ဂလာန်ညးမဒါန်လိက်
ကၠတ်ထဝ်တွဵုရးဍုၚ်မန်ဝွံ သွက်ဂွံဒုၚ်တဲပသောၚ်ကဵု တၚ်တေၚ်စိုပ်ဂမၠိုၚ် ကေုာံ အရာညးဍုၚ်ကွာန်တံ မသ္ဒးဂိလဝ်ဂှ် ဂးတုဲ ဒက်ပ္တန်လဝ် “ကမ္မတဳလ္ၚတ်သ္ၚဳဂၠိပ် လိက်တေၚ်စိုပ်ကဵု လိက်ဒုၚ်ဂုန်ဆာန်ဍူ၊ လိက်ပ္တိုန်ထ္ၜး ကေုာံ ကိစ္စနာနာ” မွဲရ။
လဂံါဇိုၚ်ဏံဝွံ သွက်ညးဍုၚ်ကွာန် မနွံသၟဝ်ဒဒှ်ဟွံဗဗွဲဓဝ်ကဵု သ္ဒးဒုၚ်ပ္ဍဵုပ္ဍိုက် ပ္ဍဲစက်ယန်အုပ်ဓုပ်ပၞာန်တံဂှ် နူကၠတ်ထဝ်ထဝ်မွဲတဆံၚ် ဂၠံၚ်ဍာန်သွက်ဂွံဓမံက်ပ္တိတ် ရမျာၚ်ဇကုမွဲဂှ် ဒှ်ကၠုၚ်ဍာံရ။ အကြာညးဍုၚ်ကွာန်ကဵု ကၠတ်ထဝ် ဖန်ဗဒှ်ဏာ ပရေၚ်အဆက်မွဲဂှ် ဒးဒုၚ်တၠုၚ်ရ။
ၜိုန်ဂှ်ကီုလေဝ် ပ္ဍဲကဵုဗလးတိတ္ၚဲဏံဝွံ တၚ်ခက်ခုဲညးဍုၚ်ကွာန်တံ မဒးဆဵုဂဗဒၟံၚ်ဂမၠိုၚ်ကီု၊ တၚ်ဗၞတ်ဗ္ၜတ် အကာဲအရာပရေၚ်ဍုၚ်ကွာန် လၟုဟ်ဏံဂမၠိုၚ်ကီု ယဝ်က္လေၚ်စၟဳစၟတ်ရံၚ်မ္ဂး ကမ္မတဳဏံဝွံ ပြဒ္ဒညာညးဍုၚ်ကွာန်ဂမၠိုၚ်ဂှ် ပသောၚ်မာန်ဍာံဟာ၊ ဟွံသေၚ်မ္ဂး နကဵုကမ္မတဳထ္ၜးအယောၚ်အလာမွဲဟေၚ် ဂၠံၚ်ဍာန်အိုတ်အာဟာဟီုဂှ် ဒးမၚ်ရံၚ်ရ။
ပြဒ္ဒညာဒးဒုၚ်သီတိကၠအ် အပ္ဍဲတွဵုရး၊ ပရေၚ်ဗက်စမုက် (ဗက်စအဂတိ) နူညးတာလျိုၚ်အဆံၚ်ဆံၚ်တံကီု သီုပြဒ္ဒညာစကာအဝဵု ဟွံစှေ်ကဵုဗဗွဲဓဝ်ဂမၠိုၚ်ဂှ် ညးဍုၚ်ကွာန်တံ ဒးဒုၚ်စသိုၚ် သ္ဒးဒုၚ်ဂိကၠုၚ်လဝ် သၞာံလအ်လကာဖာရ။
မွဲအခိၚ်ဓဝ် နူဒပ်ပၞာန် ပြံၚ်လှာဲအုပ်ဓုပ်မံၚ် ကၟိန်ဍုၚ်တ္ၚဲဏံဂှ် ပွမပကောံကောန်သ္ဂံၚ် ဗွဲအဓမ္မကီု၊ ဇၟာပ်တ္ၚဲ ဖံက်ပကဝ်ဒၟံၚ်အခေါၚ်အရာမၞိဟ် လ္တူညးဍုၚ်ကွာန်တံကီုဂှ် ယဝ်တေၚ်စိုပ်ကၠုၚ်မ္ဂး နူကမ္မတဳတေၚ်စိုပ်တံ ရပ်စပ်ညးလုတ်လောန်ဒုဟ်ကဵု က္ဍိုပ်သ္ကိုပ်ဒပ်ပၞာန်တံမာန်ဟာဂှ် ဒှ်အရာဒးပ္တိတ်သၟာန်ရ။
