ပ္ဍဲပွိုင်ဍုင်ဍာ်ဗု၊ ရးဒေသဇၞော်တၞင်သဳဝွံ နူဂကောံကမ္မယှေန်ပၞာန်တံ ပန်ပှော်ဏာ လွဟ်ဇၞော်တုဲ ညးဗြဴမွဲတၠ ဒးအာဘဲဝပ်နွံရဂှ် ဂွံတီကေတ် နူညးဒေသဍာ်ဗုတံ ဟီုဂးလဝ်ရ။
ဂိတုသေပ်တေမ်ဗာ စၟတ်တ္ၚဲ (၃) ၊ တ္ၚဲဏံ အခိင်နူဂယး ၜိုတ် (၅) နာဍဳကဝက်ဂှ် ဒပ်ကမ္မယှေန်ပၞာန် ထ္ပက်ကၠုင်ကရောင်ပၞာန် နူကွာန်ရတ်တၟး ဇရေင်ကွာန်ဍာ်ဂမ္တဴဂှ် ဒပ်ပံင်ကောံပၠန်ဂတးတံ ပန်ဗ္တိုက်ဏာတုဲ ကတဵုဒှ်အာပေဲါဗ္တိုက်ၜါလ္ပာ် ၜိုတ်ကဝက်နာဍဳရ။
ဗွဲကြဴနူဒှ်ပေဲါဗ္တိုက်တုဲဂှ်မ္ဂး ကမ္မယှေန်ပၞာန်တံ ပန်ပှော်ဏာလွဟ်ဇၞော်ဆဆဵု (၂) ဝါ လ္ပာ်ကွာန်ဍာ်ဂမ္တဴတုဲ ဒတုံခတိုဟ်အာ ပ္ဍဲတၞုင်ကွာန်ဍာ်ဂမ္တဴဂှ်ရ ညးဗြဴအာယုက် (၃၈) သၞာံမွဲတၠဂှ် ဒးအာဘဲဝပ်ကဝေက်ကမ်လွဟ် ပ္ဍဲတဲရ။
“နူအခိင်ဂယးပြဟ်ရ လ္ပာ်ရတ်တၟးဂှ် မိင်မံင်ရမျာင်လွဟ်။ လ္ပာ်ဂှ် သ္ၚိတ်အာတုဲမှ ဍေံတံ ပန်ကဵုလွဟ်ဇၞော်ဆဆဵု (၂) မ၊ မွဲမဂှ် ဒတုံစှ်ေ ပ္ဍဲသုသာန်မ္ၚးကွာန်ရတ်တၟး။ မွဲမပၠန်ဂှ် ဒတုံစှ်ေ ပ္ဍဲသ္ၚိတၞုင်ကွာန်ဍာ်ဂမ္တဴဂှ်ရ ညးဗြဴမွဲတၠ ဒးအာကဝေက်ကမ်ပ္ဍဲတဲညိညရ။ ဂၠိုင်ဂၠိုင်ဂှ် ဟွံသေင်ပုဟ်” သာ်ဝွံ ညးတြုံဒေသဍာ်ဗုမွဲတၠဂှ် ဟီုရ။
ညးဗြဴဒးဘဲဝပ်ဂှ်ဝွံ ဒုင်လွဳလွတ်ဒၟံင် ပ္ဍဲခဒမ်ဂဥုဲ မၞုံပ္ဍဲကွာန်ဂှ်ရောင် ညးဆက်ဟီုလဝ်ရ။
ဂကောံဒပ်ကမ္မယှေန်ပၞာန်တံဝွံ ပ္ဍဲဂိတုအဝ်ဂေတ်သတ္တဟလက္ကရဴအိုတ်ဂှ် ဟွံဒှ်ပေဲါဗ္တိုက်မွဲသာ်ကီုလေဝ် ပ္ဍဲကဵုလ္ပာ်ကွာန်ဍာ်ဂမ္တဴ၊ ရတ်တၟးဂှ် ထပ်ဗပေင်လဝ်ဇြဟတ်ပၞာန် လၟိဟ်ကဵုကၠံနွံရောင် ဂွံတီကေတ်ရ။
“တုဲကၠုင်ၜါအဒိုတ်ဏံဂှ်ရ ဍေံတံ ဗပေင်လဝ်ဇြဟတ်။ စတမ်ဂှ်တှ်ေ လ္ပာ်ဍာ်ဂမ္တဴ၊ ရတ်တၟးဂှ် ဇြဟတ်ဍေတံ ၜိုတ်ကၠံရနွံ၊ လၟုဟ်ထပ်ဗပေင်လဝ် ဒှ်အာၜါကၠံပြင်ရ။ ဣညအ်ဂှ်တှ်ေ ဍေံတံထ္ၜးလဝ်ရုပ်၊ ကရောင်ပၞာန် အာမံင်လ္ပာ်ဂြိုပ်တံ ဟွံပါပုဟ်၊ ပေဲါဗ္တိုက်လေဝ် ဟွံဒှ်ပုဟ်၊ မုပ ဍေံတံဂွံဗပေင်လဝ်ဇြဟတ်ဂှ်တှ်ေ ဟွံတီပုဟ်” သာ်ဝွံ ညးတြုံဒေသဍာ်ဗုဂှ် ထပ်ဟီုရ။
ပ္ဍဲဂိတုအဝ်ဂေတ် စၟတ်တ္ၚဲ (၈) တုဲကၠုင်တေံဂှ်လေဝ် ဟိုတ်နူဒပ်ပၞာန်တံ ပန်ပှော်ကဵုလွဟ်ဇၞော်ဆဆဵုဂှ်ရ ညးဗြဴဒၟံင်တန်တဴမံင် အပ္ဍဲကၠအ်ကွာန်ဍာ်ဂမ္တဴမွဲတၠ ဒးအာကဝေက်ကမ်တုဲ ဂွံအာဘဲဝပ်ပ္ဍဲသြိုဟ် မွဲမသ္ကာတ်မြဟ်ဏီရ။
ပ္ဍဲဒေသပိုန်ဒြပ်တၟေင်ထဝဲါ (SEZ) မၞုံပ္ဍဲပွိုင်ဍုင်ဍာ်ဗုဂှ်ဝွံ နူဂကောံဒပ်ပၞာန်တံ အဃောဂိုတ်ဂ္စာန်ထိင်ဒဝ်ဒၟံင် သွက်ဖဵုပရဲ (ဂုန်ဖဵု) ညးတံဂှ်မ္ဂး ပွမဂစိုတ်ကောန်ကွာန်ကီု၊ ပ္ဍဵုပ္ဍိုက်ပျဲပျာံကီု ကေုာံ ပွမစံင်ပလီုပလာ်သ္ၚိဒၟံင်ကီုဂှ် လုတ်လောန်ဒၟံင်ဒုဟ်အဆက်ဆက်နွံရဂှ်လေဝ် အတိုင်လိက်ဒုင်စဳရေင် Fortify Right ဓမံက်ထ္ၜးလဝ်ဂှ် ဂွံတီကေတ်ရ။