ဂလာန်ပ္တိုန်ထ္ၜးတၟာတ်ဒၞာ ဝိုၚ်ဝေၚ်လံၚ်သြန် အပ္ဍဲတွဵုရးဂှ် ကၠတ်ထဝ်တွဵုရးဍုၚ်မန် သ္ပဏာဒတန်ကီုလေဝ် ပ္ဍဲကဵုဗလးတိဇေတ်ဇေတ်ဂှ်မ္ဂး ကိစ္စပြဒ္ဒညာဝိုၚ်ဝေၚ်လံၚ်သြန်ဏံ ရပ်စပ်ဗွဲမစိုပ်တရဴမာန်ဟာဟီုဂှ် အကြာညးဍုၚ်ကွာန်တံ ဟီုဂးပါ်ပဲါဒၟံၚ်အိုတ်ရ။
ပ္ဍဲမတ်မလီု၊ ကျာ်မြဟ်၊ ပံၚ်၊ မုဟ်ဍုၚ်၊ သဓီု၊ တၟအ်ခၟိုၚ်ကီု သီုပွိုၚ်ဍုၚ်ဗွဲမဂၠိုၚ် မၞုံအပ္ဍဲတွဵုရးဍုၚ်မန်ဂှ် ပံက်လဝ်ဝိုၚ်ဝေၚ်လံၚ်သြန် သၞာံလအ်လတုဲ ဟိုတ်နူပြဒ္ဒညာအဆက်ဖဵု ဝိုၚ်ဝေၚ်လံၚ်သြန်ဂှ်ရ ပရေၚ်ဘဝ/မၞိဟ်/ပိုန်ဒြပ် ညးဒေသ/ညးဍုၚ်ကွာန်တံ သကဵုဝါတ်ဂါတ်ဂၠိုၚ်ကၠုၚ်ရ။
ဟိုတ်နူဝေၚ်လံၚ်သြန်တုဲ သ္ၚိကၟိန်ဒးဗၠိုက်တၞီမံၚ်ကဵုခတှ်၊ ပရေၚ်အိန်ထံၚ်ပြးဆာဲတုဲ သၟတ်ဂမၠိုၚ်လေဝ် သၟာၚ်နူဗၠိုက်တၞီအာ ပ္ဍဲအရာဝေၚ်လံၚ်သြန်ဂှ်မ္ဂး ပရေၚ်ကၠတ်ဂၠံက်ပၠံၚ်ၜး အပ္ဍဲဒေသ၊ ပရေၚ်ကတဵုဒှ်သၞ ကေုာံ အမှုရာဇဝတ် ဆေၚ်စပ်ကဵု ဂဥုဲၜူမာဲဂမၠိုၚ်ဂှ်လေဝ် သၠုၚ်တိုန်ကၠုၚ်သိုက်သိုက်ရ။
ကိစ္စဝေၚ်လံၚ်သြန်ဏံဝွံ စတမ်ဂှ် သကဵုစိုတ်ချဳ၊ သကဵုမိပ်ဇြိပ်ခိုဟ်ကီုလေဝ် ဍာ်ဇမၠိၚ်မ္ဂး သကဵုဒှ်ပြဒ္ဒညာ ပရေၚ်မၞိဟ် ဗွဲမဂၠိုၚ်ရောၚ် ညးဒေသတ္ကအ်ခၟိုၚ်မွဲတၠ ဟီုဂးလဝ်ရ။
“စတမ်ဂှ်တှေ် မိပ်ခိုဟ်မံၚ်ဏောၚ်။ ပိုဲတံမှ ဒှ်အာ အရိုဟ်ဗ္တံရ။ ဆဂး လအ်ကၠုၚ်တှေ် အရာစိုတ်ယှုက်တံ ဂၠိုၚ်ကၠုၚ်ရ။ ဟိုတ်နူလှုဲတုဲ အမှုဒှ်သၞတံ သာဂၠိုၚ်ကၠုၚ်ရ။ လ္ၚဵုဂှ်တှေ် နူကဵုဂၠာဲမံၚ်ပရေၚ်ပိုန်ဒြပ် ခိုဟ်ခိုဟ်မိုဟ်မိုဟ်ဂှ် စမ်ၜတ်ဒး ပ္ဍဲအရာဝေၚ်လံၚ်သြန်တုဲ ဆောံလေၚ်အာသီုဖအိုတ်ဂှ် ဂွံဆဵုကေတ် ဗွဲမဂၠိုၚ်” သာ်ဝွံ ဟီုရ။
