အပ္ဍဲပွိုၚ်ဍုၚ်ၜဳက္လေၚ်၊ တွဵုရးဍုၚ်မန်ဝွံ ဟိုတ်နူဒပ်ကမ္မယှေန်ပၞာန် ပန်ကဵုလွဟ်ဇၞော်တုဲ ညးဗြဴမနွံပဋိသန္ဓိကောန်ကၟာမွဲတၠကဵု ကောန်ၚာ်မွဲတၠ ဒၟံၚ်တန်တဴမံၚ် ပ္ဍဲကွာန် (ပဏ္ဍိကုန်း)၊ ဂကောံကွာန် (ကဒီပု) ဂှ် ချိုတ်အာတုဲ ဒးဘဲဝပ် (၂) တၠနွံရောၚ် ဂွံတီကေတ်ရ။
ပ္ဍဲဂိတုဂျောန် စၟတ်တ္ၚဲ (၂၂) တုဲကၠုၚ်ဏံ အခိၚ်သဝ်တ္ၚဲဂှ် နူတမ်ဒပ် (ခမရ ၃) သၟဝ်ဌာန်ဂအုပ်ၝောံဒပ် စၟတ် (၄၄)၊ ဒပ်ကမ္မယှေန်ပၞာန်တံဝွံ စွံပွန်ကဵု ဒၞာဲကွာန်ညးဍုၚ်ကွာန်တံ ဒၟံၚ်တန်တဴဂှ်တုဲ ပန်ဏာကဵုလွဟ်ဇၞော် (၂) မရောၚ် ဗော်သွးကရေၚ် ကေအေန်ယူ လလောၚ်ပ္တိတ်လဝ်ရ။
တမ်ဒပ် (ခမရ ၃) ကမ္မယှေန်ပၞာန် ပန်ဏာလွဟ်ဇၞော် (၂) မဂှ်ဝွံ ဒတုံခတိုဟ်အာလဝ် အပ္ဍဲကွာန် (ပဏ္ဍိကုန်း)၊ ဂကောံကွာန် (ကဒီပု) ရ။
ဟိုတ်နူလွဟ်ဇၞော်ဒတုံခတိုဟ်အာဂှ်တုဲ သမ္ဘာကိုဝ်ၚာ ဒဝ်ဇြေန်မာသိုဝ် အာယုက် (၄၁) သၞာံ၊ မနွံပဋိသန္ဓိကောန်ကၟာ (၇) ဂိတု၊ ဒၟံၚ်တန်တဴမံၚ် ပ္ဍဲကွာန် (ပဏ္ဍိကုန်း) ဂှ် ဒးကဝေက်လွဟ်ဇၞော်ချိုတ်အာတုဲ ကောန်ဝုတ်မၞုံအပ္ဍဲဗုၚ် (၂) တၠဂှ်လေဝ် လမျီုဒးအိုတ်အာကီု ကေအေန်ယူ ဂးရ။
တုဲပၠန် ကိုဝ်မံၚ်လေဝ် အာယုက် (၃၂) သၞာံ၊ ဒၟံၚ်တန်တဴ ပ္ဍဲကွာန် (ပဏ္ဍိကုန်း) ဂှ် လေဝ် ဒးအာဘဲဝပ်ရ။ ကောန်ဝုတ် မိသနေ အာယုက် (၁၁) သၞာံဂှ် ဒးဘဲလွဟ်ဇၞော်ချိုတ်အာတုဲ ကောန်ဝုတ် မိယျောန် အာယုက် (၅) သၞာံပၠန်ဂှ် ဒးအာဘဲဝပ်ကီုရ။
ဟိုတ်နူလွဟ်ဒတုံခတိုဟ်အာဂှ်ရ သ္ၚိဒၟံၚ်လ္ၚဵု တူပၟတ်လီုလာ်အာတုဲ ဂၠဴချိုတ်အာ (၂) ကီု ဂွံတီကေတ်ရ။
ဒပ်ကမ္မယှေန်ပၞာန်တံဝွံ ဟွံဒှ်ပေဲါဗ္တိုက်မွဲသာ် ပ္ဍဲကဵုကွာန်ညးဍုၚ်ကွာန်တံ ဒၟံၚ်တန်တဴမံၚ်ဂှ် ပန်ဗ္တိုက်ကဵုလွဟ်ဇၞော်တုဲ လမျီု ကေုာံ ဒြပ်ကသပ် ညးဍုၚ်ကွာန်ဒုဟ်ဟွံမွဲဂမၠိုၚ် ဒးဇီုကပိုက်အိုတ်လမျီု ဆောံလေၚ်ဒၟံၚ် အဆက်ဆက်ရောၚ် ကေအေန်ယူ လလောၚ်ပ္တိတ်လဝ်ရ။