ပ္ဍဲသ္ကုတ်ဂၠံၚ်ဇၞော် စၟတ် (၈)၊ မဆက်စၠောံလဝ် နူပွိုၚ်ဍုၚ်ရေဝ်၊ တွဵုရးဍုၚ်မန် စဵုကဵုပွိုၚ်ဍုၚ်ကံသံၚ်၊ ရးဒေသဇၞော်တၞၚ်သဳဂှ် နူကဵုကမ္မယှေန်ပၞာန်တံ ကဵုဇြဟတ်ဓရိုဟ်ဍိုက်ကၠုၚ်ပၞာန်မာန်ဂှ်ရ ပေဲါဗ္တိုက်သ္ကာတ်မြဟ်ကၠုၚ်မာန်ရောၚ် ဂကောံဒပ်ပၠန်ဂတးအပ္ဍဲဒေသတံ ဟီုကဵုကၠုၚ်သတိ နူကဵုဌာန်ပရိုၚ်ဗၠးၜးမန် IMNA မွဲတဆံၚ်ရ။
ဒုသ္ကိုပ်ပၞာန်ဇၞော်ကမ္မယှေန်ပၞာန် ကျဝ်ဇြဲလေန် အဃောဆဵုဂဗကဵု ဂကောံသ္ၚိကၟိန်သ္ဂံၚ် ကေုာံ ညးတာလျိုၚ်ဒပ်ဒေသဗိက် ပ္ဍဲဂိတုဂျောန် (၂၄) တုဲကၠုၚ်ဏံဂှ် ဟီုဂးဏာလဝ် ပရူဒုၚ်လျိုၚ်ပရေၚ်ဂီုကၠီု သ္ကုတ်ဂၠံၚ်ဇၞော် စၟတ် (၈)၊ ရေဝ်-ထဝဲါ-ဗိက်-ဗုက်ပျေန်-ကံသံၚ်ဂှ်ရ။
ဂလာန်ဟီုဂးဂှ်ဝွံ ဒှ်တၚ်ဒုၚ်လျိုၚ်ပရေၚ်ဂီုကၠီု ကိုန်စဳဇန်ဒေသပိုန်ဒြပ်တၟေၚ် ကေုာံ သၞေဟ်က္ၜၚ်ဍာ်ဇြိုဟ်ထဝဲါ စဳဇန်လဝ် သွက်ဂွံပံၚ်ကောံဓမံက်ရုပ်ရဴကဵု ကၟိန်ဍုၚ်ရတ်ယှာ မၞုံပ္ဍဲဒေသနဗုလေဝ်ကဵု ပိုက်လာၚ်သၟုဟ်ဓာတ်သဘာဝဇောတိက မၞုံပ္ဍဲဒေသကာန်ပံက်၊ ပွိုၚ်ဍုၚ်ဍာ်ဗုဂှ်ရောၚ် ညးတာလျိုၚ် နူဌာနရးပၞာန်တၟေၚ် PDF သဝ်ဒါကိုဝ် ဟီုဂးသ္ၚဳဂၠိပ်လဝ်ရ။
“အဓိကဂှ်တှေ် ဂုန်ဖဵုပိုန်ဒြပ်ဍေံတံရ။ သွက်ဂွံစဵုဒၞာဂုန်ဖဵုပိုန်ဒြပ် ဒေသပိုန်ဒြပ်တၟေၚ်ထဝဲါကဵု ပိုက်လာၚ်သၟုဟ်ဓာတ်ရ။ ဗီုလဵုဒှ်ဒှ် ဒပ်ပၠန်ဂတးတံဂှ်တှေ် အရာဒးကၠောန်နွံဂှ် ဆက်ကၠောန်အာဏောၚ်။ အေပ္ဍဲသ္ကုတ်ဂၠံၚ်ဂှ် ခြာဟွံလအ် ပေဲါဗ္တိုက်တံ ဂၠိုၚ်ကၠုၚ်မာန်ဏောၚ်” သာ်ဝွံ သဝ်ဒါကိုဝ် ဟီုရ။
ကိုန်စဳဇန် သၞေဟ်က္ၜၚ်ဍာ်ဇြိုဟ်ထဝဲါ မၞုံအပ္ဍဲပွိုၚ်တိုက်နဗုလေဝ်၊ ပွိုၚ်ဍုၚ်ဍာ်ဗုဂှ်ဝွံ ဒပ်ပၞာန်ဗၟာကဵု နဇြဟတ်ပရေၚ်ဆက်ဆောံခိုဟ်ကၟိန်ဍုၚ်ရတ်ယှာတံ သွက်ဂွံကၠောန်သ္ပရေၚ်တၠုၚ်ဂှ် အပ္ဍဲသတ္တဟပထမဂိတုဂျောန်၊ သၞာံ (၂၀၂၆) ဏံ ထ္ပက်လဝ်စၟတ်တဲ အဆံၚ် MOU ရောၚ် ဂွံတီကေတ်ရ။
