ပ္ဍဲဘာဗ္တောန်လိက်သဇိုၚ်လ္ၚဵု မၞုံပ္ဍဲပွိုၚ်ဍုၚ်ဘာအၚ်၊ တွဵုရးကရေၚ်ဝွံ သွက်အ္စာ/အ္စာၝောံ Teaching Assistant (TA) ကေုာံ (Language Teacher- LT) ဗ္တောန်လိက်ပတ်မန်တံ သၟာၚ်နူသြန်ဂိတုတုဲ သ္ဂောံဒုၚ်စသိုၚ်သြန်ထံက်ပၚ်မာန်ဂှ် ညးဒေသတံ ဘိုၚ်ရီုဗၚ်ရေၚ်တၠုၚ်မံၚ်ရောၚ် ဂွံတီကေတ်ရ။
စပ္တံနူဂိတုဒဳဇြေမ်ဗာ သၞာံ (၂၀၂၅) တုဲ စရိတ်သြန်ဂိတု အ္စာ/အ္စာၝောံ TA တံဂှ် နူဌာနပရေၚ်ပညာသၠုၚ်ပ္တိုန်လဝ် (၁၉၀၀၀၀) တုဲ နူညးဍုၚ်ကွာန်မန် မစိုပ်ဍုၚ်မ္ၚးတံလေဝ် အ္စာ/အ္စာၝောံ (၁) တၠမ္ဂး ကဵုထံက်ပၚ်မွဲကိုဋ်ဂှ်ရ မွဲဂိတု ညံၚ်ဂွံထံက်ပၚ် (၃) ကိုဋ်မာန်ဂှ် ရေၚ်တၠုၚ်အာရောၚ် ညးချဳဓရာၚ်ပရေၚ်လိက်ပတ်မန် နူဒေသၜဳဂြာၚ်မွဲတၠ ဟီုရ။
ဟိုတ်နူကိစ္စသြန်ဂိတုအောန်ဂှ်ရ ဇၟာပ်သၞာံ အ္စာ/အ္စာၝောံ ဗ္တောန်လိက်ပတ်မန်တံ နုက်တိတ်ဂၠိုၚ်တိုန်ကၠုၚ်မံၚ်တုဲ ပ္ဍဲကဵုဘာဗ္တောန်လိက်သဇိုၚ်ဂမၠိုၚ်ဂှ် ဒှ်ဂဝိၚ် ဂွိၚ်ဖေက်ဒးဆောံလေၚ်အာ အခေါၚ်အရာ ဗ္တောန်လိက်ဘာသာမိဂှ်ရောၚ် ဂးရ။
“စနူဂိတု (၆) တုဲ ကဵုအာဏောၚ်။ အ္စာၝောံ TA တံ တိတ်အာဂၠိုၚ်ရ။ အ္စာၝောံတံဂှ် မွဲသၞာံမွဲသၞာံ တိတ်အာဟွံအောန်ပုဟ်။ ဆက်ဖုၚ်ကဵုမၞိဟ်နွံကိုဝ်ရဳယျာတံရ၊ နကဵုဇြဟတ်ညးတံမွဲကိုဋ် မွဲတၠတှေ်၊ မၞိဟ်ပ္ဍဲကွာန်တံလေဝ် ရီုစုတ်ကီုတှေ် သီုဖအိုတ် ဂွံဒှ် (၃) ကိုဋ်ဂှ် ဗပေၚ်ကဵုဏောၚ်” သာ်ဝွံ ညးဟီုရ။
သၟတ်မန်သီုဖအိုတ် အခေါၚ်အရာဗ္တောန်လိက်ပတ်မန် သ္ဂောံတန်ကြန်ဍာ်ဇမၠိၚ်မာန်ကီု၊ နူဒေသကွာန်တၞဟ်ဂမၠိုၚ်တံလေဝ် အတိုၚ်နဲကဲဏံကီု မိက်ဂွံကဵုဘိုၚ်ရေၚ်တၠုၚ် ကိစ္စအခေါၚ်ဒုၚ်စသိုၚ်သြန်ဂိတု အ္စာ/အ္စာၝောံတံရဂှ်လေဝ် ဟီုဂးဖ္တိုက်ဖၟောဝ်လဝ်ရ။
