ပ္ဍဲကဵုဗဒဲါကွာန်ဠောန်ည၊ ပွိုၚ်ဍုၚ်ဘာအၚ်၊ တွဵုရးကရေၚ်ဂှ်ဝွံ ဂကောံသၟတ်ဍိုက်ကၠုၚ်ကွဳလိုန်ဓာတ်တံ ဒးဒုၚ်ဗ္တိုက်ဗၠေတ်မှာတုဲ သၟတ် အာယုက် (၁၇) သၞာံမွဲတၠ ဒးချိုတ်အာလဝ်ရောၚ် ဂွံတီကေတ် နူညးစုက်လုက်ကဵု ဂကောံသ္ၚိကၟိန်တံရ။
ပ္ဍဲဂိတုဂျောန် (၂၉) တုဲကၠုၚ်ဏံ ဂကောံသၟတ် မတိတ်ကၠုၚ်ကဵုကွဳလိုန်ဓာတ် နူဇရေၚ်ဍာ်ကၟာဠောန်ည၊ အခိၚ်ကြပ်စိုပ်ကွာန်ဠောန်ညဂှ် ဂကောံမၞိဟ် မရပ်လဝ်မြ၊ လေံ မွဲဂကောံတံ ဗက်ဗ္တိုက်ဏာနူလ္ပာ်လက္ကရဴရောၚ် ဂွံတီကေတ်ရ။
သၟတ် အာယုက် (၁၇) သၞာံမွဲတၠ အဃောပဲါဓလေဝ် နူကဵုညးဗက်ဗ္တိုက်မွဲတၠ ဗာ်လွိၚ်ဏာကဵုမြဂှ် ကွဳလိုန်ဓာတ်ကတဵုဒှ်အာ ဘဲအန္တရာဲတုဲ ဒးချိုတ်အာလဝ်ရောၚ် ကောန်ကွာန်စုက်လုက်ကဵု ဂကောံသ္ၚိကၟိန်မွဲတၠဂှ် ဟီုကဵုဌာန်ပရိုၚ်ဗၠးၜးမန် IMNA ရ။
“ဍေံတံ အာၜိၚ်ဍာ် ပ္ဍဲကၟာဍာ် (ရေပြာအိုၚ်) ဂှ်ရ။ ဗၠာဲသၟူလေၚ်တံလေဝ်။ မၞိဟ် ၜိုတ် (၂၀) ဂှ် ဗက်ကၠုၚ်လက္ကရဴဍေံတံတုဲ ဗက်ဗာ်တက်ကဵုလေံရ။ အဃောဍေံတံဂြိပ် ဒဳတိတ်ဂှ် ကောန်ၚာ်ဏံ ဒှ်မံၚ်လက္ကရဴအိုတ်ရ။ ဂကောံဒပ် PC ပါမံၚ် အေပ္ဍဲဂကောံဂှ်ဂှ် ဗာ်ကၠဟ်ထဝေၚ်ကဵုဗြတုဲ အဃောပဲါဂှ် ဇီုဒးကာဂတဂှ်ရ” သာ်ဝွံ ဟီုရ။
ဟိုတ်နူဇီုဒးကွဳစက်ကာဂှ်ရ သၟာၚ်နူဇုတ်ဒဳကဝ်၊ တဲကဝ်မ္ဂး ဒးဝပ်ပ္ဍဲက္ဍိုပ် ဗွဲမသကာတ်မြဟ်တုဲ အဃောပလံၚ်ဗ္စိုပ်လွဳလွတ် ပ္ဍဲရုၚ်ဂဥုဲညးဍုၚ်ကွာန်ဘာအၚ်ဂှ် ဂိတုဂျူလာၚ် (၁) နူတနေံဏံ ချိုတ်အာရ။
ပ္ဍဲကဵုညးဗက်ဗ္တိုက် နကဵုမြ၊ ကဵုလေံဂှ်ဝွံ ကောန်ဒပ်ကံၚ်ဇြဳၜိုဟ်လလမ်ကရေၚ် KNLA- PC လေဝ် ပါလုပ်မံၚ်ဂးတုဲ ကောန်ဒပ်မွဲတၠဂှ်ဟေၚ် ကၠဟ်ထဝေၚ်ဗာ်ဏာကဵုမြရောၚ် ကောန်ကွာန်လ္တူဂှ် ဟီုရ။
“မၞိဟ်ဗက်ဗာ်ကဵုမြဂှ် ဂကောံရပ်လွဟ်ကရေၚ်ရ။ မၞိဟ်သှေ်တံဂှ်လေဝ် မၞိဟ်မူစိပါလုပ်ပ္ဍဲဂကောံဂှ် ဟွံတီပုဟ်။ ဇီုတေက်ဒးကာဟီုကီုလေဝ် ဟိုတ်နူမၞိဟ်ဗက်ဗာ်ကဵုမြတုဲ ဒးချိုတ်အာရ။ မၞိဟ်ဗက်ကဵုမြဂှ်ရ မိက်ဂွံကဵုကေတ်အရေဝ်” သာ်ဝွံ ညးဆက်ဟီုရ။
ဂကောံသၟတ်တံဝွံ ဒးဒုၚ်ဗ္တိုက်မၞိဟ်ဗၠေတ်မှာတုဲ ကၠာတေံလေဝ် ပ္ဍဲပွဳဗွိုၚ်ဘာအၚ်ဂှ် ဂကောံသၟတ် ရပ်လဝ်မြ၊ လေံတံ ကြမ်ကြဗ္တိုက်မံၚ် မွဲနှေံမွဲနှေံနွံရဂှ်လေဝ် ကောန်ကွာန်တံ ဟီုရ။
အခိၚ်လၟုဟ်ဏံဝွံ ဂကောံသ္ၚိကၟိန်သၟတ်မဒးဒုၚ်ချိုတ်အာဂှ် ဟွံဂွံပံက်တေၚ်အမှု ဇရေၚ်ဂကောံဗၠာဲသၟိၚ်ကီုလေဝ် ကောန်သ္ဂံၚ် KNLA-PC မဒှ်သံသယ ပါလုပ်ဆေၚ်စပ်ကဵု ပ္ဍဲပရူဒဒှ်ဂှ်ဝွံ ညးတာလျိုၚ်မဆေၚ်စပ်တံ စၟဳစၟတ်ဂၠိုက်ဂၠာဲတုဲ သွက်ဂွံအရေဝ် ဗွဲမကိတ်ညဳကဵု သၞောဝ်ဥပဒေကီု၊ သွက်ဂွံသောၚ်ကဵု ပရူဒဒှ်ကၠးကၠးဖ္ဍးဖ္ဍး ဗွဲမပြဟ်ကီုဂှ် အာတ်မိက်လဝ်ရောၚ် ဂွံတီကေတ်ရ။