ပ္ဍဲတွဵုရးဍုင်မန်ဝွံ အပ္ဍဲဂိတုသေပ်တေမ်ဗာဂှ် ၚုဟ်ကၠေင်ဓာတ်ထပ်တိုန်ကၠုင်တုဲ မွဲလဳတာ ကြပ် (၅၀၀၀) ဒကေဝ် ဒှ်ကၠုင်ဣရရောင် ဂွံတီကေတ် နူညးရာန်စကာကၠေင်ဓာတ်တံရ။
အတိုင်ၚုဟ်မးကၠေင်စက် မစၞောန်လဝ် ပ္ဍဲဂိတုအံက်တဝ်ဗာ စၟတ်တ္ၚဲ (၂) တုဲကၠုင်ဏံမ္ဂး ပ္ဍဲတွဵုရးဍုင်မန်ဂှ် ကၠေင်ဓာတ် (၉၂) မွဲလဳတာ (၄၈၀၀) ဒကေဝ်၊ (၉၅) မွဲလဳတာ (၄၉၈၅) ဒကေဝ် ၚုဟ်နွံတုဲ ယဝ်ပတောံၜတ်ကဵု ဂိတုတုဲကၠုင်တေံမ္ဂး မွဲလဳတာ (၁၀၀) ဒကေဝ်ပြင်ပြင် ထပ်တိုန်ကၠုင်ရ။
တုပ်သာ်ဂှ်ကီု ၚုဟ်ကၠေင်ဒဳဇြာလေဝ် ယဝ်ပတောံကဵု ၚုဟ်မးစၞောန်လဝ်ကၠာတေံမ္ဂး မွဲလဳတာဂှ် ၚုဟ်တိုန်အာ အကြာ (၂၀ – ၃၀) ဒကေဝ်ရ။
“ကၠေင်ဓာတ်တံဂှ် လၟုဟ်ဏံ မွဲလဳတာ ကြပ် (၅၀၀၀) ဒှ်အာရ။ ရာန်ဟွံဝါတ်ကီုလေဝ် ၚုဟ်တိုန်ကၠုင်ရ။ ၚုဟ်ကၠေင်တိုန်တှ်ေ စရိတ်တၞဟ်တၞဟ်တံလေဝ် ဗက်တိုန်ကၠုင်ရ” သာ်ဝွံ ညးစကာကၠေင်မွဲတၠ ဟီုရ။
အတိုင်ၚုဟ်မးကၠေင်စက် မစၞောန်လဝ်တၟိဏံမ္ဂး ၚုဟ်မးကၠေင်ဓာတ်၊ ကၠေင်ဒဳဇြာ ပ္ဍဲတွဵုရးဍုင်မန်ဂှ် ၚုဟ်ဂၠိုင်နူကဵု လ္ဂုင်၊ ဘာအင်၊ ဗ္ဂေါ၊ ကေုာံ ရး/တွဵုရးတၞဟ်တံဖိုဟ်ရ။
အတိုင်ဂကောံပၠောပ်ခြိုင်တြးကၠေင်စက် တွဵုရးဍုင်မန်ဟီုဂှ်မ္ဂး Importer မပၠောပ်ကၠေင်စက် သွက်တွဵုရးဍုင်မန်တံဂှ် ဟွံကလိဂွံသြန်ဍုင်သၟာင် ဗီုကဵု Importer သၞေဟ် (သီလဝါ) ၊ လ္ဂုင်ဂှ်တုဲ ဒးပၠောပ်မံင်ကၠေင်စက် နကဵုသြန်ဒဝ်လာဇကုရ။
တုဲပၠန် နကဵုၚုဟ်မးစၟတ်လဝ်ဂှ် ဟွံဂွံအခေါင်ရာန်ဒဝ်လာတုဲ ဒးရာန်မံင်သြန်ဍုင်သၟာင် ၚုဟ်မးမကြပ်ကဵုဗွဝ်ဖျာမ္ၚးဂှ်ရ ၚုဟ်မးကၠေင်စက် ပ္ဍဲတွဵုရးဍုင်မန် သၠုင်တိုန်ရ။
ဝန်ဇၞော်ပရေင်ဆက်စၠောံဂၠံင်ဍာန်၊ ကွတ်စက်၊ အစောံဇြဟတ် ကေုာံ ဓာတ်လလဳ ဂကောံအလဵုအသဳပၞာန် တွဵုရးဍုင်မန် ဥူဇြေယျာဥူဂှ်ဝွံ ၚုဟ်မးကၠေင်စက် အပ္ဍဲတွဵုရးဍုင်မန် သွက်သ္ဂောံစှ်ေဂှ် ဂ္စာန်ဂၠာဲမံင်နဲကဲရောင် ဟီုဂးလဝ်ပ္ဍဲကၠတ်ထဝ်ရ။
ၜိုန်ဂှ်ကီုလေဝ် ဆေင်စပ်ကဵု သွက်တွဵုရးဍုင်မန် သ္ဂောံက္လေင်ဂွံအခေါင်ရာန်ကၠေင်စက် နူသၞေဟ် (သီလဝါ) ၊ လ္ဂုင်ဂှ်တုဲ ပြဟ်ပြဟ်ဏံ သွက်သ္ဂောံရေင်တၠုင်ကဵုဂှ် အစဳဇန်ဟွံမွဲဏီရောင် ညးက္လေင်သွဟ်လဝ် ပ္ဍဲကၠတ်ထဝ်ရ။
အခိင်လၟုဟ်ဏံဝွံ ကၠေင်စက်သွက်တွဵုရးဍုင်မန်ဂှ် နူကဵုသၞေဟ် Puma International Port Terminal မၞုံပ္ဍဲကွာန်ဂဒုင်ၜဝ်၊ ပွိုင်ဍုင်မုဟ်ဍုင်မွဲတဆံင် သွံတြးကဵုဒၟံင်တုဲ ကမ္ပဏဳ Myanmar Energy King ကေုာံ Ya Zar Min Industry တံ ကလိဂွံလဝ် အခေါင်ကၠောန်ရ။