အပ္ဍဲတွဵုရးဍုၚ်မန်ဝွံ သၞေဟ်ကၚ်ဂမၠိုၚ်၊ ဂကောံစၟဳစၟတ်ဂမၠိုၚ်၊ ဂကောံဂီုကၠီုဂမၠိုၚ် ထ္ၜးဟိုတ်ကဵု ပရေၚ်ဂီုကၠီုတုဲ အာတ်ကေတ်မံၚ်သြန် နူညးဍုၚ်ကွာန်တံ ဟွံမွဲကဵုသၞောတ်ဗ္ၜတ်ရောၚ် ညးစၞးကၠတ်ထဝ်တွဵုရး ဥူတဇြဝ် ဟီုဂးထံက်ထ္ၜးရ။
ဥူတဇြဝ် ညးစၞးကၠတ်ထဝ်တွဵုရး၊ ဆန္ဒမာဲ စၟတ် (၂)၊ ပွိုၚ်ဍုၚ်ကျာ်မြဟ်ဂှ်ဝွံ အဃောသၟာန်တၚ်သၟာန် ပ္ဍဲကၠတ်ထဝ်ဂှ် ဟီုဂးထံက်ထ္ၜးဏာ သာ်ဝွံရ။
ထ္ၜးဟိုတ်ကဵုပရေၚ်ဂီုကၠီု အပ္ဍဲတွဵုရးတုဲ ဂကောံဂီုကၠီုဂမၠိုၚ်၊ သၞေဟ်ကၚ်စၟဳစၟတ်ဂမၠိုၚ်ဂှ် နွံဂၠိုၚ်ဒၟံၚ်နူကဵုမနွံပၟိက်ဂှ်တုဲ ကၠောန်သ္ပဒၟံၚ် ဗွဲဟွံဍာံပြနွံမံၚ်ရောၚ် ဂးရ။
သၞေဟ်ကၚ်လ္ၚဵုတံဝွံ ပ္ဍဲကာလဒၞာတာစၟဳစၟတ် ကွဳစက်ယာဉ်ဂမၠိုၚ်ဂှ် ထ္ၜးဟိုတ်ကဵုပရူပရာ ဟွံဆေၚ်စပ်ကဵု ပရေၚ်ဂီုကၠီုတုဲ အာတ်ကေတ်မံၚ်သြန် နူညးဍုၚ်ကွာန်တံရောၚ် ဥူတဇြဝ် ထံက်ထ္ၜးရ။
သၞေဟ်ကၚ်စၟဳစၟတ်ဂမၠိုၚ် အာတ်ကေတ်မံၚ်သြန် ဟွံမွဲကဵုသၞောတ်ဗ္ၜတ်ဂှ်ရ ညးဍုၚ်ကွာန်ဂမၠိုၚ် ဒးဆဵုဂဗမံၚ် ပရေၚ်ကြေပ်ဂြတ် စသုၚ်မံၚ်စံၚ်ကဵု ၚုဟ်ဖျာက္ဍၚ်တံရ။
ဟိုတ်နူပရေၚ်ဍုၚ်ကွာန်ဟွံညိၚ်ဝတ်၊ သၞောဝ်ဥပဒေအုပ်လဒံဍိုန်လျဂှ်ရ အခိၚ်ညးဍုၚ်ကွာန်တံ စိုပ်မံၚ်ဒဒိုက်ကဵု ပရေၚ်စသုၚ်မံၚ်စံၚ်ဂှ် ဂကောံဂီုကၠီုဂမၠိုၚ်၊ ဂကောံစၟဳစၟတ်ဂမၠိုၚ်၊ သၞေဟ်ကၚ် မၞုံပ္ဍဲဂၠံၚ်ဍာန်လှာဲဗတးဗၞိက်တံ အာတ်ကေတ်မံၚ်သြန် ဟွံမွဲကဵုသၞောတ်ဗ္ၜတ်ဂှ် ကၠောန်သ္ပဟွံထေက်ရောၚ် ဂးရ။
“သၞေဟ်ကၚ်လေဝ် ဂၠိုၚ်ကွေံရ။ ဒးကဵုသြန်လေဝ် ဂၠိုၚ်ကွေံရ။ လ္တူနူၚုဟ်ဖျာက္ဍၚ်ဂှ် စရိတ်ဂၠံၚ်ၚုဟ်ကပေါတ်သွံတံ ဒးတော်စုတ်ရ။ ဟိုတ်ဂှ်ရ ၚုဟ်ဖျာတံ က္ဍၚ်တိုန်ရ” သာ်ဝွံ ညးစၞးကၠတ်ထဝ် ဥူတဇြဝ် ဟီုရ။
ယၚ်ကမၠောန်ဂမၠိုၚ်ဂှ်ဝွံ သွက်ကၟိန်ဍုၚ်ဂှ် ဟွံဂွံအကံက်အခေါန်မွဲဒကေဝ်တုဲ ညးကြမ်ကြစသုၚ်ကံက်မံၚ်သြန် မွဲဒမြိပ်ဂၠံၚ်ဍာန်ဂှ်ဟေၚ် ကလိဂွံမံၚ်တသိုက်ရောၚ် ဥူတဇြဝ် ထံက်ထ္ၜးရ။
ဥူတဇြဝ်ဝွံ လ္တူသၞေဟ်ကၚ်စၟဳစၟတ် မၞုံအပ္ဍဲတွဵုရးတံ အာတ်ကေတ်မံၚ်သြန် ဟွံမွဲကဵုသၞောတ်ဗ္ၜတ်ဂှ် သွက်ဂွံကေတ်ကဵုအရေဝ် နကဵုသၞောဝ်ဥပဒေဗ္တိုက်သရိုဟ်ဗက်စအဂတိ ဗွဲမစိုပ်တရဴညိဂှ်လေဝ် အာတ်မိက်လဝ် နူကၠတ်ထဝ်မွဲတဆံၚ်ရ။
လ္တူဥူတဇြဝ် ထံက်ထ္ၜး ကေုာံ သၟာန်ဏာဂှ်တုဲ ပ္ဍဲကဵုသၞေဟ်ကၚ်စၟဳစၟတ် (၄၀) မၞုံအပ္ဍဲတွဵုရးဍုၚ်မန်ဏံ လ္တူပလံၚ်ဗ္စိုပ်ကပေါတ်ဗၞိက်ဟွံလုပ်သၞောဝ်တံဂှ် နကဵုဂကောံပံၚ်ကောံဌာနဇဳ စၟဳစၟတ်မံၚ်နွံရောၚ် ဝန်ဇၞော်ပရေၚ်ပိုန်ဒြပ် ကေုာံ ပရေၚ်ဘဏ္ဍာ၊ ကိုန်အစဳဇန်အလဵုအသဳပၞာန်တွဵုရး နာဲလျးတၟး ဟီုသွဟ်ဏာရ။
လ္တူသၞေဟ်ကၚ်စၟဳစၟတ်၊ သၞေဟ်ကၚ်ဂီုကၠီု အာတ်ကေတ်မံၚ်သြန် ဟွံမွဲကဵုသၞောတ်ဗ္ၜတ်ဂှ်ဝွံ သွက်ဂွံကေတ်အရေဝ် နကဵုသၞောဝ်ဥပဒေဗ္တိုက်သရိုဟ်ဗက်စအဂတိ ဗွဲမစိုပ်တရဴဂှ်မ္ဂး နကဵုအလဵုအသဳပၞာန်တွဵုရး ဟွံကဵုသွဟ်မွဲသာ်ကီုရ။