ညးဒးဘဲဒဏ်သ္ၚိဍာ်ဗၠိုက် ပ္ဍဲကွာန်ဝၚ်္ကဂှ် ဟိုတ်နူပြံၚ်ဆုဲ ဒးမံၚ်ဒၟံၚ် ဒၞာဲဇူဒီု ဒၞာဲသ္ၚိဇကုဟွံသေၚ်တုဲ ဂွံကလေၚ်စဴသ္ၚိဇကုမာန်ဂှ် ရာဒနာမံင်ကဵုဍာ် ညံင်ဂွံက္လေင်စှ်ေပြဟ်ဟ်ဖိုဟ်ရောၚ် သ္ၚိညးဍာ်ဗၠိုက် မိယေန် ဟီုရ။
“ပိုဲတံ မၚ်စၟဳဒၟံၚ်ဍာ်ညံၚ်ဂွံယအ်စှေ်ပြဟ်ဟ်ရ၊ ဂွံဇူဒီု မံၚ်တဴဒၟံၚ်လၟုဟ်ဏံဂှ် ဍေံဟွံတုပ်ကဵုသ္ၚိဇကုမံၚ်ပုဟ်၊ ဟွံပြေပြံၚ်လေဝ် ဒးပြေပြံၚ်ကေတ်အတေင်ရ၊ ခိုဟ်နူကဵု ဒၞာဲဇူဒီုဟွံမွဲဂှ်လေဝ်” သာ်ဝွံ မိယေန် ဟီုရ။
နူစတ္ရဲအဒိုတ် သတ္တာဟတုဲကၠုင်ဏအ် ဗြဲဇၞော်စဂူ ဍာ်ကြုင်ကၟိုဟ်တိုန်တုဲ သ္ရိကွာန်ဝင်က မၞုံဒၞါဲတိသဝ်ဝ်ဂမၠိုင် ဗၠိုက်ဍာ်ဂှ်ရ ဒးပြံင်ဆုဲဒၞါဲအိုတ်ရ။
ဍာ်ကြုင်ဒဒန်ဆုဝင်ကဂှ် မွဲတ္ၚဲ (၄) လပုဟ် မုက်ဍာ်သၠုင်တိုန်မံင်ဖိုဟ်တုဲ ဍာ်ကြုင်ဟွံစှ်ေလောဲလောဲဏီ လအ်အာကဵုဂိတုမ္ဂး သွက်ညးဒးဘဲဒဏ်သ္ရိဗၠိုက်ဍာ်တံ ဒးဆဵုဂဗကဵုတင်ခက်ခုဲမာန်ဏောင်ဂှ်လေဝ် တော်ဆမံင်အိုတ်ရ။
ပြဟ်ဟ်ဏံ ညးတာလျိုၚ်အုပ်ဓုပ်ကွာန်တံ ပြုပြေၚ်ဖန်ဇန်လဝ် သွက်ညးဒှ်ဒဒိုက်သ္ၚိဍာ်ဗၠိုက် ဒၞာဲမံၚ် ပ္ဍဲဇြပ်လဒေါဝ်ကွာန်ဝကႅတုဲ ပရေၚ်စသုၚ်၊ ပရေၚ်ထတ်အယုက်၊ ပရေၚ်မံၚ်စံၚ်နာနာ ပြေပြံၚ်ဒၟံၚ်ဖအိုတ်ရောၚ် ဂးရ။
“ပြဟ်ဟ်ဏံ သ္ၚုကီု၊ ဇွောံမစၞစနာနာကီု၊ နူကဵုဂကောံအရီုဗၚ်ဟံၚ်ပြာ်မၞိဟ်တံ ပရအ်ကဵုလဝ်နွံတုဲ ပွိုၚ်မွဲဂိတုဂှ် စသုၚ်မံၚ်စံၚ်ၜိုဟ်ဟ်ရ၊ ဆဂး ဂတနူဏံ ဍာ်ဟွံယအ်စှ်ေဏီပုဟ် ဂကောံအရီုဗၚ်ဟံၚ်ပြာ်လဵုမွဲလေဝ် ဟွံထံက်ပၚ်ပုဟ်တှေ် သွက်ညးလှုဲလှာ်ဟွံမွဲတံ ဇၞော်ကဵုဇြဟတ် ဒးဆဵုဂဗခက်ခုဲနွံရောၚ်” သာ်ဝွံ ညးဒးဘဲဒဏ်ဍာ်မွဲတၠ မိမဳ ဟီုရ။
ဟိုတ်နူဘဲဍာ်ဗၠိုက်ဂှ်တုဲ ကပေါတ်စကာပ္ဍဲသ္ရိ မပ္တံကဵုစက်ကဆံၚ်ပဠောံ၊ ကဠာဍာ်ဂံက်က်၊ ဒူစုတ်ပဠောံ ကေုာံ ကပေါတ်တၞဟ်ဟ်ဂမၠိုၚ် ဒးဒုင်ဆောံလေင်အာလဝ်ညးသ္ကအ်လေဝ်နွံရ။
စပ်ကဵုဒးဘဲဒဏ်သ္ၚိဍာ်ဗၠိုက် ပ္ဍဲကွာန်ဝၚ်္ကဂှ် လောန်ကၠုင် နူ (၂၀) သၞာံပြၚ်တေံ ကေၚ်ဍာ်ဗၠိုက်လဝ်နွံတုဲ အခိင်တေံ လအ်ပွိုၚ်ပိဂိတုတုဲမှ ဍာ်က္လေင်စှ်ေ ဂွံကလေၚ်စဴသ္ၚိညးသ္ကအ်ဂွံရောင် ညးတီပရူဒဒှ်တံ ဟီုဂးမံင်လေဝ်နွံရ။