အကြာကံင်ဇြဳက္ဍိုက်က္ဍိုပ်ဖေဝ်ဒရေဝ်ဒဳမဝ်ကရေဇြဳသ္ဂောံမံက်ဂတဝ် SCEF ကေုာံ ဂကောံဇြဟတ်ပၠန်ဂတးမန်ဂမၠိုင်ဝွံ ဆေင်စပ်ကဵုတင်နွံပၟိက် လၟေင်ကမၠောန်ပရေင်ဍုင်ကွာန်အဓာန်ဂတကဵု အကာဲအရာပရေင်ဍုင်ကွာန်တ္ၚဲဏံတုဲ ပ္ဍဲဂိတုဂျူလာင် စၟတ်တ္ၚဲ (၂၁) တုဲကၠုင်ဏံ ဆဵုဂဗသဳကၠဳလဝ်ညးသ္ကံရောင် ဂွံတီကေတ်ရ။
ပ္ဍဲကဵုပေဲါဆဵုဂဗဂှ်ဝွံ ကံင်ဇြဳညးမဒုင်ချပ်ဂၞန် တွဵုရးဍုင်မန် (MSCC)၊ ဗော်ဍုင်မန်တၟိ ဗ္တိုက်သရိုဟ်တၠအဝဵုပၞာန် NMSP-AD၊ ကံင်ဇြဳဖေဝ်ဒရေဝ်ဍုင်မန် (MSFC)၊ ကမ္မတဳသ္ပစၞးကၠတ်ထဝ် တွဵုရးဍုင်မန် (CRMH) တံ ပါလုပ်မံင်ရောင် နူကဵု SCEF လလောင်ပ္တိတ်လဝ်ဂှ် ဂွံတီကေတ်ရ။
အကြာဂကောံဇြဟတ်တွဵုရးကဵု ဒပ်ပံင်ကောံပၠန်ဂတးတံဝွံ အကာဲအရာ ပရေင်ဍုင်ကွာန်၊ ပရေင်ပၞာန် ပြံင်လှာဲကတဵုဒှ်မံင်တ္ၚဲဏံဂှ် သဳကၠဳသ္ၚဳဂၠိပ်ဂတးဂတုန်တုဲ လၟေင်ကမၠောန်ဒးရေင်တၠုင်အဓာန်ဂတတံဂှ် ချပ်ဂၞန်မာန်ကီု ဂွံတီကေတ်ရ။
ပ္ဍဲကဵုပေဲါဆဵုဂဗသဳကၠဳဂှ်ဝွံ သဘာပတိ SCEF ခူဥူရေဝ်ကဵု ဗော်ဍုင်မန်တၟိ ဗ္တိုက်သရိုဟ်တၠအဝဵုပၞာန် နာဲဇဲယ၊ ဝန်ဇၞော်ကၟိန်ဍုင် မာန်ဝေန်ခါင်တာန် ကေုာံ ဥက္ကဌကမ္မတဳပရေင်အုပ်ဓုပ် ကံင်ဇြဳဖေဝ်ဒရေဝ်ဍုင်မန် (MSFC) နာဲမန်သာင်တံ ပါလုပ်သဳကၠဳအဓိကရ။
တုပ်သာ်ဂှ်ကီု ပ္ဍဲဂိတုဂျူလာင် စၟတ်တ္ၚဲ (၂၀) တုဲကၠုင်ဏံဂှ်လေဝ် SCEF ဆဵုဂဗသဳလဝ်ကဵု ညးတာလျိုင်ဒပ်ပံင်ကောံမဟာမိတ် ပၠန်ဂတးတမ်က္ညင် (SRA) တံဏီရ။
နူကဵုဆဵုဂဗတၞဟ်ခြာလၟုဟ်ဏံမွဲတဆံင် အကြာပၠန်ဂတးကဵု ဂကောံဇြဟတ်ဖေဝ်ဒရေဝ်ဂမၠိုင် သွက်သ္ဂောံရေင်တၠုင် သၠုင်ပခိုင်ပ္တိုန် ပရေင်ပံင်ကောံရေင်တၠုင် မဟာမိတ်ရောင်ဂှ်လေဝ် နူ SCEF လလောင်ပ္တိတ်လဝ်ရ။