နူကမၠောန်လီဠာန်သြန်အန်လာင် (ကျာဖျ) ကြုက် မၞုံဒေသယှိုဲကုက်ကဝ်၊ ဍုင်ဗြဝတဳတံမွဲအဆံင် သြန်ၝာတ်တၞး (၁၀၀၀) ပ္တောံဂမၠိုင် လုပ်စိုပ်ကၠုင်ဒၟံင် လ္တူဍုင်ကျာ်ပိကီုရောရောင် ပရိုင်မံက်ဒၟံင်အကြာညးဍုင်ကွာန်ဒေသတံရ။
သြန်ၝာတ်တၞး (၁၀၀၀) ပ္တောံတံဂှ်ဝွံ စလုပ်စိုပ်ဒၟံင်အကြာဆေင်ဝေင်ဇျှင်လံင်သြန် (ကာဇြဳနိုဝ်) မပံက်လဝ် လ္တူဍုင်ကျာ်ပိဂမၠိုင်ရောင် ပရိုင်မံက်ပြးဒၟံင်ကၠာလေဝ် အကြာဆေင်ဖျာမ္ရးတံဂှ် ဟွံဂွံဆဵုလဝ်နမတ်ဏီဂှ်ရ သ္ပဒ္တန်ချိုတ်ပၠိုတ်ဟွံဂွံရောင် ရဲလ္တူဍုင်ကျာ်ပိမွဲတၠ ဟီုထ္ၜးကၠုင်ရ။
“ပရူပရာသြန်သေံပ္တောံ တၞး (၁၀၀၀) ၝာတ်ဏံဂှ် မိၚ်ဟီုဒၟံၚ် ဗ္ဒာဲပွိုၚ်မွဲသတ္တဟရ၊ ဒဵုကဵုလၟုဟ် ရပ်ဂွံနတဲနဇိုၚ် ဟွံဆဵုဏီပုဟ်၊ မိၚ်ဟီုဒၟံၚ် ဆဵုဂဗလဝ် ပ္ဍဲဝိုၚ်ဝေၚ် (ကာဇြဳနိုဝ်) ပံက်လဝ်လ္တူဍုၚ်ကျာ်ပိဂှ်ဏောၚ် ပရိုၚ်ပရးတိတ်ဒၟံၚ်နူဂှ်ရောၚ်” သာ်ဝွံ ညးဟီုရ။
တုဲပၠန် ဒဒှ်ပရိုင် စပ်ကဵုသြန်ၝာတ်တၞး (၁၀၀၀) ပ္တောံ ပြးစိုပ်ဒၟံင်လ္တူဍုင်ကျာ်ပိဏံဂှ် အကြာညးဍုင်ကွာန်တံသၟးရ ဟီုဂးဒၟံင်နွံရောင် ညးတာလျိုင်ဂကောံရပ်လွဟ် မၞုံလ္တူဍုင်ကျာ်ပိမွဲတၠ ဟီုလဴကၠုင်ကီုရ။
သြန်ၝာတ်တၞး (၁၀၀၀) ပ္တောံဏံဂှ် ဂွံဆဵုကေတ်မံင် ပ္ဍဲဍုင်ယှိုဲကုက်ကဝ် ဒၞါဲကမၠောန်ကျဖျကြုက်တံဖျေံသ္ဇိုင် ဂၠိုင်အိုတ်ရောင် ပ္ဍဲဌာန်ပရိုင်ကရေင်ကေအိုင်သဳ ချူဓမံက်လဝ်ရ။
ဒှ်သာ်ဂှ်ရ စပ်ကဵုပရိုင်ဏံ ဍာံကီုဒှ် ဟွံဍာံကီုဒှ် နကဵုညးဍုင်ကွာန် မၞုံဒေသပယျဵုတံကီု သီုညးသွံရာန်ကပေါတ်နာနာတံ ဒးစွံသတိရောင် ဂးရ။
“ပရိုင်ဏံဂှ် ဆၜိုတ်ဟီုမံင်ညးသ္ကအ်ဓဝ်ရ၊ ဆဂး ယဝ်ရ ဒှ်ကွေံတှ်ေ ညးဒေသကၠောန်အာစအာဂှ်တှ်ေ မုဟွံဒှ်ပုဟ်လေဝ်၊ အဓိက ဆေၚ်ဖျာထဝ်၊ ဆေၚ်ဖျာသြန်လုပ်တိတ်ဂၠိုၚ်တံဂှ်ရ ညာတ်မၞိဟ်တၟေၚ်ၚ်တှ်ေ သွံရာန်ဒးစွံသတိရောၚ်” သာ်ဝွံ မၞိဟ်တြုံနူဍုင်ကျာ်ပိမွဲတၠ ဟီုရ။
ညးဍုင်ကွာန်မၞုံတန်တဴဒၟံင် ပ္ဍဲဒေသပယျဵု ဍုင်ကျာ်ပိဂှ် ပ္ဍဲအရာသွံရာန်မ္ဂး ရပ်စပ်သုင်စောဲတဴသြန်ၝာတ်ဖ္အိုတ်ကီု ဒှ်ဒၞါဲကမၠောန်လီဠာန်သြန်အန်လာင် (ကျဖျ) ကြုက်တံ ဖျေံသ္ဇိုင်နွံတန်တဴမံင်ကီုတုဲ လ္တူပရိုင်သြန်ၝာတ်ပ္တောံ မံက်ပြးဒၟံင်သာ်ဏံဂှ် ဒှ်တိုန်ဂဝိင်အိုတ်ရ။
အတိုင်င္ရုဟ်သၠာဲသြန် ပ္ဍဲဒေသပယျဵုမံက်ဒၟံင်တ္ရဲဏံ (ဂျောန် ၁၈) မ္ဂး သြန်သေံ (၁) ၝာတ်ဂှ် ဂွံသြန်ဗၟာ အကြာ (၁၂၉) ဒ္ကေဝ်ရောင် ဂွံတီကေတ်ရ။