ဟိုတ်ဂှ်ရ သွက်ဂွံဂၠာဲသွဟ် ကိစ္စဝိုၚ်ဝေၚ်လံၚ်သြန် ပံက်လဝ်ဗွဲမလအ်လ တုပ်ညံၚ်ရဴဂွံလဝ်လိုၚ်ဇြေန်ဗဗွဲဓဝ် အပ္ဍဲတွဵုရးဂှ် ညးစၞးကၠတ်ထဝ်တွဵုရး ဆန္ဒမာဲ စၟတ် (၂)၊ ပွိုၚ်ဍုၚ်ကျာ်မြဟ် ဥူတဇြဝ် သဳကၠဳပ္တိုန်ဂလာန် ပ္ဍဲပေဲါကောံဓရီုလၟေၚ်ဍာံဒုတိယ၊ ကၠတ်ထဝ်တွဵုရးဍုၚ်မန်အလန်တတိယ မကၠောန်ဗဒှ် ပ္ဍဲဂိတုဂျောန် စၟတ်တ္ၚဲ (၁၆) တုဲကၠုၚ်ဏံရ။
ဥူတဇြဝ်ဂှ် “ဝိုၚ်ဝေၚ်လံၚ်သြန်တံဂှ် မၞိဟ်မွဲဂကောံတံ ကေတ်အကံက်လှုဲတုဲ ကဵုမံၚ်အခေါၚ်ကၠောန်ရ။ ဝိုၚ်ဝေၚ်လံၚ်သြန်တံဂှ် ဟိုတ်နူဒှ်ကမၠောန်ဟွံလုပ်သၞောဝ်ဂှ်ရ လိက်ဝရာန်ရပ်ဟွံပါမွဲသာ်လေဝ် ဂကောံမဆေၚ်စပ်တံ ရပ်ကေတ်အရေဝ်မာန်မံၚ်ဏောၚ်ဂှ် စၞောန်ထ္ၜးလဝ်ပ္ဍဲဥပဒေရ” သာ်ဝွံ ဟီုရ။
လ္တူဥူတဇြဝ် ပ္တိုန်ထ္ၜးပၠောပ်လဝ်ဂလာန် ကိစ္စတၟာတ်ဒၞာတာ ဝိုၚ်ဝေၚ်လံၚ်သြန်ဂှ် ညးစၞးကၠတ်ထဝ်ဗွဲမဂၠိုၚ်တံ ဒုၚ်တဲသဳကၠဳတုဲဂှ်မ္ဂး ဂလာန်ပ္တိုန်ထ္ၜးဂှ် ညးဒစဵုဒစးဟွံမွဲ ကၠတ်ထဝ်သ္ပဏာဒတန်ရ။
ဟိုတ်နူကၠတ်ထဝ်သ္ပဏာဒတန်ဂှ်ရ ကိစ္စတၟာတ်ဒၞာတာ ဝိုၚ်ဝေၚ်လံၚ်သြန်ဂှ် အလဵုအသဳတွဵုရး ဒးရပ်စပ် ဓမံက်ရုပ်ရဴရ။
