ပ္ဍဲတွဵုရးဍုင်မန်ဝွံ စပ္တံနူလဒေါဝ်ဂိတုဂျူလာင်ဏံ ၚုဟ်မးကပေါတ်စၞစသုင်သဇိုင်အပ္ဍဲဍုင် သၠုင်တိုန်ကၠုင်ဒၟံင်တုဲ ဒးဆဵုဂဗမံင် ဘဲဒဏ်ၚုဟ်ကပေါတ်ဖျာက္ဍင် ဗွဲမကၠးဖ္ဍးရောင် ညးစသုင်ကဵု ညးသွံဂမၠိုင်တံ ဟီုကဵုဌာန်ပရိုင်ဗၠးၜးမန် IMNA ရ။
တုပ်သၟဟ်ကဵု ရးဒေသဇၞော် ကေုာံ တွဵုရးတၞဟ်ဂမၠိုင်ကီု စၞစလၟေင်တ္ၚဲ ခၟာဲစာင်မွဲမ နူ (၇၀၀) ဂှ် စဵုကဵု (၈၀၀) သၠုင်တိုန်မံင်တုဲ သၞေဝ်ကေဝ်၊ လသိုန်ဗ္ကေတ်/ဗ္တာင်၊ သတ်ဆုသတ်ဒုန် ကေုာံ ကၠေင်စဂမၠိုင်ဂှ်လေဝ် ၚုဟ်သၠုင်တိုန်မံင်ကီုရ။
ၚုဟ်ကပေါတ်စၞစသုင်ဂမၠိုင်ဝွံ ၚုဟ်မးတ္ၚဲယးဂတဂှ် အကာဲအရာတော်ခယျဟွံမာန်တုဲ ဒးဒုင်ကဵုမံင်ဇြဟတ်ဓရိုဟ် ကုဝိုင်ပုင်ဇၟာပ်သ္ၚိကၟိန်ရောင် ညးဒေသဇြပ်ဗုမွဲတၠ ဟီုရ။
“လောန်ကၠုင်ၜိုတ်မွဲအဒိုတ်ပြင်ဂှ် တိုန်ကၠုင်ရ။ ပြဿနာဆိင်ဆစကာကၠေင်စက်ကဵု ၚုဟ်ကၠေင်လေဝ် တိုန်ကၠုင်ရ။ လသိုန်ဗ္ကေတ် နူ (၄၀၀၀) ဂှ် (၇၀၀၀) ၊ ခၟာဲစာင်မွဲမ (၇၀၀) ၊ ကၠေင် (၈၅၀၀) ဒှ်မံင်ဓမ္မတာဣရ။ တိုန်တှ်ေလေဝ် ဒးစဂှ်ရ” သာ်ဝွံ ဟီုရ။
စနူဂိတုဂျောန်မံက် စဵုကဵုဂိတုဂျူလာင် (၁၅) အပ္ဍဲပွိုင်မွဲဂိတုပြင်ဂှ်ဝွံ ပ္ဍဲကဵုဗွဝ်ဖျာသ္ၚုပ္ဍဲဍုင်ဂှ် ၚုဟ်မးဂကူသ္ၚုဂမၠိုင် နူကဵုမွဲရိုက် (၂၀၀၀) ဂှ် သၠုင်တိုန်ကၠုင် စဵုကဵု (၁၀၀၀၀) ဒကေဝ်ရ။
ပရူပရာၚုဟ်မးကပေါတ်ဖျာဂွံတိုန်ဂှ်ဝွံ ဟိုတ်နူဗြဲဂူ ကပေါတ်တိတ်နူဒေသ လီုလာ်ဂၠိုင်တုဲ ဒးပတှ်ေကပေါတ်တိတ်နူဒေသတၞဟ်ဂမၠိုင်ကဵု စရိတ်ပလံင်ဗ္စိုပ်ဂှ်ရောင် သၟာဗၞိက်ဂမၠိုင်တံ သ္ၚဳဂၠိပ်လဝ်ရ။
