ပ္ဍဲသ္ကုတ်ဂၠံင်ဍာ်ဂမ္တဴ-ဌာန်ဇၞူ၊ ပွိုင်ဍုင်ဍာ်ဗု၊ ရးတၞင်သဳဂှ် ကရောင်ပၞာန်ကမ္မယှေန်ပၞာန်တံ ဆုဲပြံင်ဒၞာဲ အာကၠုင်မံင်မွဲနှေံမွဲနှေံတုဲ ရပ်/ၜုင်တက် ညးဒေသကီု၊ ကေတ်ဒၟံင်ကပေါတ် မၞုံကဵုၚုဟ်မးဂမၠိုင်ကီုဂှ်ရ ပရေင်မံင်စံင်အာကၠုင် ဟွံဂီုကၠီုရဂှ် တမ်ရိုဟ်ပရိုင်ဗလးတိတံ ဟီုရ။
ပ္ဍဲကဵုကွာန် (၄) ကွာန်၊ မၞုံသ္ကုတ်ဂၠံင်ဂှ်ဝွံ စပ္တံနူဂိတုအဝ်ဂေတ် စၟတ်တ္ၚဲ (၂၅) တုဲကၠုင်တေံရ ကရောင်ပၞာန်ကမ္မယှေန်ပၞာန်တံ ချဳဓရာင်အာကၠုင်ဒၟံင် နကဵု (၃) ကရောင်ပၞာန်တုဲ ဇြဟတ်ပၞာန် ၜိုတ် (၃၀၀) နွံရောင် ဂွံတီကေတ်ရ။
ဂိတုသေပ်တေမ်ဗာ စၟတ်တ္ၚဲ (၁၄) တုဲကၠုင်ဏံ ကရောင်ပၞာန်က္လေင်စဴအာ အတိုင်ဂၠံင်ဍာန်ဂြိုပ် နူကွာန်ရတ်တၟး ဇရေင်တမ်ဒပ် (၂၈၂) ဂှ်ဝွံ သီကေတ်ဏာ ဖုင် (၃) မ ပ္ဍဲဇရေင်သ္ၚိကၟိန် ဒၟံင်တန်တဴပ္ဍဲကၠအ်ထ္ၜိုတ် မၞုံပ္ဍဲကွာန် (မိုင်-၆၀) ဂှ်ကီုရောင် ညးဒေသ ကွာန်ရတ်တၟးမွဲတၠ ဟီုရ။
“စၟတ်တ္ၚဲ (၁၄) ဂှ် ကရောင်ပၞာန်ဍေံတံ စဴအာရ။ လှာဲမၞိဟ်ဟာဂှ် ဟွံတီပုဟ်။ အတိုင်ဂၠံင်ဍာန်ဂြိုပ် လ္ပာ်ရတ်တၟးဂှ် အာတုဲတှ်ေ သီကေတ်ဖုင်တၠကၠအ် (မိုင်-၆၀) ဂှ် (၃) မတုဲ စဴအာတမ်ဒပ်ရ” သာ်ဝွံ ညးဟီုရ။
တုဲပၠန် ပ္ဍဲဂိတုသေပ်တေမ်ဗာ စၟတ်တ္ၚဲ (၈) တုဲကၠုင်ဏံလေဝ် ကတဵုဒှ်ပေဲါဗ္တိုက်ၜါလ္ပာ် ပ္ဍဲကွာန်အံင်ဇၞးဂှ် ဆက်စပ်မံင်ကဵု ဂကောံပၠန်ဂတး ဂးတုဲ ၜုင်တက်ဏာလဝ် ကောန်ကွာန် အာယုက် (၃၀) သၞာံမွဲတၠကီု ဂွံတီကေတ်ရ။
“ကောန်ကွာန်အံင်ဇၞးတံ ဆက်စပ်မံင်ကဵု ဂကောံမ္ၚးတံနွံ ဂးတုဲ ၜုင်တက်လဝ်နွံရ။ ကောန်ကွာန်ရ အာကၠုင်လ္ပာ်ပၠန်ဂတးနွံဂှ် ဍေံတံတီရ။ သၟာန်ဏာဂှ် ဟွံသွဟ်တှ်ေ ၜုင်တက်လဝ်ရ” သာ်ဝွံ ဟီုရ။
ပ္ဍဲကဵုသ္ကုတ်ဂၠံင်ဂှ်ဝွံ ကွာန်ဍာ်ဂမ္တဴ-ကလိင်အံင် ပါလုပ်ကီု သီုဖအိုတ် နွံ (၄) ကွာန်တုဲ မွဲကွာန်မ္ဂး ၜိုတ်ပိပန်တ္ၚဲ မံင်တန်တဴဖျေံဒပ်လေပ်ရ။
ဟိုတ်နူကရောင်ပၞာန်ကမ္မယှေန်ပၞာန်တံ ဆုဲပြံင်ဒၟံင်ဒပ် မွဲနှေံမွဲနှေံနွံတုဲ သၟာင်နူဒးပဲါဒဴဂှ်မ္ဂး သွက်ဂွံအာကၠုင် ဇရေင်ဗွိုင်ကမၠောန်ဂှ်လေဝ် ဒှ်မံင်တင်ဝါတ်ဂါတ်ရ။
သွက်သ္ဂောံက္လေင်အုပ်ဓလီုတိဍာ် အပ္ဍဲရးတၞင်သဳဂှ် ဒပ်ကမ္မယှေန်ပၞာန်တံ ထ္ပက်မံင်ကရောင်ပၞာန် နကဵုဇြဟတ်ဗွဲမဂၠိုင်တုဲ ပရေင်ဖံက်ပကဝ်အခေါင်အရာမၞိဟ်လေဝ် နွံမံင်ဗွဲမဂၠိုင်ရ။
အပ္ဍဲဂိတုဂျူလာင်တုဲကၠုင်တေံဝွံ ၜိုန်ရပဋိပက္ခရပ်လွဟ် အောန်စှ်ေအာကီုလေဝ် ပရေင်ဂစိုတ်မၞိဟ်ကဵု ပရေင်စံင်ပလီုပလာ်ဂမၠိုင် သၠုင်တိုန်ကၠုင်တုဲ ညးဒးဂြိပ်ပဲါဒဴနူဌာန် သာတုဲဂၠိုင်ကၠုင်ရောင် ဂွံတီကေတ် နူလိက်ဒုင်စဳရေင် FE5 တၞင်သဳရ။