မွဲလ္ပာ်ဂှ် ဝိုၚ်ဝေၚ်လံၚ်သြန်ဂမၠိုၚ် အပ္ဍဲတွဵုရးဂှ်ဝွံ ဒပ်ကမ္မယှေန်ပၞာန် ကေုာံ ဂကောံဒပ်ဗၠာဲသၟိၚ်သၟဝ်တဲညးတံကီု၊ နူပၞာန်ကွာန် စဵုကဵုဂကောံအုပ်ဓုပ်ကွာန်/အရာပ်တံကီု ကေတ်လဝ်အကံက်ရ။ ဝိုၚ်ဝေၚ်လံၚ်သြန်လ္ၚဵုဂှ်မ္ဂး နူဒပ်ပၞာန်တံ ကဵုလဝ်အခေါၚ်ပံက် ကုဂကောံရပ်လွဟ် ဖျေံလဝ်လွဟ်ဇရေၚ်ညးတံရ။
ဟိုတ်ဂှ်ရ နအလဵုဒပ်ပၞာန်ပါလုပ်ဆေၚ်စပ်မံၚ်တုဲ လ္တူအလဵုအသဳပၞာန်ရပ်စပ် ဝိုၚ်ဝေၚ်လံၚ်သြန် ဂွံမံၚ်ဖဵုပရဲဏံဂှ် နကဵုသံသယဗွဲမဂၠိုၚ် ဒှ်အရာဒးပ္တိတ်သၟာန်ရ။
“ဝိုၚ်ဝေၚ်လံၚ်သြန်ဗွဲမဂၠိုၚ်ဂှ် ဆက်စပ်မံၚ်ကဵု ဂုန်ဖဵုပရေၚ်ပိုန်ဒြပ် ညးတာလျိုၚ်ဒပ်ပၞာန် အဆံၚ်လ္တူကဵု က္ဍိုပ်သ္ကိုပ်ဂကောံရပ်လွဟ်တံရ။ အမာတ်ပ္တိုန်လဝ်ဂလာန် သကဵုဇီုကပိုက်အာကဵု ပရေၚ်ပိုန်ဒြပ်ညးတံဂှ်တှေ် ဗီုကဵုဒှ်မံၚ် ဒဒိုက်ဇကု ဇကုဂၠာဲကေတ်ရ” သာ်ဝွံ ညးဒေသကျာ်မြဟ်မွဲတၠ ဟီုရ။
ဝိုၚ်ဝေၚ်လံၚ်သြန် အပ္ဍဲတွဵုရးဂှ်ဝွံ ဒပ်ကမ္မယှေန်ပၞာန်တံ ဖန်ဗဒှ်လဝ်ပၞော်သြန်လုပ် သွက်ဂကောံသၟဝ်တဲညးတံဂမၠိုၚ်ဂးတုဲ အကြာညးဍုၚ်ကွာန်တံ ဟီုဂးပါ်ပဲါမံၚ်အိုတ်ရ။
ဒှ်သာ်ဂှ်ရ နူအလဵုအသဳပၞာန်တွဵုရး စဵုကဵုအဆံၚ်ပရေၚ်အုပ်ဓုပ်ကွာန်/အရာပ် ပါလုပ်ဆေၚ်စပ်ဒၟံၚ်တုဲ ဂွံမံၚ်ဖဵုပရဲကီု၊ မွဲလ္ပာ်ဂှ်လေဝ် သွက်ဂွံတၟာတ်ဒၞာ ဝိုၚ်ဝေၚ်လံၚ်သြန် မဒှ်ပၞော်သြန်လုပ် ဂကောံရပ်လွဟ်လ္ၚဵုတံဂှ် ကၠတ်ထဝ် သ္ပဏာဒတန်ကီုလေဝ် သွက်ဂွံဓမံက်ရုပ်ရဴဂှ် ဒှ်အရာကိစ္စလောဲသွာမွဲ ဟွံသေၚ်ရောၚ် ပရေၚ်သ္ၚဳဂၠိပ်ဂမၠိုၚ်လေဝ် နွံမံၚ်ကီုရ။
