ပ္ဍဲကဵုဇရေၚ်ညးဒေသဖာလိန်၊ ပွိုၚ်ဍုၚ်ရေဝ်၊ တွဵုရးဍုၚ်မန်ဝွံ နူဂကောံရပ်လွဟ် အပ္ဍဲဒေသမွဲဂကောံ အာတ်ကေတ်မံၚ်သြန်ဗွဲအဓမ္မနွံရောၚ် ဂွံတီကေတ် နူတမ်ရိုဟ်ပရိုၚ်အပ္ဍဲဒေသတံရ။
အပ္ဍဲဂိတုဂျောန်မံက်ဏံဝွံ ညးဒေသဖာလိန် အာကၠုၚ်လ္ပာ်ကၠအ်ဂူတံဂှ် နူကဵုဂကောံရပ်လွဟ်ဟွံတီယၟုမွဲဂကောံ သွက်ဂွံရာန်လွဟ်ဂးတုဲ အာတ်မံၚ်သြန်နွံရ။
ကိစ္စအာတ်သြန်ကီု သွက်ဂွံကဵုသြန် ဗၞတ် (၅၀) ကိုဋ်ဂှ်ကီု ပၞုက်လဝ်ညိဂှ် ဟီုဂးလဝ်ရောၚ် ညးစုက်လုက်ကဵု ညးဆဵုဂဗနမတ်မွဲတၠဂှ် ဟီုရ။
“ဍေံတံဂှ် ကဵုကယျိုၚ်အရာပ်ဏောၚ်ဟီုတှေ် နူဒပ်ပၞာန်ဟာ၊ ဂကောံပၠန်ဂတးဟာဂှ် ဟွံတီချိုတ်ပၠိုတ်ပုဟ်။ ဟီုအရေဝ်ဗၟာရ။ ဍေံတံ သွက်ဂွံရာန်လွဟ်ဂှ် ဂွံကဵုထံက်ပၚ်လေဝ်။ အေဟီုဗီုဂှ်ရ” သာ်ဝွံ ညးဟီုရ။
အခိၚ်လၟုဟ်ဏံ ကိစ္စအာတ်သြန်ဂှ်ဝွံ သွက်ဂွံတေၚ်ဗ္စိုပ်ကဵု ညးတာလျိုၚ်ပရေၚ်အုပ်ဓုပ်ဒေသတံဂှ် ဒးဆဵုဂဗမံၚ်ကဵု အကာဲအရာဝါတ်ဂါတ်ရောၚ် ဂွံတီကေတ်ရ။
“ဍေံတံဂှ်လေဝ် ကိစ္စဏံဂှ် ကဵုသ္ကိုပ်အုပ်ဓုပ်ကီု ကဵုညးမွဲကီု လ္ပဟီုညိဂှ် ကၟာတ်လဝ်ရ။ အရေဝ်ဂှ်တှေ် ဟီုခိုဟ်ခိုဟ်မိုဟ်မိုဟ်ရ။ ဗီုကဵုဘပဠဂှ် ဟွံမွဲပုဟ်။ ၜိုတ်ဏံဟေၚ်ရ” သာ်ဝွံ ညးထပ်ဟီုလဝ်ရ။
အပ္ဍဲတ္ၚဲအကြာတဏံဝွံ ညးဒေသဖာလိန်ဂမၠိုၚ် ချဳဓရာၚ်အာကၠုၚ်မ္ဂး ဒးစွံသတိဇၞော်ဇၞော်တုဲ ပရေၚ်ဖေက်လကိုတ်တံနွံမံၚ်ရောၚ် ဂွံတီကေတ်ရ။
စပ္တံနူသၞာံ (၂၀၂၅) မံက်တေံတုဲ လ္ပာ်ကွာန်ဒူရာ၊ ဂူဂတဵု၊ ပလိုၚ်သီ၊ သၞေဟ်ဇၞူ၊ သာဲဂရာံ၊ အၚ်ဒၚ် ဒေသဖာလိန်၊ ပွိုၚ်ဍုၚ်ရေဝ်ဂှ် ဒပ်ကမ္မယှေန်ပၞာန်ကီု ဂကောံရပ်လွဟ်အပ္ဍဲဒေသတံကီု ကၠုၚ်စိုပ်ဒၟံၚ်မွဲနှေံမွဲနှေံတုဲ အာကၠုၚ်ချဳဓရာၚ်မံၚ်ရောၚ် ဂးရ။
ဟိုတ်ဂှ်ရ ဆေၚ်စပ်ကဵုပရူဒဒှ်ဏံတုဲ နူဂကောံရပ်လွဟ်အလဵု ကၠောန်သ္ပမံၚ်ဂှ် ဟီုခယျဝါတ်မံၚ်ရောၚ် ညးဒေသတံ ဟီုဂးလဝ်ရ။