ကွးဘာနူဌာန်ဒတန်ဗ္တောန်ပညာဆုဲပြံမန် မၞုံပ္ဍဲဍုၚ်မာဲဆံက်၊ ပယျဵုသေံဗၟာဂှ် နူကဵုညးတာလျိုၚ်သေံတံ ကၠောန်သ္ပရေၚ်တၠုၚ် Migrant Health Profile ကေုာံ Scanning တုဲ ကဵုမံၚ်ထံက်ပၚ် စပ်ကဵုပရေၚ်ထတ်ယုက်ရောၚ် ဂွံတီကေတ်ရ။
ပၞောဝ်ကဵုဌာန်ဒတန်ဗ္တောန်ပညာပံက်လဝ် သွက်ကောန်ၚာ်နူသ္ၚိကၟိန်သၟာကမၠောန်ဆုဲပြံၚ် ပ္ဍဲမာဲဆံက် (၆၀) ဂှ်မ္ဂး ဌာနပရေၚ်ပညာသေံကဵု ဌာနထတ်ယုက်တံ ပံၚ်ကောံတုဲ အခိၚ်လၟုဟ်ဏံ ဌာန်ဒတန်ဗ္တောန်ပညာဆုဲပြံၚ် ၜိုတ် (၂၀) ဂှ် ကၠောန်သ္ပဒၟံၚ် Migrant Health Profile ကေုာံ ဗှ်မံၚ်သကေန်ရောၚ် အ္စာၝောံနူဌာန်ဒတန်ဗ္တောန်ပညာဆုဲပြံၚ်မန်မွဲတၠ ဟီုရ။
“Health Profile ဂှ်တှေ် လၟုဟ်မှ ဂွံစကၠောန် Pilot (ကိုန်အစဳဇန်စမ်ၜတ်) ရ။ ညးတံရုဲလဝ်ဘာ ၜိုတ် (၂၀) ရ။ သၞာံဏံ စကၠောန်ရ။ ကိစ္စဘာဂှ်တှေ် ပရေၚ်ထတ်ယုက်ဟေၚ် ပါဂၠိုၚ်ရ။ လၟုဟ်မှ ဂွံကၠောန်ဏောၚ်ဟီုတှေ် ဖဵုခိုဟ်၊ ဖဵုပရေံ ဟွံတီကၠးဏီပုဟ်။ ညးဆေၚ်စပ်ကဵု ပရေၚ်ပညာသေံကဵု ပရေၚ်ထတ်ယုက်တံ ပံၚ်ကောံတုဲ ကၠောန်ရ” သာ်ဝွံ ညးဟီုရ။
သၞာံဗ္တောန်ပညာလၟုဟ်ဏံဝွံ သၟာၚ်နူထံက်ပၚ်ဆေၚ်စပ်ကဵု ပရေၚ်ထတ်ယုက်တုဲ သွက်ကောန်ၚာ်အဝဲမံၚ်ဘာတံဂှ် နူဌာနဝန်ဇၞော်ပရေၚ်ပညာသေံ ပ္တိတ်ကဵုသက်သဳ တၞးကာဒ်ကွးဘာကီုရောၚ် ဂးရ။
ပၞောဝ်ကဵုဌာန်ဒတန်ဗ္တောန်ပညာ သၟာကမၠောန်ဆုဲပြံၚ် မၞုံပ္ဍဲမာဲဆံက်ဂှ်မ္ဂး ဌာန်ဒတန်ဗ္တောန်ပညာ သၟာကမၠောန်ဆုဲပြံၚ်မန်ဂှ် ဂကောံမှာဇန်မန်ဂမၠိုၚ်ကဵု အ္စာ/အ္စာၝောံမန်တံ က္ဍိုက်က္ဍိုပ် စပံက်ပ္တန်လဝ် ပ္ဍဲသၞာံ (၂၀၀၅) တုဲ နကဵု Migrant Education Coordination Center (MECC) မွဲတဆံၚ် ဂွံလဝ်အခေါၚ်ပံက်ဗဗွဲဓဝ် နူဌာနဝန်ဇၞော်ပရေၚ်ပညာသေံရ။
