ကရောၚ်ပၞာန်ကမ္မယှေန်ပၞာန် ဗိုလ်ဗိက္ဍိုက်က္ဍိုပ် လုပ်စိုပ်ကၠုၚ် အပ္ဍဲတိဍာ် ဒပ်စဵုဒၞာညးဍုၚ်ကွာန် RDF ထိၚ်ဒဝ်၊ ပ္ဍဲခရိုၚ်ဗိက်၊ ပယျဵုသေံဗၟာဂှ် ဒးဒုၚ်ဗ္တိုက်တုဲ အဆံၚ်ဗိုလ်ပါလုပ်ကီု သီုဖအိုတ် ပြဟ်လလုဲအာ (၉) တၠ၊ ဒးအာဘဲဝပ် ၜိုတ် (၂၀) တၠနွံရောၚ် ဂွံတီကေတ် နူဒပ်စဵုဒၞာညးဍုၚ်ကွာန်ရာမညရ။
ဒပ်ဒဳကေဗဳအေ ဗိုလ်ဗိက္ဍိုက်က္ဍိုပ်၊ ဂကောံပၞာန်ကွာန်ရးတၞၚ်သဳ ကေုာံ ကရောၚ်ပၞာန်ကမ္မယှေန်ပၞာန် သီုဖအိုတ် (၃) ကရောၚ်ပၞာန်ဂှ်ဝွံ ဂိတုဂျောန် စၟတ်တ္ၚဲ (၁၃)၊ အခိၚ်လဒေါဝ်တ္ၚဲ ၜိုတ် (၁၂) နာဍဳဂှ် လုပ်စိုပ်ကၠုၚ် အပ္ဍဲတိဍာ် ဒပ်စဵုဒၞာညးဍုၚ်ကွာန်ရာမည RDF ထိၚ်ဒဝ်ဂှ်ရ။
ကရောၚ်ပၞာန် (၃) ကရောၚ်ပၞာန်ဂှ် ဇြဟတ်နွံ (၇၀) ပြၚ်တုဲ အဃောကၠောန်သ္ပပြံၚ်လှာဲဒပ် နူကွာန်အာဲမန်ဒယာ(အိုၚ်းမွန်သာယာ) ဇရေၚ်တမ်ဒပ် (ရတနာပုံ) ဂှ် အတိုၚ်ဒပ်စဵုဒၞာ ညးဍုၚ်ကွာန်ရာမည ဂွံလဝ်ပရိုၚ်ဂှ်ရ မၚ်ပန်ပှော်လဝ်ရောၚ် ညးတာလျိုၚ်ဂကောံ နာဲဂြၚ်ပိ ဟီုကဵုဌာန်ပရိုၚ်ဗၠးၜးမန် IMNA ရ။
“ဂကောံဗိုလ်ဗိ ဇြဟတ်ၜိုတ် (၄၀) ဂှ် ကၠုၚ်မံၚ်ဂတရ။ လက္ကရဴဂှ်တှေ် ဂကောံပၞာန်ကွာန်တံ၊ ဂကောံကမ္မယှေန်ပၞာန်တံ ဗက်ကၠုၚ်ရ။ ပိုဲတံဂှ် ပ္ဍဲကဵုသ္ၚောဲခြာ ၜိုတ် (၁၀) ပေဂှ် မၚ်မံၚ်ဟတုဲဟတုဲရ။ ချိၚ်ကြပ်ကြပ်တုဲ ဂွံပန်တှေ် ချိုတ် (၉) တၠရ။ ဒးဘဲဝပ်ဂှ်တှေ် ၜိုတ် (၂၀) ပြၚ်နွံရ” သာ်ဝွံ ညးဟီုရ။
ပရေၚ်ပန်ပှော်ဂှ်ဝွံ ကတဵုဒှ်အာ ပွိုၚ် (၄) နာဍဳပြၚ်တုဲ ကောန်သ္ဂံၚ် လ္ပာ်ဒပ်စဵုဒၞာညးဍုၚ်ကွာန်ရာမည ဒးအာဘဲဝပ်မွဲတၠကီုလေဝ် က္လေၚ်ဆုတ်တိတ်အာ ဒၞာဲဗၠးဘဲတေံမာန် ဂးရ။
ဂကောံကမ္မယှေန်ပၞာန် ဒးဘဲချိုတ်ဂျိုၚ်ဂၠိုၚ်ဂှ်ဝွံ အဃောဂိုတ်ဂ္စာန် သ္ဂောံလုပ်စိုပ် ဂၠံၚ်ဍာန်ဒပ်စဵုဒၞာညးဍုၚ်ကွာန်ရာမည ဆုတ်တိတ်အာဂှ် ဟိုတ်နူလိုန်ဒးမာၚ်တိုပ်တိခတိုဟ်ဂှ်ရ ဒးက္လေၚ်ဆုတ်တိတ်အာရောၚ် ဂးရ။
“သွက်ဂွံဗက်ဂၠံၚ်ဍာန်ပိုဲဆုတ်တိတ်ဂှ် ဂိုတ်ဂ္စာန်ရ။ ဆဂး အခိၚ်ဍေံတံဗက်ကၠုၚ်ဂှ် လိုန်ဒးမာၚ်တိုပ်တိခတိုဟ်အာဂှ်ရ က္လေၚ်ဆုတ်အာပၠန်ရ။ အဃောပန်ဂှ်တှေ် ဂကောံလဵုပန်ဟီုဂှ် ဍေံတံ ဟွံတီပုဟ်။ တ္ၚဲဏံမှ ဂွံတီကေတ် ဒပ်စဵုဒၞာညးဍုၚ်ကွာန်ရာမညရ” သာ်ဝွံ နာဲဂြၚ်ပိ ဟီုရ။
ညးဒးဘဲဝပ် လ္ပာ်ကမ္မယှေန်ပၞာန်တံဂှ် ဒုၚ်လွဳလွတ်မံၚ် ပ္ဍဲရုၚ်ဂဥုဲလ္ပာ်သြၚ်သေံတုဲ ဂကောံပၞာန်ကွာန် (၂၀) တၠ ဖေက်လကိုတ်ဂြိပ်တိတ်နူပေဲါဗ္တိုက်ဂှ် ရပ်ထိၚ်လဝ် ပ္ဍဲအချုက်ထံၚ် တမ်ဒပ် (ရတနာပုံ) ဂှ်ရောၚ် ဂွံတီကေတ်ရ။
ဒပ်စဵုဒၞာညးဍုၚ်ကွာန်ရာမည RDF ဝွံ နကဵုတၚ်ပတဝ်က္ဍိုပ် (၅) တၚ် မပ္တံသၞောတ်တၠအဝဵုပၞာန်ဂွံအိုတ်ကၠေံ၊ အခေါၚ်ကံကုသဵုမန် မန်ဂွံဖန်ကေတ်ကေတ် ကေုာံ သ္ဂောံကလိဂွံပရေၚ်တုပ်သၟဟ်ဂှ်ရ ဗွဲကြဴနူပၞာန်သီအဝဵုတုဲ ပ္ဍဲသၞာံ (၂၀၂၂) ဂှ် စဒက်ပ္တန်လဝ်ရောၚ် ဂွံတီကေတ်ရ။