ဂိတုဂျောန် စၟတ်တ္ၚဲ (၁၀) တုဲကၠုၚ်ဏအ်ဝွံ အလဵုအသဳသေံကဵု ဂကောံဓရ်ဆာန်ဍူ ရီုဗၚ်မၞိဟ်ဂၠးတိ UNHCR တအ် သဳကၠဳချပ်ဇန်လဝ် သ္ဂောံကၠောန်ပ္တိတ်ကဵု လိက်တၞးကာဒ်စၟတ်သမ္တီ ကုညးဒဒိုက်ကောန်ဍုၚ်ဗၟာ ဂြိပ်ပါဲစိုပ်လ္ပါ်ပယျဵုတိဍာ်သေံဂှ် နွံကၠုၚ်လဝ်တုဲ ပြဟ်ဟ်ဏအ် ညးတအ် စပ္တိတ်ကဵုမံၚ်ဣရရောၚ် ဂွံတီကေတ်ရ။
ပြဟ်ဟ်ဏအ်ဝွံ ဂကောံဓရ်ဆာန်ဍူရီုဗၚ်မၞိဟ်ဂၠးတိ UNHCR တအ် ပံၚ်တောဲ ကုအလဵုအသဳသေံတအ်တုဲ ညးတအ် စအာအစဳဇန်ကမၠောန် သွက်ညးဒဒိုက်ကောန်ဍုၚ်ဗၟာ နွံတန်တဴမံၚ် လ္ပါ်ကၟိန်ဍုၚ်သေံ တွဵုရးရာတ်ချၜုရဳ၊ ဒၞါဲကဵုခဒမ်န်ထဟေန် လၟိဟ်ၜိုတ် (၃၀၀) တၠတအ်ဂှ် စကၠောန်ပတိတ်ကဵုမံၚ် တၞးကာဒ်စၟတ်သမ္တီ ဗွဲမလုပ်သၞောဝ်နွံရ။
ကောန်ဍုၚ်ဗၟာ ညးဂြိပ်ဒဴမံၚ်ပၞာန် လုပ်စိုပ်မံၚ်လ္ပါ်ပယျဵုတိဍာ်သေံတအ်ဂမၠိုၚ်ဂှ်ဝွံ သ္ဂောံဂယိုၚ်အာလမျီု ဂွံကၠောန်အာကမၠောန်ဌာန်ဂတ ဗွဲမလုပ်သၞောဝ်မာန် ရန်တၟအ်သာ်ဂှ်တုဲ အလဵုအသဳသေံကဵု ဂကောံဓရ်ဆာန်ဍူရီုဗၚ်မၞိဟ်ဂၠးတိ UNHCR တအ် သဳကၠဳလဝ် သွက်ဂွံကၠောန်အာကဵု တၞးကာဒ်စၟတ်သမ္တီသာ်ဏအ်ရောၚ်။
ညးဒဒိုက်ကောန်ဍုၚ်ဗၟာတဏအ်ဝွံ ညံၚ်သ္ဂောံကၠောန်အာကမၠောန် ဗွဲမလုပ်သၞောဝ်မာန်ဂှ် အလဵုအသဳသေံတအ် ကၠောန်ပတိတ်အာကဵု လိက်တၞးကာဒ်စၟတ်သမ္တီကဵု လိက်အုပ်ဗါန်၊ လိက်တၞးပရေၚ်ထတ်ယုက် မနွံပၟိက်နာနာသာ်ဂှ်တုဲ ပ္ဍဲကဵုဂှ်မ္ဂး အာယုက်ပါမေတ် အခေါၚ်ဂွံကၠောန်ကမၠောန် ပွိုၚ် (၁) သၞာံဂှ်လေဝ် ကၠောန်ပတိတ်ကဵုလဝ်ကီုရောၚ်။
အတိုၚ်ဂကောံဓရ်ဆာန်ဍူရီုဗၚ်မၞိဟ်ဂၠးတိ UNHCR တအ် ကံက်ဂွံလဝ်စရၚ်မၞိဟ်ဂမၠိုၚ်ဂှ်ဝွံ ညးဒဒိုက်ကောန်ဍုၚ်ဗၟာဂမၠိုၚ် လုပ်စိုပ်ကၠောန်မံၚ်ကမၠောန်ပ္ဍဲဍုၚ်သေံဂှ် နွံမံၚ် (၅,၅၀၀) တၠပြၚ်ရောၚ် လလောၚ်ပတိတ်ကၠုၚ်လဝ်ကီုရ။
ကိစ္စဏအ်ဝွံ တုဲကၠုၚ်ပ္ဍဲသၞာံ (၂၀၂၅) ဂိတုအဝ်ဂေတ်တေံရ နကဵုအလဵုအသဳသေံတအ် သ္ပကၠုၚ်လဝ်ဒ္တန်နွံတုဲ ဒှ်အထံက်အရီုကဵု အခေါၚ်အရာမၞိဟ်တအ်မာန်ရောၚ် အလဵုအသဳသေံတအ် ဂးကၠုၚ်လဝ်ရ။
နကဵုကၟိန်ဍုၚ်သေံဝွံ ကဵုကၠုၚ်မံၚ်အရီုအဗၚ် ကုညးပါဲဒဴပၞာန်ကောန်ဍုၚ်ဗၟာ လုပ်ကၠုၚ်လ္ပါ်တိဍာ်ညးတအ် အဆက်က်နွံတုဲ ဟိုတ်နူစွံဂရုဏာဓရ်ဆာန်ဍူမၞိဟ်တုဲ ကဵုကၠုၚ်မံၚ်အရီုဗၚ်သာ်ဏအ်ဂှ်ရ နကဵုဂကောံဓရ်ဆာန်ဍူရီုဗၚ်မၞိဟ်ဂၠးတိ UNHCR တအ် ပံၚ်တောဲကုအလဵုအသဳသေံတုဲ စဳဇန်သဳကၠဳကၠုၚ်ကိစ္စဏအ်ရောၚ် ဂွံတီကေတ်ရ။