ဍုၚ်ကွာန်ဌာန်ဒေသ အလဵုအသဳတၠအဝဵုပၞာန်တအ် စက်ယန်ပရေၚ်အုပ်ဓုပ် ဂွံဖျေံစိုတ်တအ်ဂှ် ဒုၚ်ကေတ်အာ သ္ကိုပ်အုပ်ဓုပ်အရာပ်-ကွာန် တြေံရရောၚ် သ္ကိုပ်အုပ်ဓုပ်ကွာန် ကေတ်မံၚ်တာလျိုၚ်လၟုဟ် ဍုၚ်မန်မွဲတၠ ဟီုလဴထ္ၜးရ။
ပ္ဍဲကဵုဍုၚ်မန်ဝွံ ဒေသကွာန်လ္ၚဵုဂှ် ဗက်အလိုက်ပၟိက်ဆန္ဒ တၠအဝဵုပၞာန်တအ်ပေၚ်ပေၚ်ဂှ်တုဲ အခိၚ်ကာလပြံၚ်သၠာဲဏံ စၟဳဒၟံၚ်သွက်ဂွံပြံၚ်သၠာဲသ္ကိုပ်အုပ်ဓုပ်အရာပ်-ကွာန်တအ်ကီုလေဝ် မၞိဟ်တြေံဂှ် ဟိုတ်ဒှ်မၞိဟ်ပၟိက်ဆန္ဒတၠအဝဵုပၞာန်တအ်ဂှ်တုဲ ဟွံမိက်ပြံၚ်သၠာဲရောၚ် သ္ဂးရ။
“မၞိဟ်တြေံဂှ် ဒှ်မံၚ်မၞိဟ်ပတှေ် ပၟိက်ဆန္ဒတၠအဝဵုပၞာန်တအ်ဖအိုတ်ရ၊ ယဝ်ဍေံကလေၚ်ရုဲတၟိတှေ် မၞိဟ်တိုန်တၟိဂှ် ပၟိက်ဆန္ဒဍေံ ဠဒှ်မှ ဣဒှ်၊ ပၟိက်ဆန္ဒအတိုၚ်ပၟိက်စိုတ်ဍေံ ဟွံဒှ်တှေ် ဍေံကၠောန်ကမၠောန်ခက်၊ ဇှ်ရ မၞိဟ်တြေံဏံတှေ် သွက်ဍေံပြေပြံၚ်ဂၠိုၚ်၊ ဌာန်ဒေသဍေံအုပ်ဓုပ်ဂွံဖျေံစိုတ်ဂှ်တှေ် ဍေံဒုၚ်စအာ မၞိဟ်တြေံပၠန်ရ” သာ်ဝွံ သ္ကိုပ်အုပ်ဓုပ်ကွာန် ဍုၚ်မန်မွဲတၠ ဟီုထ္ၜးရ။
ဆဂး ယဝ်ရပူဂဵုကေတ်လဝ်တာလျိုၚ်သ္ကိုပ်အုပ်ဓုပ်အရာပ်-ကွာန်ဂှ် ပတိုန်လဝ်လိက်နုက်တိတ်ဒေါံဇူနွံမ္ဂး သွက်ဂွံကလေၚ်ရုဲတၟိဂှ် ဒးကလေၚ်ဖန်ဇန်တၟိနွံရောၚ် သ္ဂးရ။
“ဗွဲမဂၠိုၚ်ဂှ် ဍေံတအ်ပညဳပညပ်လဝ်တုဲဒှ်အိုတ်ရ၊ မၞိဟ်တြေံဂှ် ဂွံဒေါံဇူနုက်တိတ်ဂှ် နွံအောန်မံၚ်၊ ဗီုကဵုဒၞာဲဒေသနှဴရဴ အကြာရဲပၠန်ဂတးတအ်တှေ် ဍေံစွံအာဆမဇ္ဇျဟ်ရ၊ အဓိကဂှ်တှေ် ဒၞာဲပရေၚ်အုပ်ဓုပ်စက်ယန်ဍေံဂေတ်မံၚ်ခိုဟ်ခိုဟ်ဂှ်တှေ် ကိစ္စ ပရေၚ်အုပ်ဓုပ်ဍေံ၊ ကိစ္စပရေၚ်ပၞာန်ဍေံ ဍေံဖန်ဖက်ကလိတ်ကလောတ်ဂှ်ဏောၚ် အဓိက၊ ဗွဲမဂၠိုၚ်ဂှ် မၞိဟ်တြေံဂှ်ရ ဆက်ကေတ်အာပၠန်” သာ်ဝွံ ညးဆက်ဟီုရ။
အတိုၚ်သၞောဝ်ဥပဒေဍုၚ် (ကၟိန်ဍုၚ်ဗၟာ ၂၀၀၈) ဂှ်မ္ဂး သ္ကိုပ်အုပ်ဓုပ်အရာပ်-ကွာန်ဂှ် တုပ်သၟဟ်ကဵု အာယုက်အလဵုအသဳဍုၚ်ကီုတုဲ ခါန်ကၞက်ဂကောံအလဵုအသဳတအ်တုဲမ္ဂး သ္ဒးရုဲစှ်ထ္ၜုတ်ပ္တိုန်သ္ကိုပ်အုပ်ဓုပ်အရာပ်-ကွာန်တၟိတအ်ကီုရောၚ် ချူဓမံက်လဝ်ရ။
ၜိုန်ဂှ်ကီုလေဝ် ရံၚ်ကဵုဂုန်ဖဵုအလဵုအသဳတၠအဝဵုပၞာန်တအ်တုဲ ပ္ဍဲဍုၚ်မန်ဌာန်ဒေသဗွဲမဂၠိုၚ်ဂှ် သ္ကိုပ်အုပ်ဓုပ်အရာပ်-ကွာန်တြေံဂှ်ဟေၚ် ဒုၚ်ကေတ်အာတုဲ ဟွံကလေၚ်ရုဲတၟိရရောၚ် ဂွံတီကေတ်ရ။