သၟတ်မန် အာယုက် (၂၀) သၞာံပြင်မွဲတၠ၊ နူကွာန်ဘာဒေါဝ်၊ ပွိုင်ဍုင်မုဟ်ဍုင်၊ ဒးဒုင်ပလံင်ဖျဴ၊ ပ္ဍဲပယျဵုရနံင် သေံ-ဗၟာ၊ ဂိတုဂျူလာင်တုဲကၠုင်တေံဂှ် စဵုကဵုလလအ် ပွိုင် (၃) ဂိတုဏံ ဟွံဂွံပရိုင်မွဲသာ် ကၠေံဒၟံင်ဖိုဟ်ရောင် ညးမကြပ်စုက်လုက်ကဵု ဂကောံသ္ၚိကၟိန်တံဂှ် ဟီုကဵုဌာန်ပရိုင်ဗၠးၜးမန် IMNA ရ။
အခိင်မစိုပ်ပယျဵုရနံင်ဂှ်ဝွံ ဗွဲကြဴနူကော်ဖုင် အာတ်တင်နင်ကာဒ်ကောန်ဍုင်/သ္ၚိကၟိန် ကေုာံ သြန် (၈၀) ကိုဋ် ဇရေင်သ္ၚိကၟိန်မွဲဝါတုဲဂှ် ကၠေံအာလဝ်ရောင် ညးဒေသမုဟ်ဍုင် မကြပ်စုက်လုက်ကဵု ဂကောံသ္ၚိကၟိန်မွဲတၠဂှ် ဟီုရ။
“ဒးဒုင်ရပ်ပ္ဍဲသေံတုဲတှ်ေ နူက္လေင်ပလံင်ဏာဍေံဂှ်ရ ဟွံဂွံဆက်စၠောံရ။ စိုပ်ပယျဵုဗက် ကေတ်အဆက်ရ။ တုဲတှ်ေ အာတ်သြန် (၈၀) ကိုဋ်ရ။ ကဵုလဝဲါဂှ်ဟွံမာန်ဟာ ဟွံတီ၊ အခေါင်က္လေင်နုက်ဟွံမွဲပုဟ်” သာ်ဝွံ ညးဟီုရ။
ဟိုတ်နူကော်ဖုင်အာတ်သြန်ဂှ်ရ ဒးဒုင်ပကောံပကေဝ် သွက်တန်ဗ္တောန်ပၞာန်ရောင် ဂကောံသ္ၚိကၟိန်တံ ထေင်ခယျကေတ်တုဲ ဟွံဂွံအဆက်စၠောံမွဲသာ်ဂှ်ရ ဒှ်မံင်ဓဝိင်ကဵု ဘဲအန္တရာဲလမျီု သၟတ်မကၠေံဒၟံင်ဂှ်ရ။
သၟတ်ဂှ်ဝွံ အဃောဒးဒုင်ရပ်ထိင်လဝ် ပ္ဍဲဗဒိုပ်သ္ၚိစာတ် (အချုက်) ၊ ဍုင်ၜင်ကံက် ပွိုင် (၃) ဂိတုဂှ် ဂွံမံင်အဆက်စၠောံကဵု သ္ၚိကၟိန်ဏီရောင် ဂွံတီကေတ်ရ။
သၟာကမၠောန်ဆုဲပြံင်ဗၟာ ဒးဒုင်ရပ်လဝ် နကဵုလိက်သက်သဳဟွံဍိုက်ပေင်၊ အမှုဝေင်ဇျှင်လံင်သြန်၊ အမှုဂဥုဲၜူမာဲ ပ္ဍဲဗဒိုပ်အချုက်၊ ဗဒိုပ် (လဝက) ကၟိန်ဍုင်သေံဂှ်ဝွံ နူကဵုညးတာလျိုင်သေံတံ သၠုင်ပ္တိုန်မံင်အသိင် ပရေင်ပလံင်ဖျဴဌာန်ဇာတိရ။
ဂကောံဒပ်ပၞာန်တံလေဝ် နကဵုစရင်အင်ဂမၠိုင် မင်ဒၟံင်ညးဒးဒုင်ပလံင်ဖျဴတံ လ္ပာ်သြင်ကအ်သံင်တုဲ ပလံင်ဗ္စိုပ်ဏာဒၟံင် ဇရေင်တမ်ဒပ် ဖျေံသဇိုင်ကအ်သံင်တေံ တိုက်ရိုက်ရောင် ညးတာလျိုင် နူဂကောံမင်ရံင်ပရေင်ဒးယိုက်ဂၠေင်ပၞာန် FE 5 Tanintharyi ဟီုရ။
“က္လေင်လှောဲဏာလ္ပာ်ကအ်သံင်ဂှ် အရိုဟ်ဂိတု မၞိဟ်ကဵုကၠံနွံမံင်ဖိုဟ်ရ။ ဂကောံပၞာန်တံ ဆက်ဆောံကဵု ကလုတ်သၟာကမၠောန်၊ ညးတာလျိုင်သေံတံတုဲ ပ္ဍဲအချုက် မၞိဟ်ပေင် (၉၀၊ ၁၀၀) ဗက်ဂှ် လှောဲဏာရ။ သၟတ်လှောဲနင်တံဂှ် ဒပ်ပၞာန်တံ ပကောံမံင်သွက်ယိုက်ဂၠေင်ပၞာန်ဖိုဟ် ဂးရ” သာ်ဝွံ ညးဟီုရ။
နူပယျဵုရနံင်မွဲတဆံင်ဂှ် ဒးဒုင်ပကောံဗွဲအဓမ္မတုဲ သၟတ်မန်နူမုဟ်ဍုင် မစိုပ်မံင်မုက်ပၞာန်မွဲတၠဂှ်ဝွံ အပ္ဍဲပေဲါဗ္တိုက်ပွိုင်ဍုင်ရေဝ်၊ ဂိတုဖေဖဝ်ဝါရဳ စၟတ်တ္ၚဲ (၂၂) တုဲကၠုင်တေံဂှ် ဒးပြဟ်လလုဲအာလဝ်နွံရ။
အပ္ဍဲပွိုင် (၅) ဂိတု၊ သၞာံ (၂၀၂၆) ဏံဝွံ ကောန်ၚာ် ကေုာံ သၟာကမၠောန်ဆုဲပြံင်ဟွံလုပ်သၞောဝ် သီုဖအိုတ် (၇၆၅) တၠ နူဗဒိုပ်ထိင်ဒဝ်ရနံင် ပလံင်ဖျဴဏာလဝ်နွံရောင် ဂွံတီကေတ် နူတင်နင် FE 5 Tanintharyi ရ။