ဒဒန်ဆာန်ကၟိန် စၟတ် (၂) ၊ ဍုၚ်ဗြဝတဳ၊ ပယျဵုသေံဗၟာဂှ် လ္ပာ်ကမ္မယှေန်ပၞာန်တံ ဟွံပ္တိတ်ကဵုလာၚ်ဇြေန်ဗဗွဲဓဝ်ဂှ်ရ ပရေၚ်လှာဲဗတးဗၞိက်အပ္ဍဲဒေသ ဒေံါဇူမံၚ်ဖိုဟ်ရောၚ် သၟာဗၞိက်ဂမၠိုၚ်တံ ဟီုရ။
ဗွဲကြဴနူပံက်ဒဒန်ဆာန်ကၟိန် စၟတ် (၂) တုဲဂှ် သၟာဗၞိက်ဗွဲမဂၠိုၚ်တံ ပ္တိုန်လဝ်လိုၚ်ဇြေန် အခေါၚ်သွံရာန်ဗဗွဲဓဝ်ကီုလေဝ် နူဌာနဝန်ဇၞော်ကူသာန်သွံရာန် ကေုာံ ပရေၚ်ပိုန်ဒြပ် မဆေၚ်စပ်တံ ဂွံကဵုအခေါၚ်ဂှ် လဇုဲလဇမံၚ်ရောၚ် သၟာဗၞိက်ဗြဝတဳမွဲတၠ ဟီုရ။
“ပံက်ဒဒန်တုဲဂှ်တှေ် လိုၚ်ဇြေန်ဗဗွဲဓဝ်လေဝ် ဟွံဖျေံကဵုဏီပုဟ်ဟီုတှေ် ညးဂွံလဝ်လိုၚ်ဇြေန်ကၠာတေံဟေၚ် ဖ္ဍိုက်မံၚ်အိုတ်ရ။ ယဝ်ရ လ္ပာ်ဗၟာ ဖျေံကဵုလိုၚ်ဇြေန်ဗဗွဲဓဝ်တုဲမှ၊ ကဵုအခေါၚ်ဖ္ဍိုက်အာကၠုၚ် ဗီုဒးစိုတ်တုဲမှ ပရေၚ်လှာဲဗတးဗၞိက်ပယျဵု ပြေပြံၚ်ကၠုၚ်ဏောၚ်ထေၚ်ရ” သာ်ဝွံ ဟီုရ။
ဟိုတ်နူလလောၚ်ပ္တိတ်မူဝါဒ သွက်ဂွံထိၚ်ဒဝ် ကမၠောန်လီဠာန်သြန်အန်လာၚ် မၞုံပ္ဍဲဒေသပယျဵုဂှ်တုဲ ဒးဇီုကပို်က်ကၠုၚ်ကဵု လ္တူပ္တိတ်ကပေါတ်ဗၞိက် ပရေၚ်ပိုန်ဒြပ်နွံရဂှ်လေဝ် သၟာဗၞိက်ဂမၠိုၚ်တံ သ္ၚဳဂၠိပ်လဝ်ရ။
ဟိုတ်ဂှ်ရ ပရေၚ်လှာဲဗတးဗၞိက်ဟွံဗဗွဲဓဝ် ဇၞော်သၠဲလးမံၚ်ဖိုဟ်တုဲ အခိၚ်လဇုဲလဇကဵု စရိတ်အိုတ်သၠုၚ်တိုန်ဂှ်လေဝ် ဒးဆဵုဂဗမံၚ်ရောၚ် ဂွံတီကေတ်ရ။
တုဲပၠန် ကွဳစက်ဖ္ဍိုက်နၚ်ကပေါတ်ဗၞိက် နူကၟိန်ဍုၚ်သေံ မွဲဒမြိပ်ဂၠံၚ်ဍာန် ဗြဝတဳ-ကအ်ကြိက်-ဘာအၚ်ဂှ်လေဝ် ကြပ်ဇၟာပ်တ္ၚဲ ဒပ်ကမ္မယှေန်ပၞာန်တံ ရပ်စပ်စၟဳစၟတ်မံၚ်နွံဂှ် သၟာဗၞိက်ပယျဵုမွဲတၠ ဟီုရ။