ပ္ဍဲသၞာံဗ္တောန်ပညာတုဲကၠုၚ်ဏံဝွံ ပ္ဍဲကဵုဘာဗ္တောန်လိက်သဇိုၚ် ဟွံအောန်နူ (၅) ဘာ၊ ပ္ဍဲကွာန် တွဵုရးကရေၚ်ဂှ်ဝွံ အ္စာ/အ္စာၝောံ ဗ္တောန်လိက်ပတ်မန်ဟွံမွဲတုဲ ဒးဒေံါလဝ်ပရေၚ်ဗ္တောန်လိက်နွံရဂှ်လေဝ် ဂွံတီကေတ်ရ။
ပ္ဍဲသၞာံဗ္တောန်ပညာလၟုဟ်ဏံဝွံ လိက်ဗွဟ်မန် တန်ပထမ၊ ဒုတိယ၊ တတိယဂှ်လေဝ် နူဂကောံလိက်ပတ်ယေန်သၞာၚ်မန် တြးပ္တိတ်တုဲ ပရအ်ကဵုဒၟံၚ် ဘာမဆေၚ်စပ်တံဣရဂှ်လေဝ် ညးချဳဓရာၚ်ပရေၚ်လိက်ပတ်မွဲတၠ ဆက်ဟီုလဝ်ရ။
“လိက်ဗွဟ်ဂှ်လေဝ် သၞာံဏံမှဂွံရ။ ဗက်ရာန်လေဝ် ဟွံဂွံပုဟ်။ နူတြေံဂှ်ရ ဗက်အာတ်တုဲ က္လေၚ်ကူဆာဲ ဗ္တောန်မံၚ်ရ။ ဝန်ဇၞော်ကေၚ်ကာကောန်ဍုၚ်အရၚ်လေဝ်နွံကၠုၚ်တှေ် သၞာံဏံ သာတုဲဂွံအခေါၚ်ဂၠိုၚ်ဏောၚ်” သာ်ဝွံ ညးဟီုရ။
အကြာပရေၚ်ဍုၚ်ကွာန်ပြံၚ်လှာဲဏံ သၟာၚ်နူကိစ္စသြန်ဂိတု အ္စာ/အ္စာၝောံ ဗ္တောန်လိက်ပတ်ကောန်ဍုၚ်အရၚ်တုဲ လိက်ဗွဟ်မန်ဂမၠိုၚ်ဂှ်လေဝ် တက်တြးပ္တိတ်တၟိ ဟွံမာန်ဂှ်ရ လိက်အုပ်တြေံဂမၠိုၚ်ဂှ် က္လေၚ်ကူဆာဲတုဲ ဒးဗ္တောန်မံၚ်ရဂှ်လေဝ် ဂွံတီကေတ်ရ။
ညးချဳဓရာၚ်ကေၚ်ကာလိက်ပတ်မန်ဂမၠိုၚ်တံဝွံ စၞးသၞောတ်စလိၚ်တ္ၚဲ စရိတ်ဂိတုအ္စာ/ အ္စာၝောံ လၟုဟ်ဏံဂှ် မိက်ဂွံစၟတ်ပြံၚ်လှာဲအာ သၞောတ်သြန်ဂိတုရဂှ်လေဝ် ကဵုကသပ်အာတ်မိက်လဝ်နွံရ။
ဗွဲကြဴနူသၞာံ (၂၀၂၁) တုဲ သၟာၚ်နူလိက်ပတ်ကောန်ဍုၚ်အရၚ်မ္ဂး အ္စာၝောံရီုဗၚ်ဗ္တောန်မံၚ်လိက်ပတ်တၞဟ်သၟာၚ် Teaching Assistant (TA) မွဲတၠဂှ် (၁၃၀၀၀၀)၊ အ္စာၝောံ (Language Teacher- LT) ဂှ် (၆) ဠက်ဒကေဝ် စၟတ်လဝ်ရ။
ၜိုန်ဂှ်ကီုလေဝ် စပ္တံနူဂိတုဒဳဇြေမ်ဗာ သၞာံ (၂၀၂၅) တုဲ အ္စာ/အ္စာၝောံ Teaching Assistant (TA) မွဲတၠမ္ဂး (၁၉၀၀၀၀) ဒကေဝ်၊ (Language Teacher- LT) မွဲတၠမ္ဂး (၁၂၀၀၀၀) ဒကေဝ် ကဵုအခေါၚ်သၠုၚ်ပ္တိုန်လဝ်ရောၚ် နူဌာနက္ဍိုက်က္ဍိုပ်လိက်ပတ်ယေန်သၞာၚ်ကောန်ဍုၚ်အရၚ်တွဵုရး လလောၚ်ပ္တိတ်လဝ်ဂှ် ဂွံတီကေတ်ရ။