“ဝိုၚ်ဝေၚ်လံၚ်သြန်တံဏံဂှ် ပံက်လဝ်ကဵု သွက်ဂကောံပၞာန်ကဵု ဂကောံရပ်လွဟ်သၟဝ်တဲညးတံရ။ ကိစ္စဏံဂှ်လေဝ် ဆေၚ်မံၚ်ကဵု ညးထိၚ်နေဝ်တံ၊ သ္ကိုပ်ဗၠာဲသၟိၚ်တံ၊ က္ဍိုပ်သ္ကိုပ်ဗၠာဲသၟိၚ်တံရ။ ဟိုတ်ဂှ်ရ ကၠတ်ထဝ်သ္ပဏာဒတန်ကီုလေဝ် သွက်ဂွံဒၞာတာဂှ် ဟွံလောဲပုဟ်။ ဝိုၚ်ဝေၚ်လံၚ်သြန်တံဂှ် သွက်ညးတံတှေ် ဒှ်မံၚ်ကမၠောန်ဖဵုပရဲ ပရေၚ်ပိုန်ဒြပ်မွဲဏောၚ်” သာ်ဝွံ ဂးရ။
အတိုၚ်ဥပဒေမ္ဂး အလဵုအသဳပၞာန်တွဵုရးတံ ပံၚ်ကောံရေၚ်တၠုၚ် ကုဂကောံဒပ်ဗၠာဲသၟိၚ်၊ ဂကောံဂီုကၠီု ကေုာံ ဂကောံအုပ်ဓုပ်တံတုဲ တၟာတ်ဒၞာတာ ဝိုၚ်ဝေၚ်လံၚ်သြန် အပ္ဍဲတွဵုရးမာန်ကီုလေဝ် လက္ကရဴကမၠောန်ဝေၚ်လံၚ်သြန်ဂှ်ဝွံ ညးသြဇာဇၞော်ဇၞော်ဂမၠိုၚ်၊ ဂကောံရပ်လွဟ်ဂမၠိုၚ် ပါလုပ်ဆေၚ်စပ်မံၚ်ဂှ်ရ သွက်အလဵုသဳတွဵုရးဂှ် ဒှ်မံၚ်တၚ်ကော်ဆောရ။
သရောပ်ကၠေံနိဂီုမ္ဂး ကိစ္စတၟာတ်ဒၞာ ဝိုၚ်ဝေၚ်လံၚ်သြန်ဂမၠိုၚ်ဂှ်ဝွံ ၜိုတ်ထ္ပက်စၟတ်တဲသ္ပဒတန် အပ္ဍဲၝောံခန်ကၠတ်ထဝ်ဂှ်ဟေၚ် ဒှ်အရာကိစ္စ အလဵုလဵုတုဲဒှ်အာမွဲ ဟွံသေၚ်ရ။ ပရေၚ်ဗက်စအဂတိ စက်ယန်ပရေၚ်အုပ်ဓုပ်ဗလးတိဂှ် ကေတ်အရေဝ်ဗွဲမစိုပ်တရဴ ဟွံမာန်ဏီ ကေုာံ ပရေၚ်သၞောဝ်ဥပဒေအုပ်လဒံဂှ် ကၠောန်သ္ပရေၚ်တၠုၚ် ၜိုတ်ထ္ၜးအယောၚ်အလာသက်သက်ရမ္ဂး ဂလာန်ပ္တိုန်ထ္ၜးကၠတ်ထဝ်ဂမၠိုၚ်ဝွံ ဟွံၜက်တိတ်နူအဆံၚ်လိက်လ္တူစက္ခူတုဲ ဝိုၚ်ဝေၚ်လံၚ်သြန် မၞုံကဵုရိုဟ်ကၞက်ဂမၠိုၚ်ဂှ်လေဝ် ဆက်ၚိတ်ဒၟံၚ် ဘဝညးဍုၚ်ကွာန်တံဟေၚ်ရ။