ပ္ဍဲတွဵုရးဍုင်မန်ဝွံ ကိုန်စဳဇန်ဍောတ်ဍောတ်လ္ၚဵု ဓမံက်ရုပ်ရဴဟွံမာန်မွဲသာ် ဒေံါဇူလဝ်လက်ထက်ဥူတုင်ဇြုင်ဂှ် နူအလဵုအသဳသီအဝဵုဏံ ဆက်ကၠောန်သ္ပရေင်တၠုင်မံင်ရောင် ဂွံတီကေတ်ရ။
အပ္ဍဲသၞာံ (၂၀၁၁ – ၂၀၁၆) ပ္ဍဲတွဵုရးဍုင်မန်ဝွံ ကိုန်စဳဇန်ရုင်စက်ချးတၟံအင်ဒင် ဓမံက်ရုပ်ရဴဟွံမာန် ဒးဒေံါဇူလဝ်ဂှ်ကီု သီုကိုန်စဳဇန် ပ္တိတ်ပၟတ်ဓာတ်လလဳ၊ ဂၠံင်ဒဒန် ကေုာံ ဍုင်၊ ကွာန် နွံဗွဲမဂၠိုင်ရ။
ယင်ကိုန်စဳဇန်ဂမၠိုင်ဂှ်ဝွံ မွဲကရောံကဵု ညးဒေသကောန်ဍုင်ကွာန်တံ ဒစဵုဒစးဂှ် ဟိုတ်နူကိစ္စကယျာန်ဓဝါတ်တုဲ ဒးရုပ်သီလဝ်ဂှ်လေဝ် ဂွံတီကေတ်ရ။
ပ္ဍဲပွိုင်ဍုင်မုဟ်ဍုင်ဝွံ ကိုန်စဳဇန်အရှာံကွဳစက်ဂြိပ်ဇမ္ၚောဲမုဟ်ဍုင် ဒေံါဇူလဝ် ပ္ဍဲလက်ထက်သ္ကိုပ်ဝန်ဇၞော်တွဵုရးဍုင်မန် ဥူအုန်မျေအ် အခိင်ကၠာတေံ သွက်ဂွံဆက်ဓမံက်ရုပ်ရဴဂှ် အပ္ဍဲတ္ၚဲတုဲကၠုင်အကြာတဏံ နူဂကောံအလဵုအသဳပၞာန်တွဵုရးဍုင်မန်တံ စသဳကၠဳလဝ် ဒၞာဲတိကဵု တင်နွံပၟိက်တၞဟ်တၞဟ်တံရ။
ဆဂး စၞးဒၞာဲတိ အပ္ဍဲဂကောံကွာန်ကြုင်ဘာ(ကျုံဖဲ) မရန်လဝ်ကၠာတေံဂှ် ပြံင်ဆုဲဏာလဝ် ဒၞာဲတိကၠအ်သတ်ဗြဴကၠေင် ကွာန်မယာန်ဂှ်ရောင် ဂွံတီကေတ်ရ။
ညးဒေသမုဟ်ဍုင်မွဲတၠဂှ် “ကိုန်စဳဇန်အရှာံကွဳစက်ဂြိပ်ဇမ္ၚောဲဂှ် နူလက်ထက်သ္ကိုပ်ဝန်ဇၞော်တွဵုရးဍုင်မန် ဥူအုန်မျေအ်တေံရ စဳဇန်ဒၟံင်၊ အခိင်တေံဂှ် ရန်လဝ်လ္ပာ်ကြုင်ပါ်၊ တိ (ပုံစံ ရ) နွံဂှ်လေဝ် ရာန်လဝ် (၁၀) ဨကပြင်ရ။ လၟုဟ်ဏံ ဗီုလဵုဒှ်တုဲ စိုပ်အာလ္ပာ်မယာန်ဂှ် ဟွံတီပုဟ်” သာ်ဝွံ ဟီုရ။
