ပ္ဍဲပွဳဗွိုၚ်ဒေသကအ်ကြိက် ကေုာံ လှာဒကှ်၊ တွဵုရးကရေၚ်ဂှ်ဝွံ ဂကောံဒပ်ကမ္မယှေန်ပၞာန်တံ သၠုၚ်ပ္တိုန်ပရေၚ်ဂီုကၠီုဗလးတိတုဲ အပ္ဍဲတ္ၚဲအကြာတဏံ ဂေတ်မံၚ်ကၚ်ကဵုက္ၜၚ်ကျာရောၚ် တမ်ရိုဟ်ပရိုၚ်အပ္ဍဲဒေသတံ ဟီုရ။
ပ္ဍဲပွဳဗွိုၚ်ဒေသကအ်ဗိန်၊ ပွိုၚ်ဍုၚ်ကအ်ကြိက် မကတဵုဒှ်လဝ်ပေဲါဗ္တိုက် ပ္ဍဲဂိတုဂျောန် စၟတ်တ္ၚဲ (၁၂) တုဲကၠုၚ်ဏံဂှ်ဝွံ ဒၞာဲကမ္မယှေန်ပၞာန်တံ ဖျေံလဝ်ဒပ်ဂမၠိုၚ်ဂှ် သၠုၚ်ပ္တိုန်ပရေၚ်ဂီုကၠီုတုဲ အခိၚ်ဗ္တံမ္ဂး ဂေတ်မံၚ်ကၚ်အဆက်ဆက်ရောၚ်ဂှ် ညးတြုံဒေသကအ်ကြိက်မွဲတၠ ဟီုရ။
“နူကဵုဍေံတံပန်ပှော်တုဲတေံရ ဂေတ်ကၠုၚ်ကၚ်ဣရ။ လ္ပာ်ဏံဂှ် အခိၚ်ဗ္တံ ဟွံဂေတ်မံၚ်ကၚ် တၟာလအ်ရ။ တုဲတှေ် အခိၚ်ဗ္တံ (၈) နာဍဳပြၚ်တှေ်လေဝ် လ္ပာ်အာလ္ပာ်သြၚ်တေံ သြၚ်ဏံ။ လ္ပတိတ်မ္ၚးညိ ကဵုလဝ်သမ္တီရ။ ပ္ဍဲကဵုဒဒန်ဂှ်လေဝ် ဒၞာလဝ်ရ” သာ်ဝွံ ညးဟီုရ။
အခိၚ်တ္ၚဲမ္ဂးလေဝ် စကာက္ၜၚ်ကျာ Y-8 ၊ Y-12 တုဲ ဂေတ်မံၚ်ကၚ်နွံရောၚ် ညးဒေသဂမၠိုၚ်တံ ဟီုရ။
တုပ်သာ်ဂှ်ကီု ပ္ဍဲကွာန် ဗော်ဍုၚ်မန်တၟိထိၚ်ဒဝ် ပွဳဗွိုၚ်ဒေသလှာဒကှ်ဂှ် ကမ္မယှေန်ပၞာန်တံ ဂေတ်မံၚ်ကၚ်ကဵုက္ၜၚ်ကျာၜါဖ္ဍိုက်တုဲ အခိၚ်ဗ္တံမ္ဂးလေဝ် ဂွံမိၚ်ဒၟံၚ်ရမျာၚ်က္ၜၚ်ကျာရောၚ် ညးဒေသလှာဒကှ်မွဲတၠ ဟီုရ။
“ၜၚ်ကျာတံဂှ် ဂေတ်မံၚ်ကၚ် သဝ်သဝ်ဟေၚ်ရ။ ဗီုကဵုဟေဝ်လဳကိုပ်တာ ဟွံသေၚ်ပုဟ်။ ဗီုကဵုၜၚ်ကျာဗ္တိုက်ရ။ အကြာဒဵုကီု ကြပ်ကွာန်ကီုဂှ် ဂေတ်ပဝ်မံၚ်ရ။ ဗ္တံ (ဂျောန် ၁၃) ဂှ်လေဝ် မိၚ်မံၚ်ရမျာၚ်ၜၚ်ကျာဏီရ” သာ်ဝွံ ညးဟီုရ။
အကြာကမ္မယှေန်ပၞာန်ကဵု ဒပ်ပံၚ်ကောံပၠန်ဂတးတံ ဒှ်ပေဲါဗ္တိုက်ၜါလ္ပာ် ပ္ဍဲဒေသလှာဒကှ်ဂှ် အောန်ကီုလေဝ် လ္တူကမ္မယှေန်ပၞာန်တံ ဂေတ်မံၚ်ကၚ်ကဵုက္ၜၚ်ကျာ ပ္ဍဲတိဍာ်ဒပ်ပၠန်ဂတးတံချဳဓရာၚ်ဂှ်တုဲ ညးဒေသတံ ဒှ်မံၚ်ဂဝိၚ် အကာဲအရာပရေၚ်ပၞာန်ရ။
သွက်ဂွံဒစးဒုၚ်ထံၚ်ပရိုၚ် ပရေၚ်ချဳဓရာၚ် ဂကောံဇြဟတ်ပၠန်ဂတးကီု၊ နကဵုပရေၚ်ပၞာန် သွက်ဂွံအုပ်ဓလီုဂၠံၚ်ဍာန်ကိစ္စဇၞော်ဂမၠိုၚ်ကီု ကေုာံ အခိၚ်ဟွံရုဲ ညံၚ်ဂွံဗ္တိုက်ကဵုက္ၜၚ်ကျာမာန်ဂှ် ပလေဝ်ပလေတ်မံၚ်ရောၚ် သဂံၚ်ပၠန်ဂတး နွံပ္ဍဲဗလးတိတံ သ္ၚဳဂၠိပ်လဝ်ရ။
ကမ္မယှေန်ပၞာန်တံဝွံ လ္တူကောန်ညးဍုၚ်ကွာန်တံဂှ် ကၠောန်သ္ပဗ္တိုက်ဒၟံၚ်ကဵုက္ၜၚ်ကျာ အဆက်ဆက်ဂှ်ရ နကဵုကောန်ညးဍုၚ်ကွာန် မနွံပ္ဍဲတိဍာ်ဒပ်ပၠန်ဂတးထိၚ်ဒဝ်တံ အခိၚ်ဒးဆဵုဂဗ ဘဲအန္တရာဲက္ၜၚ်ကျာမ္ဂး ညံၚ်ဂွံဒးဘဲဇီုကပိုက်အောန်အိုတ်ဂှ် ဒးပလေဝ်ပလေတ်မံၚ်စံၚ်ထေက်ရောၚ် ဂကောံပၠန်ဂတးဂမၠိုၚ်တံ ကဵုသမ္တီ လလောၚ်ပ္တိတ်ဒၟံၚ် မွဲနှေံမွဲနှေံရ။
ယၚ်ဒေသက္ၜၚ်ကျာကၚ်ဂေတ်ပဝ်မံၚ်ဂှ်ဝွံ ဒှ်ဒေသခရိုၚ်သဓီုကဵု ခရိုၚ်မတ်မလီု ဗော်ဍုၚ်မန်တၟိ ထ္ပက်လဝ်စၟတ်တဲလိက်ကသုက်ဒေံါပန်ပှော်အလုံဍုၚ် အေန်ဇြဳအေ ထိၚ်ဒဝ်လဝ်ဂှ်ရောၚ် ဂွံတီကေတ်ရ။