ကောန်သ္ဂံၚ်ဗော်ဍုၚ်မန်တၟိ နူဗဒိုပ်ဍုၚ်တြေံ၊ ပွိုၚ်ဍုၚ်ရေဝ်၊ တွဵုရးဍုၚ်မန်ဂှ် ပ္ဍဲဂိတုဂျောန် စၟတ်တ္ၚဲ (၂၂) တုဲကၠုၚ်ဏံ ဒပ်ကမ္မယှေန်ပၞာန်တံ ရပ်ကော်ဏာလဝ်နွံရောၚ် တမ်ရိုဟ်ပရိုၚ်အပ္ဍဲဒေသတံ ဟီုရ။
ကရောၚ်ပၞာန်ကမ္မယှေန်ပၞာန် မနွံဇြဟတ်ၜိုတ် (၁၀၀) နူတမ်ဒပ်တိုက် စၟတ် (၅၈၈)၊ ဖျေံသဇိုၚ်ကွာန်တၟံကၞေၚ်၊ ပွိုၚ်ဍုၚ်ရေဝ်ဂှ် လုပ်စိုပ်ရပ်ဏာလဝ်ရောၚ် ကောန်သ္ဂံၚ်ပၠန်ဂတး မချဳဓရာၚ်ဒၟံၚ် ပ္ဍဲပွဳဗွိုၚ်ပွိုၚ်ဍုၚ်ရေဝ်မွဲတၠဂှ် ဟီုရ။
“အေဒၞာဲဂှ်ဂှ် သၞေဟ်ကၚ်စၟဳစၟတ်ဗော်ဍုၚ်မန်တၟိ ဟွံသေၚ်ပုဟ်၊ ကော်မံၚ် ဗဒိုပ်ဍုၚ်တြေံ ဗဒိုပ်ဗော်ဍုၚ်မန်တၟိရ။ လၟုဟ် ဍေံတံ သီလဝ်ရ။ ကောန်သ္ဂံၚ်နွံမံၚ် ပ္ဍဲဒၞာဲဂှ်ဂှ်လေဝ် ဍေံတံ ရပ်ဏာနွံရ။ ရပ်ဏာ ဂလိုၚ်လဵုရောဟီုဂှ်တှေ် ဟွံတီဏီပုဟ်” သာ်ဝွံ ဟီုရ။
ကောန်သ္ဂံၚ်ဗော်ဍုၚ်မန်တၟိ ကော်ရပ်ဏာလဝ်ဂှ် ထိၚ်ဒဝ်လဝ် ပ္ဍဲတမ်ဒပ်တိုက် စၟတ် (၅၈၈)၊ ဖျေံသဇိုၚ်တၟံကၞေၚ်ဂှ်ရောၚ် ဂွံတီကေတ်ရ။
မွဲကရောံကဵု ကောန်သ္ဂံၚ် (၃) တၠဂှ် သီုရပ်ဏာလွဟ် (၇) ဇကိုအ်ကီု နူဇာနှိက်ပရေၚ်မၞိဟ် ဟီုဂးမံၚ်ကီုလေဝ် နူဌာန်ပရိုၚ်ဗၠးၜးမန် IMNA ဆက်ဂၠိုက်ဂၠာဲ သွက်သ္ဂောံသ္ပဒတန်ဖိုဟ်ရ။
ပ္ဍဲဗဒဲါပွဳဗွိုၚ်ကွာန်တၟံကၞေၚ်ဂှ် ကောန်သ္ဂံၚ်ဒပ်ပၠန်ဂတးမန်ဂမၠိုၚ်လေဝ် ချဳဓရာၚ်အာကၠုၚ်မံၚ်ဂှ်ရ ရပ်စပ်ဗၠေတ်မှာ ဒှ်မာန်ရဂှ်လေဝ် ညးစုက်လုက်ကဵု ဗော်ဍုၚ်မန်တၟိမွဲတၠ ဟီုရ။
“ထေၚ်ကေတ်ရဲအေဒဳတုဲ ကၠုၚ်ရပ်ဏာ ကောန်သ္ဂံၚ်နွံဂှ်ဏောၚ် ဂွံတီကေတ်ရ။ ပိုဲတံလေဝ် ဟွံဂွံအဆက်စၠောံကဵု မၞိဟ်လ္တူတံဏီတှေ် ဟွံတီချိုတ်ချိုတ်ပၠိုတ်ပၠိုတ်ဏီပုဟ်။ လၟုဟ် က္လေၚ်ဗၠးကၠုၚ်ယျဟာ၊ ဆက်ထိၚ်လဝ်ဖိုဟ်ဟာဂှ်လေဝ် ဂၠိုက်ဂၠာဲမံၚ်ဖိုဟ်” သာ်ဝွံ ဟီုရ။
သွက်ဂွံတီအကာဲအရာ ချိုတ်ချိုတ်ပၠိုတ်ပၠိုတ်မာန်ဂှ် နူဌာန်ပရိုၚ်ဗၠးၜးမန် ကေတ်အဆက်သၟာန်သၟုက် ရုၚ်ဆက်ဆောံပွိုၚ်ဍုၚ်ရေဝ်၊ ဗော်ဍုၚ်မန်တၟိကီုလေဝ် ဟွံဂွံရပ်လဝ်ဖုၚ်ဏီရ။
ဂိတုဂျောန် စၟတ်တ္ၚဲ (၁၈) တုဲကၠုၚ်ဏံဂှ်လေဝ် ဒၞာဲစမြိုၚ်နဳပေါန်ဖံၚ်ဒေယှေန် ဗော်ဍုၚ်မန်တၟိဂှ် ကမ္မယှေန်ပၞာန်တံ ကၠုၚ်စိုပ် ထောံဖျေံလဝ်ဗမ်ကဵု က္ၜၚ်ကျာဏီရ။
ဆဂး ဆေၚ်စပ်ကဵု ပရူဒဒှ်တံဂှ်တုဲ နူဗော်ဍုၚ်မန်တၟိ ဟွံဟီုဂးလလောၚ်ပ္တိတ် မွဲသာ်ဏီရ။
ဗော်ဍုၚ်မန်တၟိဝွံ ဒှ်ဂကောံရပ်လွဟ်ကောန်ဍုၚ်အရၚ် မထ္ပက်လဝ်စၟတ်တဲ လိက်ကသုက်တုပ်စိုတ်ဒေံါပန်ပှော်အလုံဍုၚ် (အေန်ဇြဳအေ) မွဲဂကောံတုဲ သွက်လၟေၚ်ကမၠောန်ပရေၚ်ၜိုဟ်လလမ်မ္ဂး အာစိုပ်ဆဵုဂဗကဵု ဂကောံဒပ်ပၞာန်တံ ပ္ဍဲနေပျဳဒဝ် မွဲနှေံမွဲနှေံနွံဂှ် ဂွံတီကေတ်ရ။