ကိုန်စဳဇန်ဂှ်ဝွံ သၞာံ (၂၀၁၁ – ၂၀၁၆) ဂှ် စပ္တိုန်ထ္ၜးဂလာန် ပ္ဍဲပေဲါကောံဓရီုကၠတ်ထဝ်တွဵုရးတုဲ ကိစ္စချူဓဇက်ဒဳဇြာင်ကဵု ရန်ဒၞာဲတိဂမၠိုင်ဂှ် ပ္ဍဲလက်ထက်အလဵုအသဳ အေန်အေဝ်ဒဳ တံ ဆက်ကၠောန်သ္ပရေင်တၠုင်လဝ်ရ။
ကိုန်စဳဇန်အရှာံကွဳစက်ဂြိပ်ဇမ္ၚောဲဏံဝွံ နူလက်ထက်အလဵုအသဳကၠာတေံရ ပရေင်ဒစဵုဒစးဟွံမွဲကီုလေဝ် မုဟိုတ်သာ်လဵုတုဲ ဒေံါဇူအာဂှ် ဟွံတီကေတ်ရဂှ်လေဝ် ညးဒေသဂမၠိုင်တံ ဟီုရ။
ကိုန်စဳဇန်လၟုဟ်ဏံဂှ် သွက်ဂွံစကာအာ ဗွိုက်သၠဲတိ (၁၀.၃၅) ဨကနွံတုဲ ကၠောန်သ္ပရေင်တၠုင်အာ နကဵုပရေင်ဓလိုက်တမ်ရိုဟ်ပိုင်ပြဳ (ပူဂဵု) ဂှ်ရ ညးတၠကမၠောန်စိုတ်လုပ်စဂမၠိုင်ကဵု ကမ္ပဏဳဂမၠိုင် သွက်ဂွံပ္တိုန်စရင်ဂှ် လလောင်ပ္တိတ်လဝ် နူဂိတုဖေဖဝ်ဝါရဳတုဲကၠုင်တေံရ။
“ဒၞာဲဂှ်ဂှ် တိအလဵုအသဳရ။ ကၠအ်ဂှ်တှ်ေ လ္တူဂၠံင်ဇၞော်ဂှ် ဟွံသေင်ပုဟ်။ နူကဵုဂၠံင်ဇၞော်ဂှ် ဒးလုပ်အာ တၟာဟလိုင်ရ။ ဆဂး ဒၞာဲဂှ်ဂှ် ကြပ်မံင်ကဵု ဒပ်ပၞာန်ရ။ ကဵုကွာန်လေဝ် ဟွံသ္ၚောဲကွေံပုဟ်ဟီုတှ်ေ ဒှ်အာဍာံတှ်ေ ခိုဟ်ရ” သာ်ဝွံ ညးဒေသလ္တူဂှ် ဟီုရ။
အပ္ဍဲပွိုင်ဍုင်မုဟ်ဍုင် ကိစ္စအာကၠုင်တရဴ သ္ဂောံပြေပြံင်ကလိတ်ကလောတ်ဂှ်မ္ဂး စဳဇန်ဒၟံင် သွက်ဂွံခၞံဗဒှ် ဗဒိုပ်ကွဳစက်ဂြိပ်ဇမ္ၚောဲဒေံါဇူမွဲရောင် နူဂကောံဗဂဵုလဟဵုဍုင်ကွာန် တွဵုရးဍုင်မန်၊ ဂကောံအလဵုအသဳတွဵုရးဍုင်မန် လလောင်ပ္တိ်တ်လဝ် ပ္ဍဲဂိတုဖေဖဝ်ဝါရဳတုဲဂှ် စချဳဓရာင်ကၠုင်ရ။
ကိုန်စဳဇန်ဏံ မံက်ကၠုင်ရုပ်ရဴမ္ဂး ကွဳစက်ဂြိပ်ဇမ္ၚောဲဂမၠိုင် ဟွံဒးလုပ်စိုပ်အပ္ဍဲဍုင်မွဲသာ်ဂှ်ရ ပရေင်ဂၠံင်ဍာန်တၟာတ်ဆိုအ် အောန်စှ်ေကၠုင်မာန်တုဲ ကိစ္စအာတရဴလေဝ် သာတုဲပြေပြံင်ဂၠိုင်ကၠုင်မာန်ရောင် စၟဳလဝ်နွံရဂှ်လေဝ် ညးဒေသတံ ဟီုလဝ်ကဵု ဌာန်ပရိုင်ဗၠးၜးမန် IMNA ရ။