ပ္ဍဲကဵုဘာဂှ်ဝွံ ဇၟာပ်သၞာံ ကွးဘာနွံ ကြပ် (၂၀၀) တုဲ သၟာၚ်နူကောန်မန်/ဗၟာတုဲ ကောန်ၚာ်ကရေၚ်၊ သေံ၊ ရခေၚ် ပါလုပ်မံၚ်ဂှ်ရ နကဵုမာတိကာဗီုဗ္တောန်ကိတ်ညဳဂှ် ဗ္တောန်ကဵုမံၚ်နွံရ။
“ဘာနွံမံၚ်သၟဝ်ဖံၚ်ဒေယှေန်သေံဟီုတှေ် ဟွံတုပ်ကဵု ဘာကောန်ဂကူမန်ပုဟ်။ ကိုပ်ကၠာဂှ်တှေ် စကၠုၚ်လဝ်ကဵု ကွးဘာမန်တံရ။ လၟုဟ် ဗၟာဂၠိုၚ်အိုတ်ရ။ မန်ဂှ် နွံၜိုတ် (၁၄) က္ဍိုပ်ကၠံဟေၚ်ရ။ ကရေၚ်၊ သေံ၊ ရခေၚ်တံလေဝ် နွံမံၚ်က္ဍိုပ်ကၠံညိညိရ” သာ်ဝွံ ညးဟီုရ။
သွက်ကွးဘာတန်သၠုၚ်တံဂှ်ဝွံ သဇိုၚ်မာတိကာဗီုဗ္တောန်ဂှ် ချူဓဇက်လဝ် ဗီုပြၚ် Pre-GED တုဲ ပ္ဍဲကဵုဘာသာဂမၠိုၚ်ဂှ်မ္ဂး ဘာသာသေံ၊ ဗၟာ၊ အေၚ်္ဂလိက်၊ ဂၞန်၊ သိပ္ပံတံ ပါလုပ်မံၚ်ရောၚ် ဂွံတီကေတ်ရ။
သွက်ကောန်ၚာ်သၟာကမၠောန်ဆုဲပြံၚ်မန်-ဗၟာ မစိုပ်ဍုၚ်သေံတံဂှ်ဝွံ ပံက်လဝ်ဌာန်ဒတန်ဗ္တောန်ပညာဆုဲပြံၚ် ပ္ဍဲဒေသရနံၚ်၊ မာဲဆံက် ကေုာံ မဟာဇျှာဲတုဲ ပ္ဍဲကဵုဘာဂမၠိုၚ်ဂှ် မာတိကာဗီုဗ္တောန်ဗၟာ (ဟွံသေၚ်မ္ဂး) ဘာသာမန် ကေုာံ အခိုက်ကၞာယေန်သၞာၚ်ဂှ် သ္ပအဓိက ဗ္တောန်ကဵုမံၚ်နွံရ။
ဟိုတ်နူအကာဲအရာဂၠးတိ ကေုာံ အကာဲအရာ ပရေၚ်ဍုၚ်ကွာန်အပ္ဍဲဍုၚ်တုဲ ညးတၠဒါန်ကၟိန်ဍုၚ်နာနာတံဝွံ လ္တူဌာန်ဒတန်ဗ္တောန်ပညာဆုဲပြံၚ် မၞုံပ္ဍဲပယျဵုသေံဗၟာဂှ် ဖအောန်ဖျေံလဝ် ပရေၚ်ထံက်ပၚ်ဂှ်ရ သွက်ဂွံကဵုသြန်ဂိတုအ္စာ/အ္စာၝောံကဵု ဘာဂွံတန်ကြန်မာန်ဂှ် တၚ်ကော်ဆောနွံမံၚ်ရ။
ဗွဲကြဴနူပရေၚ်ကြေပ်ဂြတ် သၞာံ (၂၀၂၁) တုဲဂှ် ကောန်ၚာ် ကေုာံ သၟတ် မစိုပ်ကၠုၚ် သွက်အခေါၚ်အရာ ပရေၚ်ပညာဂၠိုၚ်ကၠုၚ်တုဲ ပ္ဍဲကဵုဌာန်ဒတန်ဗ္တောန်ပညာ မၞုံပ္ဍဲမာဲဆံက်ဂှ် သၟာၚ်နူဒၞာဲဟွံရုံဂပ်ဂှ်မ္ဂး တၚ်ဝါတ်ဂါတ် အ္စာ/အ္စာၝောံ ဟွံရုံဂပ်ဂှ်လေဝ် နွံမံၚ်ကီုရ။