ကမၠောန်ကွတ်တဲ မတိတ်နူဒေသတ္ကအ်ခၟိုင် မပ္တံကဵု ဂတာတၟအ်၊ ၜံက်တဝ်၊ ခၟံက်သၠဒုန်၊ ဇုက်သတ်ဗြဴ၊ ယာတ်ဇိုတ်ဇိုင်ခၞော်သတ်ဗြဴ၊ သ္ကဝ်သၠဒရိုတ်တအ်ဂှ် ဟိုတ်နူမၞိဟ်ရာန်အောန်ကၠုင်တုဲ ကၠေံဗ္ဒန်စှ်ေဒၟံင်သိုက်က်နွံရောင် ညးဒေသတအ် ဟီုရ။
ပ္ဍဲဒေသတ္ကအ်ခၟိုင် ကွာန်ဖ္အိုတ်မၞုံ ၆၀ ကွာန်ပြင်ဂှ် ကွာန်မုဟ်ဒုန်၊ ဝါဍောတ်၊ မုဟ်ဒဵု၊ မုဟ်နာင်၊ ဒံင်ဥ၊ ကမာမဵု၊ ကလအ် အကြာဗၞတ် (၇) ကွာန်ဟေင် ကၠောန်ပ္တိတ်ဒၟံင် ကမၠောန်ကွတ်တဲတအ်ဂှ် နွံရောင် မၞိဟ်တြုံအာယုက်ဇမၞော် နူကွာန်မုဟ်ဒုန် ဒေသတ္ကအ်ခၟိုင်မွဲတၠ ဟီုရ။
“ဟိုတ်နူခေတ်တုဲ ကွတ်တဲနာဲတံ ကၠေံဗ္ဒန်အာဒၟံၚ်သိုက်က်ရ၊ တုဲပၠန် သၟတ်ဍောတ်တ်လၟုဟ်ဏံ စိုပ်ဟွံလုပ်စကဵုကမၠောန်ကွတ်တဲနာဲတံလေဝ် ပါကီု၊ မၞိဟ်တြေံတြေံဂှ်ရ ကၠောန်ဒၟံၚ်တုဲ လၟုဟ်ဏံ ဗျုအာဂှ်ရ ကၠောန်ဟွံမာန် လအ်အာတှ်ေ ကွတ်တဲဏံ သွက်ဂွံကၠေံအာရနွံ” သာ်ဝွံ နာဲဖိုဝ်ချေတ် နူကွာန်မုဟ်ဒုန် ဟီုရ။
ကမၠောန်ကွတ်တဲဂတာတၟအ် မသွံတြးကၠုင်ဒၟံၚ် ပ္ဍဲအခိၚ်ပံက်ဘာ အလုံဍုၚ်ဗၟာ ဗီုနူအခိင်ကၠာတေံဂှ် လအ်ကဵုစှော်သၞာံရ သွံရာန်ဟွံဂွံတုဲ လၟုဟ် နဲကဲနာနာသာ် ဗက်ကဵုခေတ်တုဲ ကၠောန်ပ္တိတ်ဒၟံၚ်ဂတာတၟအ် နဗီုပြင် (ဒဳဇြာ) စုင်လေဝ်နွံရောၚ် ဂးရ။
ပ္ဍဲကဵုဂှ်ဝွံ ကေတ်စကာဗီုရုပ်ဨကရာဇ်မန် ရာဇာဓိရာဇ်၊ ဓမ္မစေတဳ၊ အလာံမန်၊ ဗျဥ်မန် (က၊ ခ၊ ဂ၊ ဃ၊ ၚ)၊ မ္ၚဵုရအဴ၊ (မၚ်္ဂလာပါ) စတမ်တုဲ ချူဓဇက်စုတ် ပ္ဍဲဂတာတၟအ်တုဲ ကၠောန်ပ္တိတ်ဒၟံင်ရောင် ဂးရ။
ၜိုန်ဂှ်ကီုလေဝ် စိုပ်အခိၚ်ကသီု ဗီုရဴအခိင်လၟုဟ်မ္ဂး ကၟုဲအာကၠုၚ်အောန်တုဲ ကပေါတ်ကွတ်တဲတအ်ဂှ် သွံရာန်ဟွံခိုဟ်ကီု၊ ပြဟ်ဟ်ဏအ် အယာံမာတ် ပလံၚ်ဗစိုပ်ဒၟံၚ်ကဵုသွက်ဗွဝ်ဖျာ မၞုံလ္တူဍုၚ်လ္ဂုၚ်၊ ဍုၚ်အဝ၊ ဍုၚ်ရခေၚ်၊ တွဵုရးဍုၚ်မန်တအ်ညိညဟေၚ်ရနွံရောင် ညးဒေသတ္ကအ်ခၟိုင်တအ်ဟီုရ။
“ကွတ်တဲတ္ကအ်ခၟိုၚ်နာနာ သွက်ဂွံကၠေံဗ္ဒန်အာသၟးရ။ ခေတ်လေဝ်ပြံၚ်သၠာဲကၠုၚ်တုဲ ကပေါတ်ကွတ်တဲတြေံတြဟ် နူလက်ထက်ဇုဇဗဴလပိုဲ ဂတနူဏံ ဂၠာဲသ္ပဂဥုဲမတ်လေဝ် ဟွံဆဵုရောၚ်” သာ်ဝွံ ညးဒေသတ္ကအ်ခၟိုၚ်မွဲတၠ ဟီုရ။
တုဲပၠန် ကပေါတ်ကွတ်တဲ မတိတ်နူဒေသတ္ကံခၟိုၚ် ပါဲနူဂတာတၟအ်မွဲသာ်တုဲ သှ်ေဒၟံင်မပ္တံကဵု ခၟံက်၊ ယာတ်ဇိုဟ်ဇိုၚ်၊ ဇုက်သတ်ဗြဲ၊ သ္ကဝ်သၠဓရိုတ်တအ်ဂှ် မၞိဟ်ရာန်အောန်ကီု၊ မၞိဟ်ကၠောန်ပ္တိတ်ဟွံမွဲကီုတုဲ ဂၠာဲဝါတ်ကၠုင်မံင်ရောၚ် ညးဆက်ဟီုရ။
စိုပ်ကဵုကမၠောန်ကွတ်တဲ ဒေသတ္ကအ်ခၟိုင် ဂွံက္လေင်ယာက္ဍိုပ်မာန်ကီု၊ ဂွံတြးစိုပ်ဗွဝ်ဖျာဂၠိုင်င်မာန်ကီု တၞဟ်နသ္ဂောံကဵုရီုဗင်မာန် သ္ကိုပ်ဝန်ဇၞော် တွဵုရးမန် ဥုအံင်ဝေန်တာန် ကၠုင်စိုပ်လ္ရတ်လဝ်နွံတုဲ ပ္တိတ်ကဵုတမ်ရိုဟ်ကမၠောန်ဏောင် ဟီုဂးလဝ်ကုညးဒေသတအ်ကၠာလေဝ် စဵုကဵုတ္ရဲဏအ် ဟွံက္လိဂွံအရီုဗင်မွဲသာ်ဏီဖိုဟ်ရောင် ဂွံတီကေတ်ရ။