ပ္ဍဲဍုၚ်မတ်မလီု၊ တွဵုရးဍုၚ်မန် ကတဵုဒှ်မံၚ် အမှုဂစိုတ်မၞိဟ်၊ အမှုကၠတ်ဂၠံက်ပၠံၚ်ၜး မပ္တံအမှုဒုစရိုတ်ဂမၠိုၚ်ဂှ် ညးတာလျိုၚ်ကမ္မယှေန်ပၞာန်တံ ကေတ်အရေဝ်ဗွဲမစိုပ်တရဴဟွံမာန်ရဂှ် ဂွံတီကေတ် နူညးဒေသဍုၚ်မတ်မလီုတံ ဟီုဂးလဝ်ရ။
ဂိတုဂျူလာၚ် စၟတ်တ္ၚဲ (၂) တုဲကၠုၚ်ဏံ ပ္ဍဲရေၚ်ဒဵု View Point ဍုၚ်မတ်မလီုဂှ် ပရူဒဒှ် ညးဒဳတက္ကသဳကွဳလိုန်ဓာတ် အာယုက် (၄၅) သၞာံမွဲတၠ ချိုတ်မံၚ်နကဵုဘဲဝပ် ဒး ဒုၚ်ထ္ပက်လဝ်ပ္ဍဲကအ်ဂှ် ကတဵုဒှ်ကၠုၚ်လဝ်ရ။
ဆေၚ်စပ်ကဵုအမှုမၞိဟ်ချိုတ်ဂှ်တုဲ လအ်ကၠုၚ်ကြပ်မွဲအဒိုတ်ကီုလေဝ် စဵုကဵုတ္ၚဲဏံ ဂကောံဒပ်ဗၠာဲသၟိၚ်သၟဝ်တဲကမ္မယှေန်ပၞာန်ကဵု ဂကောံစၟဳစၟတ်ဂၠိုက်ဂၠာဲတံ ရပ်ဓမံက်ပ္တိတ် ညးလုတ်လောန်ဒုဟ်ဂှ် ဟွံမာန်ဏီရ။
“အတိုၚ်ဗၠာဲသၟိၚ်တံဟီုဂှ်တှေ် ညးလုတ်လောန်ဒုဟ်ဂှ် ရပ်ဟွံဂွံဏီပုဟ်။ အဃောစၟဳစၟတ်ဂၠိုက်ဂၠာဲမံၚ်ဖိုဟ်” သာ်ဝွံ ညးဒေသဍုၚ်မတ်မလီုမွဲတၠ ဟီုရ။
ဟိုတ်နူညးလုတ်လောန်ဒုဟ် အမှုဒုစရိုဟ်ဗလးမံၚ်ဂှ်ရ စပ်ကဵုအကာဲအရာ ပရေၚ်ဂီုကၠီု ဍုၚ်မတ်မလီုဂှ် အကြာညးဒေသတံ ပရေၚ်ဒှ်ဂဝိၚ် သၠုၚ်တိုန်မံၚ်နွံရ။
သၟာၚ်နူဂှ်ပၠန် လ္တူညးတာလျိုၚ်မဆေၚ်စပ် ကေတ်လဝ်လျိုၚ် သၞောဝ်ဥပဒေအုပ်လဒံကဵု ပရေၚ်ဓမံက်ပ္တိတ်အမှုဍာံတံ ဂၠိုက်ဂၠာဲဓမံက်ပ္တိတ်ဂှ်လေဝ် အရာဒးပ္တိတ်သၟာန် သာတုဲဂၠိုၚ်ကၠုၚ်မံၚ်ရောၚ် ဂွံတီကေတ်ရ။
အတိုၚ်ညးဒေသတံဟီုဂှ်မ္ဂး ဂကောံဒပ်ဗၠာဲသၟိၚ်သၟဝ်တဲကမ္မယှေန်ပၞာန်တံဝွံ တန်တဴလ္တူကဵုသြန်မာန်တုဲ ဆက်စၟဳစၟတ်ဂၠိုက်ဂၠာဲမံၚ်ကဵု အမှုဍောတ်ဇၞော်ဂှ်ရ ကိစ္စအမှုဒုစရိုတ်ဗွဲမဂၠိုၚ်ဂှ် ၜိုတ်အဆံၚ်စၟတ်သမ္တီပံက်အမှုဟေၚ် ဒေံါအာလေပ်ရောၚ် ညးဒေသတံ ဟီုရ။
“လှုဲနွံမှ ဗက်အမှုဂွံရ။ ကဵုလှုဲဟွံမာန်တှေ် ညးတာလျိုၚ်လဵုမှ ဖအိုတ်အခိၚ် သွက်အမှုဇကု ဟွံမာန်ပုဟ်။ ကွဳလိုန်ဓာတ်ကၠေံ အာတေၚ်မံၚ်ဖိုဟ်ရ။ မွဲအလန်မှ ဟွံဗက်ကဵုပုဟ်” သာ်ဝွံ ညးတြုံနူအရာပ်ဇြေဂျဵုမွဲတၠ ဟီုရ။
ပ္ဍဲလ္တူဍုၚ်မတ်မလီုဝွံ ကိစ္စအမှုလုတ်လောန်ဒုဟ်ပၠံၚ်ၜး စွံပွန်ကဵု ညးဒဳတက္ကသဳကွဳလိုန်ဓာတ် ဗွဲမဂၠိုၚ်တံဂှ် ဓမံက်ပ္တိတ်ညးလုတ်လောန်ဒုဟ် ဟွံမာန်ဏီဂှ်ရ သၟာဒုစရိုတ်တံ သာတုဲဂံၚ်ကၠုၚ်မံၚ်ရောၚ် ဂးရ။
ဟိုတ်နူအကာဲအရာဂှ်ရ ညးဒဳတက္ကသဳဂမၠိုၚ်တံ ဒးစွံသတိ အကာဲအရာသ္ၚောဲခြာကဵု ညးအာတရဴတံ ဗွဲတၟေၚ်တုဲ ဒးကၠောန်မံၚ်ကမၠောန်ရဂှ်လေဝ် ဂွံတီကေတ်ရ။
ဗွဲကြဴနူဒပ်ပၞာန်သီအဝဵုတုဲ ပ္ဍဲဒေသမန်ဝွံ သၟာၚ်နူအမှုဒုစရိုတ်ဂၠိုၚ်ကၠုၚ်ဂှ်မ္ဂး အမှုဒးဒုၚ်ကူသာန်သွံရာန်မၞိဟ် နဒဒှ်သၟာကမၠောန်ဍာ်ကီု၊ သၟတ်ဒးဒုၚ်ရပ်ပကောံပကေဝ်ဗွဲအဓမ္မ နဒဒှ်ကောန်သ္ဂံၚ်တၟိကီုနွံတုဲ အကာဲအရာပရေၚ်ဂီုကၠီု စိုပ်ဒၟံၚ်အဆံၚ်ပရေံအိုတ်ရ။