ညးစၞးကၠတ်ထဝ်တွဵုရး ဗော်ညဳသၟဟ်မန် ပွိုၚ်ဍုၚ်ဇြပ်ဗု မွဲတၠ ဟိုတ်နူပတိုန်လဝ်တၚ်သဳကၠဳ ပ္ဍဲကၠတ်ထဝ် ကိစ္စဂၠံၚ်ကွာန်ညးဂှ်တုဲ ညးလ္ၚဵုပါ်ပါဲ သ္ပစရဵု (သ္ပပရေံ) နွံရောၚ် ညးတာလျိုၚ်အဆံၚ်ပွိုၚ်ဍုၚ် ဗော်ညဳသၟဟ်မန်မွဲတၠ ဟီုထ္ၜးရ။
ဂိတုဂျောန် (၉) ဏံမ္ဂး ကောံဓရီုကၠတ်ထဝ်တွဵုရး(ဍုၚ်မန်) အလန်တတိယနွံတုဲ ညးစၞးကၠတ်ထဝ်တွဵုရး နာဲယှိုဲလူ သွက်ဂွံပတိုန်တၚ်သၟာန် ကိစ္စဂၠံၚ်ကွာန်လ္ဂောဝ်အနာၚ်ကဵု ကွာန်ပြၚ်ကရေၚ်နွံရောၚ် ဂွံတီကေတ်ပရိုၚ် နူညးလုက်စုက်ကဵု ညးစၞးဗော်ညဳသၟဟ်မန်မွဲတၠရ။
“အမာတ်ကၠတ်ထဝ် နာဲယှိုဲလူ ပလေဝ်လဝ်တၚ်သၟာန် ကိစ္စဂၠံၚ်ကွာန်လ္ဂောဝ်အနာၚ် ဆက်စၠောံကဵု ကွာန်ပြၚ်ကရေၚ်ဂှ် တၚ်သၟာန်ဂှ် ဒှ်မံၚ်ကိစ္စဂၠံၚ်ကွာန်ညးတေံ ဒှ်မံၚ်သာ်ဂှ်၊ အခါရ နာဲယှိုဲလူ ပလေဝ်လဝ်သွက်ဂွံသၟာန်သဳကၠဳ ကိစ္စဂၠံၚ်ကွာန်ညးတေံဏောၚ်ဂှ်လေဝ် ပရိုၚ်ဂှ်ပြးတိတ်အာမ္ၚး၊ လတူမုက်လိက်(ဝှေတ်ဗော်)လေဝ် ပရိုၚ်ဂှ်ပြးအာ၊ ဍာံဍာံဂှ် ညးတေံ ပတိုန်တၚ်သၟာန်ဂှ် သွက်ဖောအ်ဗြေဝ်ညးဍုၚ်ကွာန်ကီုရ၊ ဆဂး ဒှ်အာပရေၚ်ဖောအ်ဗြေဝ် သွက်ကွာန်ညးတေံ ဒှ်အာဗီုဂှ်တုဲတှေ် မၞိဟ်လ္ၚဵု သ္ပစပရေံ (သ္ပစရဵု)” သာ်ဝွံ ညးတာလျိုၚ်ဗော်ညဳသၟဟ်မန် ပွိုၚ်ဍုၚ်ဇြပ်ဗုဂှ် ဟီုရ။
ပ္ဍဲကဵုကၠတ်ထဝ်မံက်တိုန်တၟိတၟိဏံဂှ် နကဵုညးစၞးကၠတ်ထဝ်အဆံၚ်ဆံၚ်တအ် မုကၠောန်ရေၚ်တၠုၚ်ဒတုဲဖဵုကဵု ညးဍုၚ်ကွာန်ကီု၊ မုမုသွက်ဂွံသဳကၠဳပတိုန်ထ္ၜး ပ္ဍဲကၠတ်ထဝ် သွက်ညးဍုၚ်ကွာန်ကီု အဃောညးဍုၚ်ကွာန်ဂမၠိုၚ် မၚ်ဗဵုအခါတ်အကာဲဒၟံၚ်ဂှ် ညးစၞးကၠတ်ထဝ်တွဵုရး နူပွိုၚ်ဍုၚ်ဇြပ်ဗု ပတိုန်သဳကၠဳတၚ်သၟာန်သာ်ဝွံဂှ် မၞိဟ်ဗွဲမဂၠိုၚ် ဟီုဂးပါ်ပါဲတဴနွံရ။