ဟိုတ်ဂှ်ရ ပ္ဍဲကဵုမွဲဒမြိပ်ဂၠံၚ်ဍာန် ပွိုၚ်ဍုၚ်ကမ္မယှေန်ပၞာန်တံ ထိၚ်ဒဝ်လဝ်ဂှ် နူဂကောံကမ္မယှေန်ပၞာန်တံ စရေၚ်တၠုၚ်ချဳဓရာဒၟံၚ် ပရေၚ်ပၞာန်တုဲ နကဵုညးဍုၚ်ကွာန် ဒးစကာတတ်ကၠောံအာကၠုၚ်ဒၟံၚ် ဂၠံၚ်ဇၞော် စၟတ် (၈) တံဂှ် ရံၚ်အကာဲအရာ ပရေၚ်ပၞာန်စေအ်စေအ် (ကြပ်ကြပ်) တုဲ အာကၠုၚ်ညိဂှ်လေဝ် ဂကောံဒပ်ပၠန်ဂတး အပ္ဍဲဒေသတံ ဖ္တိုက်ဖၟောဝ်လဝ်ရ။
ညးတာလျိုၚ် နူဒပ်ဗၠးၜးညးဍုၚ်ကွာန်ထဝဲါ (DPLF) မွဲတၠဂှ်လေဝ် ပ္ဍဲသ္ကုတ်ဂၠံၚ် ဂကောံပၠန်ဂတးချဳဓရာၚ်ဇြဟတ်ခိုဟ် နူရေဝ် စဵုကဵုပွိုၚ်ဍုၚ်ပုဠဝ်ဂှ် အဓိက ဓမံက်ကၠုၚ်ပရေၚ်ပၞာန်မာန်ရောၚ် ဂးရ။
“နူရေဝ် ဒဵုကဵုပုဠဝ်ဂှ် ပရေၚ်ထိၚ်ဒဝ်ပၠန်ဂတးတံ ဇြဟတ်ခိုဟ်ရ။ ၜိုတ်လ္တူဍုၚ်ဟေၚ် ကမ္မယှေန်ပၞာန်တံ ထိၚ်ဒဝ်မာန်တုဲ ပ္ဍဲပွဳဗွိုၚ်ကြပ်ဍုၚ်ဂှ်တှေ် ဂကောံဒပ်ပၠန်ဂတးတံ ချဳဓရာၚ်မံၚ်ရ။ ဟိုတ်ဂှ်ရ စွံအဓိကကဵု သ္ကုတ်ဂၠံၚ်ရေဝ်-ပုဠဝ်တုဲ ဓမံက်ကၠုၚ် ပရေၚ်ပၞာန်မာန်ရ” သာ်ဝွံ ညးတာလျိုၚ် (DPLF) ဂှ် ဟီုရ။
ၜိုန်ဂှ်ကီုလေဝ် ဂကောံပၠန်ဂတးတံ ဇြဟတ်ထိၚ်ဒဝ်ခိုဟ်မံၚ်ဂှ်ရ ပသောၚ်တိဍာ် ဟွံလောဲသွာတုဲ ထ္ပက်ကၠုၚ်ပၞာန်မ္ဂး ပေဲါဗ္တိုက်သ္ကာတ်မြဟ်ကၠုၚ်မာန်ရောၚ် ဂးရ။
ဂၠံၚ်ဇၞော် စၟတ် (၈) ဏံဝွံ ဒှ်ဂၠံၚ်ဍာန်တိုက်ကိစ္စဇၞော် ဒေသသ္ကုတ်သၠုၚ်ကျာ မဆက်စၠောံတတ်ကၠောံအာကၠုၚ်ကဵု ပွိုၚ်ဍုၚ်ရေဝ်၊ ဍာ်ဗု၊ တယျက်ချံၚ်၊ လံၚ်လုၚ်၊ တၞၚ်သဳ၊ ပုဠဝ်၊ ကျောန်သု၊ ခမံက်ကျဳ၊ ဗုက်ပျေန် ကေုာံ ပွိုၚ်ဍုၚ်ကံသံၚ်တံတုဲ အခိၚ်လၟုဟ်ဏံ ဟိုတ်နူအကာဲအရာပၞာန်တုဲ မွဲဒမြိပ်ဂၠံၚ်ဂှ်မ္ဂး ပရေၚ်ဒှ်ဂဝိၚ်ဂီုကၠီု သၠုၚ်တိုန်မံၚ်ရ။
ပ္ဍဲကဵုပွဳဗွိုၚ်ကိုန်စဳဇန် သၞေဟ်က္ၜၚ်ဍာ်ဇြိုဟ်ထဝဲါဂှ်ဝွံ သၞာံ (၂၀၂၆) စနူဂိတုဂျာန္နဝါရဳ စဵုကဵုဂိတုမာတ် အပ္ဍဲပွိုၚ် (၃) ဂိတုဂှ်မ္ဂး ပ္ဍဲဒေသဆက်စပ်ကဵု တိဍာ်ကိုန်စဳဇန်ဂှ် ဒှ်အာပေဲါဗ္တိုက် စဵုကဵု (၉) ဝါနွံရဂှ်လေဝ် ဂွံတီကေတ် နူတၚ်နၚ်ဂကောံသုတေသန Investment Monitor ကေုာံ Dawie SEZ Watch ရ။