဌာန်ပရိုၚ်ဗၠးၜးမန် IMNA ရ။
“ဂွံဒှ်ဗီုကၠာတေံဂှ် ခက်မံၚ်။ ဘာကောန်ဂကူမန်ပိုဲဟီုတှေ်လေဝ် ကောန်ၚာ်အဝဲတန်ဒေါဝ်တံ တိတ်ဘာ၊ ဟွံမံၚ်ရဂှ် ဂၠိုၚ်မံၚ်။ ဗွဲတၟေၚ်တှေ် အခိၚ်ဍုၚ်သေံကၠောန်ၝာတ်ဂှ် မိမတံ ကော်ပ္တိတ်ဏာရ” သာ်ဝွံ ညးဟီုရ။
နူဂကောံနာနာ မပါလုပ်ဒၟံၚ် အပ္ဍဲပဋိပက္ခတံဝွံ သွက်ပရေၚ်ပညာထ္ပက်အဇာဂှ် ဂိုတ်ဂ္စာန်ဒၟံၚ်နဲဇဳကီုလေဝ် ဟိုတ်နူတၚ်နွံပၟိက်စမြိုၚ်၊ အကာဲအရာပရေၚ်ပၞာန်တုဲ ဒှ်မံၚ်တၚ်ဝါတ်ဂါတ်ဖိုဟ်ရောၚ် ဓမံက်ထ္ၜးလဝ် ပ္ဍဲလိက်စၟတ်သမ္တီ လလောၚ်ပ္တိတ်လဝ်ရ။
အတိုၚ်တၚ်နၚ်အလဵုအသဳညဳသၟဟ်ဂကူ အေန်ယူဂျဳ မ္ဂး အပ္ဍဲသၞာံဗ္တောန်ပညာ (၂၀၂၃ – ၂၀၂၄) တေံ ပ္ဍဲဘာဗလးတိဂှ် ဗ္တောန်ကဵုလဝ်ပညာ ကွးဘာ (၇၂၇၈၆၀) တၠ ဂးလဝ်ကီုလေဝ် အကာဲအရာ သၞာံ (၂၀၂၆ – ၂၀၂၇) ဏံဂှ် ဟွံဂွံတီကေတ်ဏီရ။
နူကံၚ်ဇြဳပရေၚ်ပညာရးတအာၚ် (Ta’ang Land Education Council – TLEC) ဂှ်လေဝ် အပ္ဍဲသၞာံဗ္တောန်ပညာ သၞာံ (၂၀၂၄ – ၂၀၂၅) ဂှ် ကွးဘာ ဗဒဲါ (၇၀၀၀၀) တၠ ဗ္တောန်ကဵုလဝ်ပညာတုဲ အပ္ဍဲသၞာံဗ္တောန်ပညာလၟုဟ်ဏံဝွံ ဟိုတ်နူအကာဲအရာပရေၚ်ပၞာန်တုဲ ဘာဗ္တောန်လိက် အကြာ (၂၀၀) ဒးတၟာတ်လဝ်ကီု၊ ပရေၚ်ပအပ်ဘာလေဝ် အောန်စှေ်ကၠုၚ်ကီု ဂးရ။
ကမ္မတဳပရေၚ်ပညာကောန်ဂကူမန် (MNEC) ဝွံ သၞာံဗ္တောန်ပညာ (၂၀၂၅ – ၂၀၂၆) တုဲကၠုၚ်ဏံ နူကဵုဘာဗ္တောန်လိက် (၁၄၆) ဘာဂှ် အ္စာ/အ္စာၝောံ (၈၀၀) ပြၚ်နွံတုဲ ဗွဲကြဴနူယဲကိုဝ်ဝေဒ်တုဲဂှ် လၟိဟ်ကွးဘာ ဟွံချိုတ်ပၠိုတ် (ဟွံတန်ကြန်) ရဂှ်လေဝ် ညးတာလျိုၚ် (MNEC) တံ ဟီုရ။
မွဲလ္ပာ်ဂှ်လေဝ် က္ဍိုပ်သ္ကိုပ်ပၞာန်တြေံ ဥူမေန်အံၚ်လှာၚ်ဝွံ သွက်ဗာတ်ဂျိတ် (၂၀၂၆ – ၂၀၂၇) ပရေၚ်ပညာဂှ် သၠုၚ်ပ္တိုန်ကဵုရောၚ်ဂးကီုလေဝ် ကောန်ၚာ်အဝဲမံၚ်ဘာဂမၠိုၚ် ဒးဆောံလေၚ်ဒၟံၚ် အခေါၚ်ဗ္တောန်ပညာဖိုဟ်ရ။
က္ဍိုပ်သ္ကိုပ်ပၞာန်တြေံ စကာဗာတ်ဂျိတ် သွက်သၞာံဗ္တောန်ပညာလၟုဟ်ဏံဝွံ ဟွံက္လေၚ်စိုပ် လၟိဟ်ပမာဏ (၈ ဒသမ ၀၇) က္ဍိုပ်ကၠံ စကာလဝ် အပ္ဍဲသၞာံ (၂၀၂၀ – ၂၀၂၁) တေံဏီရောၚ် ISP Myanmar ထံက်ထ္ၜးလဝ်ရ။