ပ္ဍဲတွဵုရးဍုၚ်မန်ဝွံ နူဂိတုဂျာန္နဝါရဳ စဵုကဵုကၞောတ်ဂိတုဂျောန်အိုတ် သၞာံ (၂၀၂၆) ဏံ ဟိုတ်နူယဲကၠဵုပရအ်ကိတ်တုဲ ညးချိုတ်ကၠုၚ် စဵုကဵု (၉) တၠနွံရဂှ် ဂွံတီကေတ် နူညးစုက်လုက်ကဵု ဌာနက္ဍိုက်က္ဍိုပ်ပရေၚ်ထတ်ယုက်ညးဍုၚ်ကွာန်တွဵုရးရ။
ပၞောဝ်ကဵုညးချိုတ် ဟိုတ်နူယဲကၠဵုပရအ်ကိတ် (၉) တၠဂှ်မ္ဂး အပ္ဍဲပွိုၚ်ဍုၚ်မတ်မလီု (၃) တၠ၊ ပွိုၚ်ဍုၚ်ရေဝ်၊ သဓီု ကေုာံ ၜဳက္လေၚ်ဂှ် ၜါၜါတၠနွံရောၚ် ဂွံတီကေတ် နူစရၚ်ဌာနက္ဍိုက်က္ဍိုပ်ပရေၚ်ထတ်ယုက်ညးဍုၚ်ကွာန်တွဵုရးရ။
အပ္ဍဲသၞာံ (၂၀၂၅) တုဲကၠုၚ်ပွိုၚ်မွဲသၞာံတေံဂှ် ဟိုတ်နူယဲကၠဵုပရအ်ကိတ်တုဲ ညးချိုတ်အာ (၂) တၠဟေၚ်ကီုလေဝ် သၞာံဏံ အပ္ဍဲကာလ (၆) ဂိတုဂှ် ညးချိုတ်စဵုကဵု (၉) တၠ နွံကၠုၚ်တုဲ နကဵုညးဍုၚ်ကွာန်တံ ဒးသ္ပသတိကဵု ယဲကၠဵုပရအ်ဂိ ဗွဲတၟေၚ်ရောၚ် ဂးရ။
နကဵုညးဍုၚ်ကွာန်ဂမၠိုၚ်တံလေဝ် ကၠဵု၊ ဗ္ဂဲ ဇကုလွဳလဝ်ဂမၠိုၚ်ဂှ် ဒးထ္ပက်ကဵုဂဥုဲစဵုဒၞာကီု၊ ဒးဒုၚ်ကိတ်/္ၚာ်ကဵု ဗ္ဂဲ၊ ကၠဵုမ္ဂး နကဵုအခိုက်တြေံ လ္ပလွဳကဵုအိက်ၜံက် (ဂဥုဲသုၚ်ၜံက်) မွဲသာ်ဟေၚ်တုဲ ဒးထ္ပက်ကဵုဂဥုဲစဵုဒၞာ ယဲကၠဵုပရအ်ကိတ် ဍိုက်ဍိုက်ပေၚ်ပေၚ်ရောၚ်ဂှ်လေဝ် ဖ္တိုက်ဖၟောဝ်လဝ်ရ။
“ကိစ္စဇၞော်အိုတ်ဂှ်တှေ် နကဵုမိမတံ လ္ပကဵုကောန်ၚာ်ဇကု စဝေၚ်ကၠဵုသ္ကဲဂၠံၚ်၊ လ္ပရပ်ညိဂှ် မိက်ဂွံကဵုသတိရ။ ဒးဒုၚ်ကၠဵုကိတ်၊ ဗ္ဂ္ၚဲာ်တှေ် လ္ပကၟာတ်(သ္ၚိတ်မံၚ်) မွဲသာ် ဟီုကဵုမိမလဝဲါဂှ်ညိဂှ်လေဝ် ဒးဗ္တောန်လဝ်ကဵုဏောၚ်” သာ်ဝွံ သၞာဲဒဴ ပရေၚ်ထတ်ယုက်မွဲတၠ ဟီုရ။
ဟိုတ်နူကၠဵုပြးဇးဂၠိုၚ်ကၠုၚ်ဂှ်ရ ညးဒးဒုၚ်ကၠဵုကိတ်ဂၠိုၚ်ကၠုၚ်ကီု၊ ပ္ဍဲဍုၚ်မတ်မလီုမ္ဂး ဒးဒုၚ်ကၠဵုကိတ်၊ ကၠဵုထ္ဍေၚ်ဗက်တုဲ ကွဳလိုန်ဓာတ်ဗ္ကပ်မံၚ်ကြပ်အရိုဟ်တ္ၚဲရောၚ် ဂွံတီကေတ် နူညးဒေသလ္တူဍုၚ်တံ ဟီုဂးလဝ်ရ။
ကၠဵုပြးဇးဂမၠိုၚ် သ္ဂောံအောန်စှေ်ကၠုၚ်ဂှ် ဒးထ္ပက်ကဵုဂဥုဲတာဒၞာတုဲ သွက်ဂွံစဵုဒၞာ ယဲကၠဵုပရအ်ကိတ်ဂှ်မ္ဂး ဒးထ္ပက်ကဵုဂဥုဲစဵုဒၞာရောၚ် ညးဒေသလ္တူဍုၚ်တံ ဂးရ။
“ကၠဵုပြးဇးတံ ဂၠိုၚ်မံၚ်ကွေံကွေံရ။ ဒဳအာကွဳလိုန်ဓာတ်တှေ် ထ္ဍေၚ်ဗက်ရ။ ဍေံဂြိပ်တတ်ဂတတှေ် ဇီုဒးကဵုကွဳလိုန်ဓာတ်တုဲ ဗ္ကပ်အာနွံရ” သာ်ဝွံ ညးဒေသဍုၚ်မတ်မလီုမွဲတၠ ဟီုရ။
ဟိုတ်နူကၠဵုပြးဇးဂၠိုၚ်ကၠုၚ်ဂှ်ရ ပ္ဍဲကဵုပွိုၚ်ဍုၚ်လ္ၚဵုတံဂှ် ဂကောံအုပ်ဓုပ်ပွိုၚ်ဍုၚ်မဆေၚ်စပ်တံ ကၠောန်သ္ပမံၚ် အစဳဇန် ပသောၚ်သအး ကၠဵုပြးဇးဂမၠိုၚ်နွံရ။