နူကဵုဂိတုမေတုဲကၠုၚ်တေံရ ရန်ဇန်ဒၟံၚ် အလုံဍုၚ်မွဲ သွက်ဂွံကလေၚ်ရုဲစှ် သ္ကိုပ်အုပ်ဓုပ်ကွာန်-အရာပ်တၟိတအ်ဂှ် ဒှ်ဂဝိၚ်ဆက်စပ်ကဵု ဂကောံဒစဵုဒစးတအ်တုဲ မ္ဒးလဇုဲလဇဒၟံၚ်နွံရောၚ် သ္ကိုပ်အုပ်ဓုပ်ကွာန်ဍုၚ်မန်မွဲတၠ ဟီုရ။
ပရေၚ်ရုဲစှ်သ္ကိုပ်အုပ်ဓုပ်ကွာန်-အရာပ်တၟိဏံဂှ် နူကဵုတၠအဝဵုပၞာန်ကဆံၚ်လတူတေံ ဒှ်ဂဝိၚ်ဖေက်ရဲဒစဵုဒစးတအ်ပါလုပ် ဒှ်သ္ကိုပ်အုပ်ဓုပ်ကွာန်-အရာပ်တအ်တုဲ မ္ဒးလဇုဲလဇဒၟံၚ်ရောၚ် သ္ကိုပ်အုပ်ဓုပ်ကွာန်ဂှ် ဟီုထ္ၜးရ။
“လိက်စၞောန်ဍေံတိတ်ဂှ် အလုံဍုၚ်မွဲဂှ် နူကဵုဂိတုမေတေံရ ညံၚ်ဂွံကလေၚ်ရုဲစှ် သ္ကိုပ်အုပ်ဓုပ်ကွာန် သ္ကိုပ်အုပ်ဓုပ်အရာပ်တၟိဖအိုတ်ရ၊ ဆဂးတှေ် ကာလကၠောန်ကွေံကွေံဂှ် ရဲဂကောံဒစဵုဒစးတအ် ဗီုကဵုရဲဗော်အေန်အေလ်ဒဳတအ်၊ ဗီုကဵုရဲဗွိုၚ်သဳဒဳအေမ်တအ်၊ ရဲဗွိုၚ်ဗော်ပရေၚ်ဍုၚ်ကွာန်ဒေသ ပ္ဍဲရး/တွဵုရးတအ် ဍေံပါကၠုၚ်တွဵုရ၊ ဟိုတ်ဂှ်ရတှေ် ရဲစဏံ ညံၚ်ဂွိုအ်ပါလုပ် ဒှ်သ္ကိုပ်အုပ်ဓုပ်ကွာန် သ္ကိုပ်အုပ်ဓုပ်အရာပ်ဂှ်တှေ် ဍေံတအ် စၟဳစၟတ်ဖျေံမံၚ်ဗီုနွံ၊ ဇှ်ရ ပရေၚ်ရုဲစှ် သ္ကိုပ်အုပ်ဓုပ်ကွာန်/သ္ကိုပ်အုပ်ဓုပ်အရာပ်တၟိဏံ ဒးလဇုဲလဇဒၟံၚ်” သာ်ဝွံ ညးဟီုရ။
ကိစ္စရုဲစှ်သ္ကိုပ်အုပ်ဓုပ်ကွာန်-အရာပ်တၟိဏံဂှ် တၠအဝဵုတအ် ဟိုတ်နူဒှ်ဂဝိၚ် ဖေက်ဂကောံဒစဵုဒစးတအ် ပါလုပ်ဒှ်သ္ကိုပ်အုပ်ဓုပ်ကွာန်-အရာပ်ဂှ်တုဲ ဂိတုမေတုဲကၠုၚ်ဏံ ဟွံဒှ်ရုဲစှ်တုဲ ပ္ဍဲဂိတုဂျောန်ဏံ ညံၚ်ဂွံရုဲစှ်တုဲဒှ်မာန်ဂှ်လေဝ် ပ္တိတ်လဝ်လိက်စၞောန်ရ။
“ဍေံချိၚ်လဝ်တှေ် ဂိတုမေတုဲကၠုၚ်ဏံ ညံၚ်ဂွံရုဲဒတုဲထောံရ၊ ကာလကွေံကွေံဂှ်တှေ် ဖေက်မၞိဟ်ပြံက်နှဴလုပ် ဒှ်သ္ကိုပ်အုပ်ဓုပ်ကွာန်/သ္ကိုပ်အုပ်ဓုပ်အရာပ်ဂှ် ဍေံတအ်ဂွိၚ်မံၚ်ကွေံကွေံတုဲတှေ် ဟွံဒှ်ရုဲကၠုၚ်၊ စၞောန်ကလေၚ်ကၠုၚ်ပၠန် ဂိတုဂျောန်ဏံ ညံၚ်ဂွံရုဲတုဲဒှ်၊ ဆဂး မိၚ်မံၚ်ဂှ် ဒေသဟွံဂီုကၠီု ထ္ၜးဟိုတ်တုဲတှေ် ဒုၚ်စအာ သ္ကိုပ်အုပ်ဓုပ်ကွာန်တြေံဂှ်လေဝ် မိၚ်ဗီုဂှ်လေဝ်နွံမံၚ်” သာ်ဝွံ ညးဆက်ဟီုရ။
ပ္ဍဲကဵုကာလရုဲစှ် သ္ကိုပ်အုပ်ဓုပ်ကွာန်-အရာပ်တၟိဏံဂှ် ဒေသလ္ဒောဝ်ဂြိုဟ်ဍုၚ် ဂကောံပၠန်ဂတးဂမၠိုၚ်တအ် ချဳဒရာၚ်ဟွံစိုပ်တအ်ဂှ် ပရေၚ်ပြံၚ်သၠာဲရုဲစှ်တၟိနွံကၠာလေဝ် ပ္ဍဲကဵုဒေသ ရး/တွဵုရး ဂကောံပၠန်ဂတးတအ် ချဳဒရာၚ်စိုပ်ဒၟံၚ်တအ်ဂှ် ညးမိက်ဂွံ ရုဲစှ်သ္ကိုပ်အုပ်ဓုပ်ကွာန်/သ္ကိုပ်အုပ်ဓုပ်အရာပ်တအ် ဟွံမွဲရောၚ်ဂှ်လေဝ် ညးဆက်ဟီုထ္ၜးကဵုရ။
ပ္ဍဲကဵုရုဲစှ် သ္ကိုပ်အုပ်ဓုပ်ကွာန်-အရာပ်တၟိဏံဂှ် နူဗွိုၚ်ဗော်အေန်အေလ်ဒဳ၊ နူဗွိုၚ်ပဳတဳအေဖ်၊ နူဗွိုၚ်သဳဒဳအေမ် ညံၚ်ဟွံဂွံပါလုပ် စၟဳစၟတ်ဗွဲမချိုတ်ပၠိုတ်ညိဂှ်လေဝ် နူကဵုဝန်ဇၞော်ပရေၚ်အပ္ဍဲဍုၚ် တၠအဝဵုပၞာန်တအ် စၞောန်လဝ်ကု ရး/တွဵုရးတအ်နွံ ဂွံ တီကေတ်ရ။