“ကပေါတ်စှေ်ကၠုၚ်နူဗြဝတဳတံဂှ် စၟဳစၟတ်ကွေံကွေံရ။ ဆဵုကပေါတ်သေံတှေ် သီ၊ ရပ်ဏောၚ်။ လ္ၚဵုဂှ် က္လေၚ်နုက်ကဵုလှုဲဂွံရ။ လ္ၚဵုဂှ်တှေ် ဒးဒုၚ်သီရ” သာ်ဝွံ ဟီုရ။
ပရေၚ်ရပ်စပ်သာ်ဝွံဂှ် ဟိုတ်နူဂွံဖဵုပရဲ ဂၠိုၚ်နူသြန်အကံက်အခေါန်ဓမ္မတာဂှ်ရ ကၠောန်သ္ပမံၚ်ရောၚ် သၟာဗၞိက်လ္ၚဵုတံ ဟီုရ။
ဒဒန် စၟတ် (၂) ဏံဝွံ ဒှ်ဂၠံၚ်ဍာန်လှာဲဗတးဗၞိက်အဓိက ပယျဵုသေံဗၟာမွဲတုဲ ကပေါတ်ရပ်စပ်၊ ကပေါတ်စၞစ ကေုာံ ကပေါတ်စက်ဗွဲအပြောံဂမၠိုၚ် နူကၟိန်ဍုၚ်သေံ လုပ်စိုပ်ကၠုၚ်မံၚ်ရ။
အခိၚ်ကၠာတေံ ဟိုတ်နူအကာဲအရာဂီုကၠီုပယျဵုဂှ် တၟာတ်ထောံလဝ် ပွိုၚ် (၁၀) ဂိတုတုဲ ပ္ဍဲသၞာံ (၂၀၂၆) ၊ ဂိတုမေ (၂၈) ဂှ် က္လေၚ်ပံက်လဝ်ရ။
ပ္ဍဲကဵုပရိုၚ် Thai PBS North ဂှ်လေဝ် လ္တူကပေါတ်ဗၞိက်သေံ ဆက်လဇုဲလဇ တၟာတ်ဆိုအ်မံၚ်ဂှ် နကဵုအလဵုအသဳမဆေၚ်စပ်တံ ဒးပသောၚ်ကဵုတုဲ သွက်ဂွံက္လေၚ်သ္ၚဳဂၠိပ် မူဝါဒသၞောတ်ဗ္ၜတ်ဂှ်လေဝ် လ္ပာ်တၠကမၠောန်သေံတံ အာတ်မိက်လဝ်ကီု ဓမံက်ထ္ၜးလဝ်ရ။
နကဵုကပေါတ်ဗၞိက်ပၠောပ်နူပယျဵုဗြဝတဳဂှ်ဝွံ ကဵုလဝ်အခေါၚ်လိုၚ်ဇြေန်ပၠောပ်ဗၞိက် ကပေါတ်စၞစ၊ ကပေါတ်ရပ်စပ် ကေုာံ ကပေါတ်စက်ဗွဲအပြောံဂမၠိုၚ်ရောၚ် နူဌာနက္ဍိုက်က္ဍိုပ်ကူသာန်သွံရာန် ကေုာံ ပရေၚ်ပိုန်ဒြပ် သၟဝ်တဲကမ္မယှေန်ပၞာန် လလောၚ်ပ္တိတ်လဝ်ရ။
ပ္ဍဲကဵုဗလးတိဂှ် တၟာတ်လဝ်လိုၚ်ဇြေန် ပၠောပ်ပ္တိတ်ကပေါတ်ဗၞိက်ဖိုဟ်တုဲ ညးမဆက်စပ်ကဵု ဂကောံကမ္မယှေန်ပၞာန်ဂမၠိုၚ်တံဂှ် ဖျေံကဵုမံၚ်လို်ၚ်ဇြေန် ပၠောပ်ပ္တိတ်ကပေါတ်ဗၞိက်ရောၚ် ဂးရ။