ပ္ဍဲဒေသကၞောတ်ၜဳရေဝ်၊ ဒၞာဲတိဍာ်ဗော်ဍုၚ်မန်တၟိထိၚ်ဒဝ်ဂှ် ဘဲအန္တရာဲက္ၜၚ်ကျာကဵု အထံက်ကၚ် ဂေတ်ပဝ်မံၚ်အဆက်ဆက် သီုဗ္တံသီုတ္ၚဲဂှ်ရ ညးဒေသပဲါဒဴဘဲပၞာန် (၁၀၀၀) ပြၚ် ဒးပဲါဒဴမံၚ်ဖိုဟ်ရောၚ် ဂွံတီကေတ်ရ။
ပ္ဍဲကၞောတ်ဂိတုမေအိုတ်ဂှ် ဟွံဒှ်ပေဲါဗ္တိုက်မွဲသာ် ပ္ဍဲကဵုကွာန်လ္ၚဵု မၞုံဒေသကၞောတ်ၜဳရေဝ်ဂှ် ဒပ်ကမ္မယှေန်ပၞာန်တံ ဗ္တိုက်ထောံဖျေံဗမ်ကဵုက္ၜၚ်ကျာတုဲ ကၠောန်သ္ပထံက်မံၚ်ကၚ် နူလ္တူအာကာသရ။
ညးပဲါဒဴဘဲပၞာန် ဟွံအောန်နူ (၅) ကွာန်တံဂှ် ပ္ဍဲအခိၚ်တ္ၚဲဂှ် က္လေၚ်လုပ်အပ္ဍဲကွာန် မွဲချိုန်ခဏ က္လေၚ်ရံၚ်ကျောဝ် သ္ၚိဒၟံၚ် ကေုာံ ဗွိုၚ်ကမၠောန်ဂမၠိုၚ်တုဲ ပ္ဍဲအခိၚ်ဗ္တံဂှ် က္လေၚ်ပဲါဒဴအာ ဒၞာဲဗၠးဘဲတေံရ။
“ၜၚ်ကျာဂှ် ကၠုၚ်မံၚ်အရိုဟ်တ္ၚဲ။ အခိၚ်ဗ္တံလေဝ်ကၠုၚ်၊ အခိၚ်တ္ၚဲလေဝ်ကၠုၚ်၊ အောန်အိုတ် မွဲတ္ၚဲ မွဲအလန်ကၠုၚ်မံၚ်။ ဇှ်ရ ဂွိၚ်ဖေက်ဒးဒုၚ်ထောံဖျေံဗမ်။ လ္ၚဵုတံဂှ် အခိၚ်တ္ၚဲ စဴအာကွာန်မွဲစုတ်။ ဗ္တံတှေ် ဟွံမံၚ်ပ္ဍဲကွာန်ပုဟ်။ မၞိဟ်တိက်ပ္ဍဲကွာန်လေဝ်နွံ၊ ဆဂး အောန်။ ပိဘိုအ်မွဲဘိုအ်ရနွံ” သာ်ဝွံ ညးတြုံဒေသရေဝ်မွဲတၠ ဟီုရ။
အပ္ဍဲဂိတုမေတုဲကၠုၚ်တေံ ဟိုတ်နူဗ္တိုက်ကဵုက္ၜၚ်ကျာဂှ်ရ သ္ၚိဒၟံၚ် ဂျပါန်နိပေါန်ဖံၚ်ဒေယှေန် သိုၚ်ခၞံကဵုလဝ်ဒါန်ဂှ် ဒးဗမ်လီုလာ်အာတုဲ တိကၠအ်ဂူ ညးဒေသလ္ၚဵုတံလေဝ် လီုလာ်အာနွံရ။
ညးပဲါဒဴဘဲပၞာန်ဂမၠိုၚ်တံဝွံ ဇူဒီုဒၟံၚ် ပ္ဍဲကၠအ်ဂူ၊ ဘာလကျာ်၊ ပ္ဍဲကွာန် မၞုံအပ္ဍဲဒေသ ကၞောတ်ၜဳရေဝ် ဒၞာဲတိဍာ်ဗော်ဍုၚ်မန်တၟိထိၚ်ဒဝ် ကေုာံ ပ္ဍဲသ္ၚိကလောကောဒေံမသ ဒၞာဲဗၠးဘဲဂှ်တုဲ သွက်ပရေၚ်စသုၚ်မံၚ်စံၚ်ဂှ် ဒးရုန်ဂ္စာန်ဒၟံၚ် ဇၞော်ကဵုဇြဟတ်ရ။
“ညးဒေသတံ ဒးဖေက်ဒၟံၚ် ဘဲၜၚ်ကျာမွဲဓဝ် ဟွံသေၚ်ပုဟ်။ ကိစ္စကရောၚ်ပၞာန်ကမ္မယှေန်ပၞာန်တံ လုပ်ကၠုၚ် တိဍာ်ဗော်ဍုၚ်မန်တၟိထိၚ်ဒဝ်ဂှ်လေဝ်ပါရ။ ညံၚ်ဂွံပြေပြံၚ်ဂှ် မၞိဟ်ဇၞော်တံ ကၠောန်ကဵုဏောၚ် ဟပြေကေတ်မံၚ်စိုတ်ရ” သာ်ဝွံ ညးဒေသ ကၞောတ်ၜဳရေဝ်မွဲတၠ ဟီုရ။
နကဵုညးတာလျိုၚ်ဗော်ဍုၚ်မန်တၟိတံ ဂွိၚ်ဖေက်ကဵုအခေါၚ် ကုကရောၚ်ပၞာန်ကမ္မယှေန်ပၞာန် ထပ်လုပ်စိုပ် အပ္ဍဲတိဍာ်ထိၚ်ဒဝ်လဝ်ဂှ်ကီု ဂးရ။
ပ္ဍဲကၞောတ်ဂိတုဂျောန်အိုတ်တုဲကၠုၚ်ဏံ ကရောၚ်ပၞာန်ကမ္မယှေန်ပၞာန်တံဝွံ နူတိဍာ်ဗော်ဍုၚ်မန်တၟိထိၚ်ဒဝ် ကေုာံ တိဍာ်ဗော်သွးကရေၚ် ကေအေန်ယူ ထိၚ်ဒဝ်မွဲတဆံၚ် သွက်ဂွံလုပ်စိုပ် ဍုၚ်ကျာ်ပိဂှ် အာတ်မိက်လဝ် သွက်ဂွံကဵုအခေါၚ် စကာဂၠံၚ်ဍာန်လ္ၚဵု အပ္ဍဲတိဍာ်ဗော်ဍုၚ်မန်တၟိထိၚ်ဒဝ်ဂှ်ရ။
ဟိုတ်ဂှ်ရ မံၚ်တန်တဴဒၟံၚ် အပ္ဍဲတိဍာ်ဗော်ဍုၚ်မန်တၟိထိၚ်ဒဝ်ကီုလေဝ် သၟာၚ်နူဒးဂွိၚ်မံၚ် နူဒပ်ကမ္မယှေန်ပၞာန် ကၠုၚ်စိုပ်ဗ္တိုက်ကဵုက္ၜၚ်ကျာ အခိၚ်ဟွံရုဲဂှ်တုဲ ကရောၚ်ပၞာန်ဂမၠိုၚ် လုပ်စိုပ်ကၠုၚ်မာန်ဂှ်ရ ပရေၚ်အာကၠုၚ်မံၚ်စံၚ် ဂီုကၠီုဟွံမွဲရဂှ် ညးဒေသဂမၠိုၚ်တံ ဟီုရ။