စက်အေန်တာနိတ် သတာလေန် Starlink လ္ၚဵု မစကာဒၟံၚ်အပ္ဍဲဍုၚ်ကီု သီုဒေသပယျဵုသေံဗၟာဂှ်ဝွံ စနူဂိတုဂျူလာၚ် စၟတ်တ္ၚဲ (၂) နူတနေံဏံ အခိၚ်နူဂယးဂှ်တုဲ နူကမ္ပဏဳ Space X ဒးဒုၚ်တၟာတ်ဂှ်ရ ညးစကာတံ ဒှ်ဂဝိၚ်ကဵု ပရေၚ်ဆက်စၠောံပိုတ်သ္ကုတ်ရ။
အခိၚ်လၟုဟ်ဏံဝွံ ဒၞာဲဒေသရေၚ်တၠုၚ် သတာလေန်ဟွံသေၚ်မွဲသာ် စကာဒၟံၚ်ကီု၊ စက်ပ္တိုန်လဝ်စရၚ်နူတမ် မစကာနူမ္ၚးဍုၚ်ဂှ် တ္ၚဲစၟတ်လဝ်ပေၚ်အာတုဲ သၞောတ်ဗ္ၜတ်ထောံ အခေါၚ်စကာရောၚ် နူ Space X ကမ္ပဏဳ ပလံၚ်ဗ္စိုပ်ဒၟံၚ်လိက်အဳမေ ဇရေၚ်ညးစကာသတာလေန်တံဂှ်ကီု ဂွံတီကေတ်ရ။
တ္ၚဲဏံ ဂိတုဂျူလာၚ် (၃) အခိၚ်နူဂယးဏံဝွံ စက်သတာလေန်စကာဂွံ လ္တူဍုၚ်ကျာ်ပိ အောန်ကၠုၚ်ဂှ်ရ အခိၚ်ဒှ်ဂဝိၚ်ကဵု ပရေၚ်ပၞာန်၊ ပရေၚ်ဂီုကၠီုဏံ ဂိၚ်ဖေက်အေန်တာနိတ်ပိုတ်သ္ကုတ်ရဂှ် ညးဒေသဍုၚ်ကျာ်ပိမွဲတၠ ဟီုကဵုဌာန်ပရိုၚ်ဗၠးၜးမန် IMNA ရ။
“လ္ပာ်ပိုဲတံလေဝ် စကာဟွံဂွံတံ၊ ဟွံဂွံလာၚ်တံ ဂၠိုၚ်ရ။ ဒှ်မံၚ်ဗီုဏံ ဂွံၜိုတ်မွဲအဒိုတ်ရ။ တ္ၚဲဏံဂှ်တှေ် ပရေံကွေံရ။ ပ္ဍဲကဵုပိုဲတံဂှ်လေဝ် လၟုဟ် လ္ပာ်ကျာ်ပိဏံ ဂွံမိၚ်မံၚ်ပရိုၚ်နာနာဏောၚ်တှေ် ပ္ဍဲကာလဏံ ဒှ်မံၚ်ဓဝိၚ်ညိညိရ” သာ်ဝွံ ညးဒေသဂှ် ဟီုရ။
လၟိဟ်စက်သတာလေန်စကာဂွံ အောန်စှေ်ကၠုၚ်ဗက်ဟွံဂတာပ် ဂွံစကာဍေံဂှ် ဒှ်ဂဝိၚ်ကဵု ၚုဟ်က္ဍၚ်တိုန်ရောၚ် ဂးရ။
ဟိုတ်နူဗ္တိုက်သရိုဟ်ကမၠောန်လီဠာန်သြန်အန်လာၚ် မၞုံဒေသပယျဵုသေံ-ဗၟာတုဲ ညးဒေသကျာ်ပိ ဒှ်အာခက်ခုဲကဵု ပရေၚ်ဆက်စၠောံတံဂှ်ဝွံ နကဵုအရီုဗၚ် ညးပၠောပ်သွံရာန်ဒၟံၚ် Starlink နူပယျဵုမွဲတဆံၚ် ကေုာံ ဂကောံရပ်လွဟ်အပ္ဍဲဒေသတံဂှ်တုဲ စကာမံၚ် အေန်တာနိတ်သတာလေန် ပ္ဍဲရုၚ်စက်၊ ရုၚ်ကမၠောန်၊ ခဒမ် ကေုာံ ပ္ဍဲသ္ၚိဒၟံၚ်ကြပ်သီုဖအိုတ် လှဲလှဲလးလးရ။
