ဂိတုဂျူလာၚ် စၟတ်တ္ၚဲ (၂) နူတနေံဏအ်ဝွံ အပ္ဍဲကၟိန်ဍုၚ်သေံ၊ ခရိုၚ်ချောမ်ၜုရဳ ကောန်ဍုၚ်သ္အာၚ် ပံက်လဝ်ရုၚ်ကမၠောန်သွံဖျာ ဟွံလုပ်ကဵုသၞောဝ်ဂှ်ကီု သီုပါလုပ်ကောန်ဍုၚ်ဗၟာ အပံၚ်လၟိဟ်မၞိဟ် (၁၆) တၠ ဗၠာဲသၟိၚ်သေံတအ် လုပ်စၟဳစၟတ်ရပ်စပ်ဂွံလဝ်နွံရောၚ် ဂွံတီကေတ်ရ။
အပ္ဍဲကဵုမပံက်လဝ်ရုၚ်ကမၠောန်သွံဖျာဏအ်ဝွံ ကောန်ဍုၚ်ဗၟာ (၅) တၠ၊ ကောန်ဍုၚ်လော (၄) တၠ၊ ကောန်ဍုၚ်ဂါမ္ဗဝ်ဒဳယျာ (၂) တၠ ကဵု ကောန်ဍုၚ်တၞဟ်သ္အာၚ် (၅) တၠ အပံၚ်လၟိဟ်မၞိဟ် (၁၆) တၠဏအ်ဂှ် နဒဒှ်သၞာဲဒဴ လုပ်ကၠောန်မံၚ်ကမၠောန်ရ။
တုဲပၠန် ကောန်ဍုၚ်ဗၟာမွဲတၠဂှ်မ္ဂး ညးတာလျိုၚ်ဗၠာဲသၟိၚ်သေံတအ် အာတ်ဗဵုတၞးလိက်သက်သဳ ကုညးတေအ်တုဲ ဟိုတ်နူဟွံပေၚ်စိုတ် မွဲအသိၚ်ထေဲဂှ် တံၚ်ဂြဲပဠောံ ဂၠာဲကၠုၚ်ဒုဟ် ကုညးတာလျိုၚ်ဗၠာဲသၟိၚ်သေံတအ်ရ။
အတိုၚ်အလဵုအသဳသေံတအ် ဖျေံကၠုၚ်လဝ်သၞောဝ်ဂှ်မ္ဂး ပွမပံက်ဆေၚ်ခေပ်သော်၊ ဆေၚ်ကျိုၚ်ကျဝ်၊ ဆေၚ်စသုၚ်၊ ဆေၚ်သွံကပေါတ်နာနာသာ်ကီု သီုပါလုပ်ဆေၚ်သွံဇဗၠုသတ်တအ်ဂှ် သွက်ကောန်ဍုၚ်သ္အာၚ်ကီု ကောန်ဍုၚ်မန်ဗၟာကီု ဟွံကဵုလဝ်အခေါၚ်ကၠောန် ပ္ဍဲကၟိန်ဍုၚ်သေံပေၚ်ပေၚ်ရောၚ်။
ဒှ်သာ်ဂှ်ရ သၟာကမၠောန်ကောန်ဍုၚ်သ္အာၚ် (၁၆) တၠ သီုပါလုပ်ကောန်ဍုၚ်ဗၟာတအ်ဂှ်ဝွံ ညးတာလျိုၚ်ဗၠာဲသၟိၚ်သေံတအ် ရပ်ထိၚ်စၟဳစၟတ်မံၚ်တၞးလိက်သက်သဳတုဲ နကဵုအမှုလုတ်လောန်လဝ်ဒုဟ်ဂမၠိုၚ်တအ်ဂှ် ကေတ်အာအရေဝ်ပေၚ်ပေၚ်မာန်ရောၚ်။
ပ္ဍဲကၟိန်ဍုၚ်သေံဝွံ စနူသၞာံ (၂၀၂၆) ဏအ်မံက်တုဲဂှ် ညးတာလျိုၚ်ဗၠာဲသၟိၚ်သေံတအ် ပတေၚ်ကၠုၚ်လဝ် ပရေၚ်ရပ်စပ်စၟဳစၟတ် ကုသၟာကမၠောန်ကောန်ဍုၚ်သ္အာၚ် သီုပါလုပ်ကောန်ဍုၚ်မန်ဗၟာတအ်တုဲ အပ္ဍဲဂှ်မ္ဂး ညးတၞးလိက်သက်သဳဟွံဍိုက်ပေၚ်၊ ညးကၠောန်ကမၠောန်သွံဖျာ ဟွံဒ္ဂေတ်ဗက်သၞောဝ်ကၟိန်ဍုၚ်သေံ၊ ညးသုၚ်စောဲဂဥုဲၜူမာဲ မပ္တံကမၠောန်ဗၠေတ်သၞောဝ် လုတ်လောန်ဒုဟ်နာနာတအ်ဂှ် ဇၟာပ်ဒေသခရိုၚ် ဗက်စၟဳစၟတ်မံၚ်အဆက်က်နွံရ။
ဗီုရုပ် – Thai News