ဟိုတ်ဂှ်ရ အကာဲအရာလၟုဟ်ဝွံ ကမ္မတဳလိက်တေၚ်စိုပ်ကၠတ်ထဝ်မွဲ လမျီုလုပ်ကၠုၚ်ဏံဂှ် ၜိုန်ခိုဟ်ကီုလေဝ် ကမ္မတဳဏံ အခေါၚ်ကၠောန်ဂလိုၚ်လဵုနွံရောဟီုဂှ် ဒှ်အရာဒးပ္တိတ်တၚ်သၟာန်အဓိကရ။
ကမ္မတဳဝွံ ဂွံဒုၚ်ကေတ်တဲလိက်တေၚ်စိုပ်ဂမၠိုၚ်တုဲ ပွမချူလိက်ဒုၚ်စဳရေၚ်ကီု၊ ဗီုကဵုတၚ်ပ္တိုန်ထ္ၜး အဆံၚ်ကဵုကသပ်ဟေၚ် အခေါၚ်ကၠောန်နွံတုဲ ကုညးတာလျိုၚ်အုပ်ဓုပ် လုတ်လောန်ဒုဟ်ကဵု ဂကောံဒပ်ဗၠာဲသၟိၚ်တံဂှ် ကေတ်အရေဝ်ဗွဲမစိုပ်တရဴဟွံမာန်မ္ဂး လိက်တေၚ်စိုပ် ညးဍုၚ်ကွာန်ဂမၠိုၚ်တံဂှ်ဝွံ ဂၠံၚ်အိုတ်အာ ပ္ဍဲနထၟိက်စက္ခူကၠတ်ထဝ်ရ။
သၟာၚ်နူဂှ်ပၠန် အတိုၚ်အကာဲအရာဂီုကၠီု အပ္ဍဲဒေသလၟုဟ်ဏံမ္ဂး သွက်ဘဲအန္တရာဲအဆက်လက္ကရဴ ကေုာံ ပရေၚ်ဂီုကၠီု ညးဍုၚ်ကွာန်တေၚ်စိုပ်လိက် အရာသ္ဒးဒုၚ်ဂိလဝ် ဗွဲမဂံၚ်သကာတံဂှ် နကဵုကမ္မတဳတံ သာ်လဵုကဵုပရေၚ်စဵုဒၞာ ကေုာံ ဗီုလဵုကဵုတၚ်ဒုၚ်လျိုၚ်မာန်ရောဂှ်လေဝ် ဒးလးထ္ၜးကဵု ဗွဲမကၠးဖ္ဍးရ။
နကဵုကမ္မတဳလိက်တေၚ်စိုပ်တံဝွံ ယဝ်မိက်ဂွံဓဝ်ပတှေ် ညးဍုၚ်ကွာန်တံ ဗွဲမဍာံပြမ္ဂး ၜိုတ်ဒုၚ်တဲလိက်တေၚ်စိုပ်ဂှ်သၟး ဟွံသေၚ်တုဲ ၜိုတ်လဵုပသောၚ်ကဵုဗွဲမစိုပ်တရဴမာန်ဂှ် ဒးနွံကဵုသၞောတ်ဒုၚ်စဳရေၚ် ဇရေၚ်ညးဍုၚ်ကွာန် ဗွဲမကၠးဖ္ဍးမွဲရ။
နကဵုညးစၞးကၠတ်ထဝ်ဂကောံကမ္မတဳတံဂှ်လေဝ် ပွမဒးဖေက်လကိုတ် ဂကောံညးတာလျိုၚ်တံ ဟွံမွဲမွဲသာ် ဒးဒတူလိုၚ်လ္ပာ်ညးဍုၚ်ကွာန်တံဂံၚ်ဂံၚ်တုဲ ဒးထ္ၜးသက်သဳ သတ္တိ ကေုာံ ကတိကဝတ် ဂံၚ်ဓမံက်ပ္တိတ်ဓဝ်ဍာံ နတဲရ။ သွဟ်နတဲ ပွမထိၚ်ဒဝ်ပါ်ပဲါ ညးအုပ်ဓုပ်ဂမၠိုၚ်မာန်ဂှ်ဟေၚ် ညးဍုၚ်ကွာန်တံ မၚ်စၟဳဒၟံၚ်အိုတ်ရ။
နကဵုကမ္မတဳတံဝွံ ၜိုတ်ထ္ၜးအယောၚ်အလာသၟးဟွံသေၚ်တုဲ ဗွဲမပြဟ် ညံၚ်ဂွံထ္ၜးသက်သဳ နဒဒှ် ဇြဟတ် ညးဍုၚ်ကွာန်ဂွံပတှေ်စ ဗွဲမဍာံပြရောၚ်ဂှ် မဒးဆဝ်မ္ၚုဟ်ဖ္တိုက်ဖၟောဝ်ဏာ ဗွဲမဇြိုဟ်နက်ရ။