အကြာဏံ ညးတာလျိုၚ်သေံကဆံၚ်လ္တူ သွက်ဂွံစှေ်လ္ၚတ်ဂေတ်ပယျဵုကျာ်ပိနွံတုဲ လ္ပာ်ဗၠာဲသၟိၚ်သေံတံ ဒစးဒုၚ်ပလေဝ်ပလေတ် ပတေၚ်လဝ်ဂီုကၠီုတုဲ ဒၞာဲပၞော်လုပ်တိတ် သၞေဟ်ကၚ် (ကျောၚ်းဂိတ်) ဂှ်လေဝ် ဗၞတ်ဗ္ၜတ်လဝ်အခိၚ်လုပ်တိတ်နွံရောၚ် ဂွံတီကေတ်ရ။
ပြဟ်ပြဟ်ဏံ ဒၞာဲပၞော်လုပ်တိတ် သၞဟ်ကၚ် (ကျောၚ်းဂိတ်) ဂှ် နူဂယး (၆) နာဍဳ ဒဵုစိုပ် (၁၀) နာဍဳ၊ တ္ၚဲစေၚ် (၂) နာဍဳ ဒဵုစိုပ် ဗ္တံ (၉) နာဍဳဟေၚ် ဗၠာဲသၟိၚ်သေံတံ ပံက်ကဵုလဝ်အခေါၚ်လုပ်တိတ်ရ။
မွဲဒမြိပ် ဒပ်ဗၠာဲသၟိၚ်သေံတံ ပတေၚ်လဝ်ဂီုကၠီု ပ္ဍဲကဵုဒၞာဲပၞော်လုပ်တိတ် သၞေဟ်ကၚ် (ကျောၚ်းဂိတ်) ဂှ် ကၟာတ်လဝ်အခိၚ်ပေၚ်ပေၚ်ဟွံသေၚ်တုဲ သွက်ညးဒေသကျာ်ပိ လ္ပာ်သြၚ်ဗၟာကီု၊ သၟာကမၠောန်ကောန်ဍုၚ်ဗၟာ ကၠောန်ဒၟံၚ်ကမၠောန် လ္ပာ်သြၚ်သေံကီု ဗၞတ်ဗ္ၜတ်ကဵုလဝ်အခိၚ် လုပ်တိတ်အာကၠုၚ်နွံဂှ်ရ ပရေၚ်ခက်ခုဲဟွံမွဲကွေံရောၚ် ညးဒေသကျာ်ပိမွဲတၠ ဟီုရ။
“ဆလအ်ပံက်ဂှ် ကေတ်ဟွံဒး၊ ခယျကေတ်တှေ် မၞိဟ်ဇၞော်ဍေံကၠုၚ်တုဲမှ ဍေံတံပံက်ဟာ၊ မိၚ်ဟီုမံၚ်ဂှ် ပ္ဍဲဂိတုဂျောန်ဏံရ တ္ၚဲလဵုရောဂှ် ပိုဲဟွံတီကၠးပုဟ်” သာ်ဝွံ ညးဒေသပယျဵုကျာ်ပိဂှ် ဆက်ဟီုရ။
ပ္ဍဲကဵုဒေသပယျဵုကျာ်ပိဂှ် ဇၟာပ်ပ်သၞာံ ဒးဆဵုဂဗ ဇီုကပိုက်ဒၟံၚ်ကဵု ပရေၚ်ကၟာတ်လဒဵုပယျဵု မွဲနှေံမွဲနှေံနွံတုဲ ညးဒေသပယျဵုတံ လအ်ဂွံတီပရူပရာမွဲမွဲသာ်ဂှ်မ္ဂး ဖေက်လကိုတ် ဂွိၚ်တဴဒၟံၚ်နွံရောၚ် ညးစုက်လုက်ကဵု သၟာကမၠောန် ကၠောန်ဒၟံၚ်ကမၠောန် လ္ပာ်သြၚ်သေံမွဲတၠ ဟီုရ။
အပ္ဍဲသၞာံ (၂၀၂၅) တုဲကၠုၚ်ဂှ်လေဝ် ဒၞာဲသၞေဟ်ကၚ် (ကျောၚ်းဂိတ်) ဂှ် ဗၠာဲသၟိၚ်သေံတံ ရပ်ဂွံဂဥုဲချေံကီု၊ မွဲဒမြိပ်ဂၠံၚ်ဍာန်ကမ္မရဳဂှ်လေဝ် ရပ်ဂွံဒၟံၚ် မၞိဟ်ကၠတ်လုပ်ဍုၚ် မွဲနှေံမွဲနှေံတုဲ လ္ပာ်သေံတံ ပတေၚ်ကၠုၚ်ဂီုကၠီု ကၟာတ်ကၠုၚ်လဝ် သၞေဟ်ကၚ်ပၞော်လုပ်တိတ် ဒေသပယျဵုဂမၠိုၚ်နွံရ။