ညးသွံရာန်ဖျာသၞေက်မွဲတၠဂှ် “ကပေါတ်ဂှ် ဟွံပိုတ်ပုဟ် ကေတ်ဂွံမံင်ရ။ ဆဂး ကၠုင်နူဒေသတၞဟ်တှ်ေ ၚုဟ်ဂၠိုင်ရ။ ၚုဟ်ဂၠိုင်ကၠုင် ၜိုတ်ကဝက်ရ။ ၜဲဒါတ်တံ ခဍောင်တံ မွဲပဿာတှ်ေ နူ (၂၀၀၀) ဂှ် ဒှ်တိုန် (၄၀၀၀) ရ။ ဗြဲဇၞော်တှ်ေ သၞေဝ်ကေဝ်တံလေဝ် လီုလာ်ဂၠိုင်ရ” သာ်ဝွံ ညးဟီုရ။
ၚုဟ်မးခၟာဲစာင် အခိင်ဥတုရာသဳပြံင်လှာဲဏံဝွံ ဟိုတ်စာင်ဒှ်ယဲကီု၊ ၚုဟ်စၞစာင်သၠုင်တိုန်ကီုဂှ်ရ ၚုဟ်ခၟာဲစာင်သၠုင်တိုန်ကၠုင်ရောင် ညးသွံရာန်တံ ဟီုရ။
အာယုက်အလဵုအသဳကမ္မယှေန်ပၞာန် စဵုကဵု (၁၀၀) တ္ၚဲပြင်ကၠုင်ဏံ ပြဒ္ဒညာၚုဟ်မးကပေါတ်၊ ၚုဟ်မးကၠေင်စက် သၠုင်တိုန်ကၠုင်မံင်ဏံဂှ် ပ္တိတ်ကဵုနဲကဲပသောင်ဟွံမာန်ဂှ်ရ ပရေင်ဖန်ဇန်ကောပ်ကာဲပရေံမံင်ရောင် ညးစုက်လုက်ကဵု ညးစၞးကၠတ်ထဝ်မွဲတၠ ဟီုရ။
“ဒးပုံစုတ်ကဵု အလဵုအသဳဟေင်ရ၊ ပရေင်ဖန်ဇန်ကောပ်ကာဲဍေံတံ ပရေံမံင်ရ၊ ၚုဟ်ကပေါတ်ဂွံစှ်ေဂှ် ပ္တိုန်မံင်ဂလာန် ပ္ဍဲကၠတ်ထဝ်ရ၊ အစဳဇန်ဗီုလဵုဂွံကၠောန်ဂှ်လေဝ် ဟီုဟွံမာန်ရ။ (၁၀၀) တ္ၚဲပြင်အာကီုလေဝ် စဳဇန်ကဵုၚုဟ်ကပေါတ် ဟွံမာန်ပုဟ်။ ဂေတ်မံင်ဟဂှ်ရ။ ၚုဟ်ကပေါတ်တိုန်၊ ကၠေင်တိုန် ပသောင်ဟွံလေပ်ပုဟ်။ နဲကဲပသောင်ဂှ်လေဝ် ဍေံဟွံသေင်ပုဟ်။ မွဲမ (၅၅၀) မွဲတ္ၚဲ ၜိုတ်သွံကဵုမွဲကိုဋ်ဂှ် နဲပသောင်ဟွံသေင်ပုဟ်” သာ်ဝွံ ညးဟီုရ။
အခိင်လၟုဟ်ဏံဝွံ ညးဍုင်ကွာန်တံ ဟိုတ်နူသြန်လုပ်သြန်တိတ် ဟွံတုပ်သၟဟ်ဂှ်ရ ဒးဖအောန်စဒၟံင် ကပေါတ်စၞစသဇိုင်ဂမၠိုင်တုဲ သွက်ပရေင်စသုင်မံင်စံင်ဂှ် ဒးဆဵုဂဗမံင်ကဵု တင်ကော်ဆောဗွဲမဂၠိုင်ရ။
နကဵုအလဵုအသဳတံ စပ်ကဵုပရေင်ၚုဟ်မးကပေါတ်သ္ဂောံစှ်ေကဵု ဂွံညိင်ဝတ်တုဲ ဗီုလဵုဂွံရေင်တၠုင်စဳဇန်ကဵုရောဟီုဂှ် ပ္ဍဲကၠတ်ထဝ်ညးဍုင်ကွာန်အလန်တတိယ မကၠောန်ဗဒှ်လဝ် ပ္ဍဲဂိတုဂျူလာင် စၟတ်တ္ၚဲ (၂၂) ဏံဂှ် ပ္တိတ်တင်သၟာန် သၟာန်လဝ်နွံရောင် ဂွံတီကေတ်ရ။