စဵုကဵုအခိၚ်လၟုဟ်ဏံ စက်ဒးဒုၚ်တၟာတ်လဝ်ဂမၠိုၚ်ဂှ်ဝွံ ညးစကာစက်တၟိ ဟွံဂွံပ္တိုန်စရၚ်ဏီတံ ပါလုပ်တုဲ စက်ပ္တိုန်လဝ်စရၚ်ဂမၠိုၚ်ဂှ်လေဝ် ပါလုပ်မံၚ်ကီုရောၚ် ညးစိုန်သကီုနဲကဲပညာမွဲတၠ ဟီုရ။
“အဓိက စက်တၟိဖံက်ပါကေန်တံဂှ်တှေ် ဗီုကဵုပံက်ဟွံဂွံလေဝ်ဏး။ ဒုတိယမွဲပၠန်ဂှ်တှေ် ပ္ဍဲကဵုဍုၚ်အခေါၚ်ဟွံမွဲဂှ် စကာမံၚ်ဂးတုဲ ကဵုသတိကဵုအဳမေ။ အေစက်ဗီုဂှ်ဂှ်တှေ် ပံက်လဝ် ၜိုတ်မွဲဂိတု ၜါဂိတုဟေၚ်နွံရ။ တတိယမွဲပၠန်ဂှ်တှေ် ပ္ဍဲကဵုဍုၚ်အခေါၚ်စကာဟွံမွဲဂးတုဲ ကၟာတ်ထောံပေၚ်ပေၚ်ရ” သာ်ဝွံ ဟီုရ။
အတိုၚ်အကာဲအရာတ္ၚဲဏံမ္ဂး လၟိဟ်စက်ဒှ် Restricted ကဵု လၟိဟ် message လုပ် အောန်ကၠုၚ်ကီုလေဝ် အခိၚ်ဟွံရုဲ အကာဲအရာပြံၚ်လှာဲမာန်ရဂှ်လေဝ် ညးစိုန်သကီုနဲကဲပညာတံ ဟီုရ။
သၟာၚ်နူဒးဒုၚ်တၟာတ် နကဵုဗၞတ်ဗ္ၜတ်အလုံကၟိန်ဍုၚ်ဂှ်တုဲ ဟွံဂွံအခေါၚ်ဗဗွဲဓဝ်ဗီုဗၟာမွဲသာ် ပ္ဍဲကၟိန်ဍုၚ်ဂၠးတိ ကၠတ်စကာဒၟံၚ်ဂှ်လေဝ် ဒးဒုၚ်တၟာတ်မံၚ်ကီုရ။
မူဝါဒရေၚ်တၠုၚ်သတာလေန် တေၚ်ဂြတ်ကၠုၚ်ဏံဂှ်ဝွံ ဟိုတ်နူဂိုဏ်ကျာဖျ စကာစက်အေန်တာနိတ်သတာလေန်ဂၠိုၚ်ကၠုၚ်ကီု၊ နူလဝ်ဗဳကမ္မယှေန်ပၞာန် အာတ်မိက် သွက်ဂွံတေၚ်ဂြတ်ပ္တိုန် ပရေၚ်စကာသတာလေန်ကီု သာ်ဝွံ မပ္တံအကာဲအရာဂမၠိုၚ် ဒှ်မာန်ရောၚ် ညးစိုန်သကီုနဲကဲပညာတံ သ္ၚဳဂၠိပ်လဝ်ရ။
ပ္ဍဲကၟိန်ဍုၚ်ဗၟာဝွံ ဒၞာဲကတဵုဒှ်ပေဲါဗ္တိုက်ဗွဲမဂၠိုၚ်ဂှ် သၟာၚ်နူဒးဒုၚ်ထ္ပိုတ် လာၚ်ဖုၚ်၊ လာၚ်အေန်တာနိတ်တုဲ ဟိုတ်နူပသောၚ်ကမၠောန်ကျာဖျ ဒေသပယျဵုဂှ်ရ ပ္ဍဲဒေသသ္ကုတ်သၠုၚ်ကျာကၟိန်ဍုၚ်ဗၟာဂှ် စကာကၠုၚ် အေန်တာနိတ် (သတာလေန်) သာဂၠိုၚ်ကၠုၚ်ရဂှ်လေဝ် ဂွံတီကေတ်ရ။