ပ္ဍဲပွိုၚ်ဍုၚ်ကျာ်မြဟ်၊ တွဵုရးဍုၚ်မန်ဝွံ ဂကောံအုပ်ဓုပ်ကဵု ဂကောံရပ်လွဟ်အပ္ဍဲဒေသတံ ပံၚ်ကောံတုဲ သွက်ဂွံသၠဲပ္တိတ်ဝိုၚ်ဝေၚ်ဂှ် ဗက်ရာန်ကေတ်မံၚ် ဂအာၚ်တိညးဍုၚ်ကွာန်တံရောၚ် အတိုၚ်ညးဒေသကျာ်မြဟ်တံ ဟီုဂးလဝ်ဂှ် ဂွံတီကေတ်ရ။
ဂကောံရပ်လွဟ်ဒပ်ပၞာန်ကရေၚ်ဒတုဲဖဵုဒဳမဝ်ရေဇြဳ (DKBA) အပ္ဍဲဒေသဂှ်ဝွံ သၞာံတုဲကၠုၚ်ဏံ ရာန်ကေတ်လဝ်ဂအာၚ်တိ ဇမၠိၚ် (၁၀၀) ပေ၊ အနာံ (၄၀) ပေ ပ္ဍဲကွာန် (ဖက်တေးကုန်း) နကဵုၚုဟ်မးကိုဋ်ပိလ္ၚီပန်ကၠံပြၚ်တုဲ အခိၚ်လၟုဟ်ဏံ ပံက်လဝ်ဝိုၚ်ဝေၚ်ရောၚ် ညးဒေသ (ဖက်တေးကုန်း) မွဲတၠ ဟီုရ။
တုပ်သာ်ဂှ်ကီု ဂအာၚ်တိမၞုံမ္ၚးကွာန်ကအ်ပလိုၚ်၊ ပွိုၚ်ဍုၚ်ကျာ်မြဟ်ဂှ်လေဝ် ဗက်ရာန်ကေတ်လဝ်တုဲ သ္ပဗီုပြၚ်သၞေဟ်ကၚ်စၟဳစၟတ်တုဲ ပံက်လဝ်ဝိုၚ်ဝေၚ်္ၚၚ်လံၚ်သြန်နွံရ။
“ဂအာၚ်တိရာန်လဝ်ဂှ် သိုၚ်ခၞံလဝ်ဗီုကံက်သၞေဟ်ကၚ်တုဲတှေ် အပ္ဍဲဂှ်ဂှ် သိုၚ်လဝ်စမြိုၚ် ဗလးဗြဲ ဗလးကျာရ။ ပ္ဍဲကဵုစမြိုၚ်ဂှ်တှေ် ပံက်လဝ်ဝိုၚ်ဝေၚ်ရ။ သီုဗ္တံသီုတ္ၚဲ ညးဝေၚ်နွံမံၚ်ရ။ ညးမွဲမှ ဟွံဂံၚ်ဟီုကဵုဍေံတံပုဟ်” သာ်ဝွံ ဟီုရ။
ပ္ဍဲကဵုစမြိုၚ်သိုၚ်ခၞံလဝ်လ္တူဂအာၚ်တိရာန်လဝ်ဂှ်ဝွံ ကမၠောန်ဝေၚ်္ၚၚ်လံၚ်သြန်ဂမၠိုၚ် ဂေတ်ဒၟံၚ်ဗွဲမစှေ်ကဵုနဲကဲတုဲ ပရေၚ်မၚ်မွဲဂီုကၠီုလေဝ်နွံမံၚ်ရောၚ် ညးဆက်ဟီုလဝ်ရ။
ဆေၚ်စပ်ကဵုအကာဲအရာ ပံက်လဝ်ဝိုၚ်ဝေၚ်တုဲ ပ္တိုန်ထ္ၜးကုညးစၞးကၠတ်ထဝ် အပ္ဍဲဒေသကီုလေဝ် ယၚ်ဝိုၚ်ဝေၚ်ဂမၠိုၚ်ဂှ်ဝွံ ညးတာလျိုၚ်လ္ပာ်ပၞာန်ကဵု ဂကောံရပ်လွဟ်ကောန်ဍုၚ်အရၚ် မရပ်လဝ်ဂၠံၚ်တရဴ ပရေၚ်ၜိုဟ်လလမ်တံ က္ဍိုက်က္ဍိုပ်ကၠောန်သ္ပမံၚ်ဂှ်ရ ကိစ္စဏံဂှ် ကေတ်လျိုၚ်ပသောၚ်ကဵုဟွံမာန်ရဂှ်လေဝ် ညးစၞးကၠတ်ထဝ်ဂမၠိုၚ်တံ ဟီုရ။
ညးဗြဴစုက်လုက်ကဵု ညးစၞးကၠတ်ထဝ်တွဵုရး နူဇြပ်ဗုမွဲတၠဂှ် “ဆေၚ်စပ်ကဵုဝိုၚ်ဝေၚ်ဂှ်တှေ် မၞိဟ်တေၚ်နွံမံၚ်ရ။ ဆဂး အတိုၚ်အမာတ်ကၠတ်ထဝ်တံဟီုဂှ်တှေ် ဝိုၚ်ဝေၚ်တဏံဂှ် ညးတံပသောၚ်ကဵုဟွံမာန်ပုဟ်။ ၜိုတ်ကဵုပရိုၚ်ကဵု(နယ်လုံ)ဟေၚ် ကၠောန်ကဵုမာန်ရ” သာ်ဝွံ ညးဟီုရ။
နကဵုအဆက်ဖဵုလက္ကရဴဝိုၚ်ဝေၚ်ဂမၠိုၚ်ဂှ်မ္ဂး ပရေၚ်ကၠတ်ဂၠံက်၊ ပရေၚ်ကြမ်ကြ ကေုာံ ပရေၚ်ပၠံၚ်ၜးဂမၠိုၚ် ဂၠိုၚ်တိုန်ကၠုၚ်တုဲ ပရေၚ်ချဳဓရာၚ်အာကၠုၚ်လၟေၚ်တ္ၚဲ ညးဒေသမန်ဂမၠိုၚ်ဂှ်လေဝ် အကာဲအရာပရေၚ်ဂီုကၠီုဟွံမွဲ စိုပ်ကၠုၚ်ဒၟံၚ်ရောၚ် ဂွံတီကေတ်ရ။
ဟိုတ်ဂှ်ရ ဝိုၚ်ဝေၚ်္ၚၚ်လံၚ်သြန် ပံက်လဝ်လၟုဟ်ဏံဂမၠိုၚ်ဂှ် ညးတာလျိုၚ်မဆေၚ်စပ်တံ သွက်ဂွံရပ်စပ်ပသောၚ်ကဵု ဗွဲမစှေ်ကဵုနဲကဲဂှ် ညးဒေသမန်တံ နွံပၟိက်ဒၟံၚ်ရ။