ဂကောံဌာနပံင်ကောံ (ဌာနဇဳ) သၟဝ်ကမ္မယှေန်ပၞာန်တံဝွံ သွက်ဂွံပံက်ဗဒိုပ်ပဲါဒဴဘဲဂမ္တဴ ပ္ဍဲ (၁၀) ပွိုင်ဍုင်၊ တွဵုရးဍုင်မန်ဂှ် စဳဇန်ဒၟံင်ကီုလေဝ် ညးအာစိုပ်ဇူဒီုဟွံမွဲဏီရောင် ဂွံတီကေတ် နူညးဒေသစုက်လုက်တံရ။
သွက်ဂွံဆေင်မုက်ကဵု ဘဲဒဏ်ဂမ္တဴအေဝ်နဳညဵုမာန်ဂှ်ဝွံ အတိုင်အလဵုအသဳပၞာန်သီအဝဵု စၞောန်လဝ်ဂှ်မ္ဂး နူဂိတုအံက်တဝ်ဗာသတ္တဟဒုတိယဏံရ စပံက်လဝ် ဗဒိုပ်ပဲါဒဴဘဲဂမ္တဴ ပ္ဍဲပွိုင်ဍုင်သဓီု၊ ပံင်၊ ဇြပ်ဗု၊ မုဟ်ဍုင် ကေုာံ မတ်မလီုတုဲ နကဵုဗၞတ်ဗ္ၜတ် (၁၀) ပွိုင်ဍုင်မ္ဂး သွက်ဂွံပံက်အာ စဵုကဵု (၁၄၈) ဗဒိုပ်ဂှ် စဳဇန်ဒၟံင်ရောင် ဂွံတီကေတ်ရ။
ဗဒိုပ်ပဲါဒဴဘဲဂမ္တဴဂမၠိုင်ဂှ်ဝွံ စဳဇန်လဝ် နကဵုပၞိက်စက်၊ ဒၞာဲသတိက် ကေုာံ ဍာ်စကာ/ဍာ်သုင် ပ္ဍဲကဵုဘာလကျာ်၊ အပ္ဍဲဒေသဂှ်ကီုလေဝ် ဟိုတ်နူဟွံဂွံပၟတ်ဓာတ်လလဳ၊ ကိစ္စပရေင်အာကၠုင်တုဲ ညးကၠုင်စိုပ်ဟွံမွဲရဂှ် ညးတြုံဒေသပံင်မွဲတၠ ဟီုရ။
“လ္ပာ်ပံင်ဂှ် ပံက်လဝ်ဗဒိုပ်ပဲါဒဴဘဲဂမ္တဴ ၜိုတ် (၃၀) ရ။ အေဂှ် ပလေဝ်လဝ်ကဵု ဍာ်သုင်ဟေင်ရ။ ညးပွိုင်ဍုင်ပံင်တံ စိုတ်လေဝ်ဟွံလုပ်စပုဟ်။ မုဒှ်ရောဟီုတှ်ေ ဒးကၠောန်မံင်အလောန်ရ။ ဂွံအာမံင်ဒၞာဲဂှ် ဟွံကူချပ်ပုဟ်” သာ်ဝွံ ညးဟီုရ။
သၟာင်နူဂှ်ပၠန် လ္တူနူကဵုပရေင်ထတ်ယုက်ဂှ် ဒးဆေင်မုက်ပသောင်မံင်ကဵု ကိစ္စပရေင်စသုင်မံင်စံင်ဂှ်ရ ဒှ်သဇိုင်ဝန် (ဝန်ထုပ်ဝန်ပိုး) မွဲဟေင်ရဂှ်လေဝ် ညးဟီုရ။