“အမာတ်ညးဍုၚ်ကွာန်တအ် စုတ်ကဵုလဝ်မာဲဂှ် မၞိဟ်ဗွဲမဂၠိုၚ်ဂှ် မၚ်ရံၚ်ဒၟံၚ် မုမုညးတအ်ကၠောန်မံၚ်ရော၊ မုမုညးတအ် ဘိုအ်ဂွံပတိုန်ထ္ၜးအာ ပ္ဍဲကၠတ်ထဝ်တေံရော၊ ဗီု အမာတ်နာဲယှိုဲလူ ပတိုန်ထ္ၜးသဳကၠဳ ကိစ္စကၠောန်ဂၠံၚ်ကွာန်ညးတေံရတှေ် ညးဍုၚ်ကွာန်ဂလိုၚ်ဂှ် ထေၚ်သောဲစုတ်ညးတေံရ၊ ပရေၚ်ပြသၞာညးဍုၚ်ကွာန် ဒးဒုၚ်စသိုၚ်နွံဂလိုၚ်ဂှ်ဂှ် သွက်ဂွံပတိုန်နွံ လံက်ဂလိုၚ်ဂှ်ဂှ် သွက်ညးဂလိုၚ် ဟွံအာပတိုန်မွဲသာ်တုဲတှေ် ပတိုန်ကိစ္စကၠောန်ဂၠံၚ်ကွာန်ဇကုတှေ် အကြာအရာပ်တအ် ဟီုသ္ပစပရေံဒၟံၚ် အမာတ်နာဲယှိုဲလူ သ္ဇက်ဟီုဟွံမွဲရ” သာ်ဝွံ နာဲသာန်ခေန် (ဗလေတ်လဝ်ယၟု) ညးရေၚ်တၠုၚ်ဒၟံၚ် ကမၠောန်ပရဟိတ လတူဍုၚ်ဇြပ်ဗုဂှ် ဟီုပါ်ပါဲပၠန်ရ။
ညးစၞးကၠတ်ထဝ်ဇၞးလဝ်မာဲ (၂၀၂၅-၂၀၂၆) နူဗော်ညဳသၟဟ်မန်ဂမၠိုၚ်တအ်ဂှ် ကၠတ်ထဝ်လ္တူ (ကၠတ်ထဝ်ကောန်ဂကူ၊ ကၠတ်ထဝ်ညးဍုၚ်) ကီု၊ ကၠတ်ထဝ်သၟဝ် (ဍုၚ်မန်) ဏံကီု အစဳဇန်ပတိုန်ထ္ၜးသဳကၠဳသာ်လဵုနွံဂှ် ညးဍုၚ်ကွာန်ဂမၠိုၚ် အဃောမမၚ်ဗဵုစၟဳ အခါတ်အကာဲဒၟံၚ်အိုတ်ရ။
တုပ်သၟဟ်ကဵု ညးစၞးကၠတ်ထဝ် နာဲယှိုဲလူ လၟုဟ်ဏံကီု တုဲကၠုၚ်လက်ထက်အလဵုအသဳ သမ္မတဥူတိၚ်သိၚ် (၂၀၁၀-၂၀၁၅) တေံလေဝ် ညးစၞးကၠတ်ထဝ်ကောန်ဂကူ နူမုဟ်ဍုၚ် ဗော်ကျဖောအ်မွဲတၠ ခရိုၚ်စာၚ်သၟူပသအုဲအေၚ်ဒၟံၚ် လတူဍုၚ်မုဟ်ဍုၚ် ပ္ဍဲအရာပ်ညးတေံဂှ် ဘိုအ်ဂွံရုပ်သီကဵု နွံ/ဟွံမွဲ ပတိုန်ဏာတၚ်သဳကၠဳပ္ဍဲကၠတ်ထဝ် (ကၠတ်ထဝ်ကောန်ဂကူ) ဂှ် မၞိဟ်ဗွဲမဂၠိုၚ် ဟီုပါ်ပါဲ သ္ပစရဵု (သ္ပပရေံ) ကၠုၚ် ဗွဲမပြာကတ်မွဲ ကေၚ်ဒှ်ကၠုၚ်သၟးဟွံက ညးစၞးကၠတ်ထဝ်ကျဖောအ်ဂှ် သီုဂွံအာယၟု ‘အမာတ်ခရိုၚ်စာၚ်’ ဏီရောၚ် ဂွံတီကေတ်ရ။