ညးဗြဴပွိုင်ဍုင်ဇြပ်ဗုမွဲတၠဂှ် “သွက်ဂွံတိတ်နူသ္ၚိဂှ် ဒးလိင် (အိုဝေ) ရ။ မိမဇကု အာဇူဒီုတှ်ေ သွက်ညးတံဂွံစဂှ် ဒးအာပလံင်ဏီရ။ အပဵုဖအိုတ်ရ။ တုဲတှ်ေ ပကောံမၞိဟ်တုဲ မွဲတဲဓဝ် ဍေံတံ ဂွံထောံဗမ်လောဲဂှ် ကၠောန်လဝ်ဟာ ဟွံတီပုဟ်။ အကာဲအရာတံ ဟွံခိုဟ်ပုဟ်ဟီုတှ်ေ” သာ်ဝွံ ဟီုရ။
ဟိုတ်နူအသိင်ဂမ္တဴသၠုင်တိုန်ဂှ်ရ အဓိက ညးဍုင်ကွာန်တံနွံပၟိက် မပ္တံကဵု ဂွံဂွံပၟတ်အခိင်ဍာံကီု၊ ဂွံဂွံကပေါတ်ထံက်ပင် ဆေင်စပ်ကဵုပရေင်ထတ်ယုက်ကီုဂှ် သ္ပလဝ်မဒ္ဇျဟ်တုဲ ကၠောန်ထ္ၜးမံင်အယောင်အလာ သွက်အဝဵုအလဵုအသဳပၞာန် ဂွံတန်ကြန်ဟေင်ဂှ်ရ ဟွံစိုပ်တရဴရောင်ဂှ်လေဝ် ညးဍုင်ကွာန်လ္ၚဵုတံ ထံက်ထ္ၜးလဝ်ရ။
က္ဍိုပ်သ္ကိုပ်ပၞာန်ဥူမေန်အံင်လှာင်ဝွံ သွက်ဂွံတတ်ထပါ်ဥတုရာသဳအေဝ်နဳညဵုမာန်ဂှ်မ္ဂး နကဵုညးဍုင်ကွာန်တံ ပရဟ်ဒုင်ပကောံပကေဝ်လဝ် ဇွောံမစၞစ ကေုာံ ဍာ်ညိဂှ်လေဝ် ဂိတုအံက်တဝ်ဗာ စၟတ်တ္ၚဲ (၅) တုဲကၠုင်ဏံ ဟီုစၞောန်လဝ် ပ္ဍဲပေဲါကောံဓရီု တောတက်ဖောအ်ဗြေဝ်ကၟိန်ဍုင်ရ။
ပ္ဍဲတွဵုရးဍုင်မန်ဝွံ စဵုကဵုဂိတုအံက်တဝ်ဗာ စၟတ်တ္ၚဲ (၁၄) တုဲကၠုင်ဏံ ညးချိုတ်ဘဲဂမ္တဴသ္ကာတ် (အပူရှပ်) (၅) တၠနွံရဂှ်လေဝ် ဓမံက်ထ္ၜးလဝ်ရ။
အပ္ဍဲကာလဥတုရာသဳအေဝ်နဳညဵုသ္ကာတ်မြဟ်ဏံဝွံ ဂမ္တဴသၠုင်လောန်ကာဲကီု၊ ဍာ်ကှ်ဇတ်ကီု ကေုာံ ဘဲအန္တရာဲသဘာဝ ပၟတ်ဂြိုပ်ကတူကီု က္တဵုဒှ်မာန်တုဲ နကဵုညးဍုင်ကွာန်တံ ဖအောန်ဖျေံ ပရေင်ချဳဓရာင်အာကၠုင်ပ္ဍဲတ္ၚဲညိ၊ စကာဍာ်/သုင်ဍာ် ဗွဲမရုံဂပ်ညိ၊ သ္ပဂရုမင်မွဲပရေင်ထတ်ယုက် ဗွဲတၟေင်ညိဂှ်လေဝ် သၞာဲဒဴပရေင်ထတ်ယုက်ဂမၠိုင်တံ ဟီုဂးကဵုလဝ်သတိရ။