ဂိတုအံက်တဝ်ဗာ စၟတ်တ္ၚဲ (၂) နူတနေံဏအ်ဝွံ ပ္ဍဲပွိုၚ်ဍုၚ်သၚ်္ခဠၜုရဳ (ဝၚ်က) အရာပ်နံၚ်လု၊ ဒေသကမ္မရဳဂှ် ဗၠာဲသၟိၚ်သေံတအ် ထပ်ရပ်ဂွံ သၟတ်ကောန်ဍုၚ်ဗၟာ ညးကၠတ်လုပ်ဍုၚ်သေံ (၇) တၠပၠန်ရောၚ် ဂွံတီကေတ်ရ။
အပ္ဍဲကဵုရပ်ဂွံလဝ်ညးတအ်ဂှ်မ္ဂး မၞိဟ်တြုံ (၅) တၠ ကဵု မၞိဟ်ဗြဴ (၂) တၠ ပါလုပ်မံၚ်တုဲ ဗၠာဲသၟိၚ်သေံ သၚ်္ခဠၜုရဳ မၚ်ဂီုကၠီုပိသွာၚ်/သာမ်ယျေက်တအ် စၟဳစၟတ်ကွဳစက်ဒမြိပ်လာၚ် ဍာန်ကျာ်ပိ-ကမ္မရဳမွဲဖ္ဍိုက်ဂှ် ဂွံဆဵုကေတ် ကောန်ဍုၚ်ဗၟာ ညးကၠတ်လုပ်ဍုၚ်သေံ အဝဲသၟတ် (၇) တၠရ။
ကောန်ဍုၚ်ဗၟာအဝဲသၟတ် (၇) တၠဏအ်ဝွံ သွက်ဂွံလုပ်စိုပ် အာကၠောန်ကမၠောန် ပ္ဍဲဍုၚ်သေံ မာန်ဂှ် ဒးကဵုကၠုၚ်စရိတ်ဂၠံၚ်ဍာန် ကုဃံၚ်ထပၠုပ်မၞိဟ်တအ် ဩန်သေံ (၃၀,၀၀၀) ၝာတ်နွံကၠုၚ်တုဲ အကြာဏအ် ဟိုတ်နူဂၠံၚ်ဍာန်ပရေံကီု မွဲအသိၚ်ဗြဲဂူကီုဂှ်ရ ညးကၠတ်လုပ်ဍုၚ်သေံတအ် ဒးဆဵုဂ္ဗကၠုၚ်ခက်ခုဲနာနာသာ်နွံရောၚ် ဂးရ။
လ္ပါ်ပယျဵုသေံ-ဗၟာ ဒေသကျာ်ပိဏအ်ဝွံ ပ္ဍဲမွဲဒမြိပ်ဂၠံၚ်လုပ်ဍုၚ်သေံ လ္ပါ်ဝၚ်က၊ ထံက်ခၞောန် ကဵု ကမ္မရဳဂှ်မ္ဂး ဒှ်ပၠော်ဂၠံၚ်အဓိကမွဲတုဲ သွက်ကောန်ဍုၚ်ဗၟာတအ် သ္ဂောံလုပ်စိုပ် အာကၠောန်စကမၠောန်ပ္ဍဲဍုၚ်သေံဂှ် နူကဵုဒေသပယျဵုသေံ-ဗၟာ ကျာ်ပိဏံမွဲအဆံၚ် အဃောကၠတ်လုပ်ကၠုၚ်ဂှ် ဒးဒုၚ်ရပ်စပ်မံၚ် ကုဗၠာဲသၟိၚ်သေံတအ် အဆက်က်နွံကၠုၚ်ရ။
ဒှ်သာ်ဂှ်ရ သၟတ်ကောန်ဍုၚ်ဗၟာကၠတ်လုပ်ဍုၚ် (၇) တၠကဵု ညးတၠဒဳကွဳစက်လာၚ် ကောန်ဍုၚ်သေံမွဲတၠဂှ် ရပ်ထိၚ်လဝ် ပ္ဍဲရုၚ်ဗၠာဲသၟိၚ် သၚ်္ခဠၜုရဳတုဲ ဆက်စၟဳစၟတ်ကေတ်မံၚ် အရေဝ်နွံရ။
အပ္ဍဲပယျဵုသေံ-ဗၟာ လ္ပါ်ဒေသပယျဵုကျာ်ပိဏအ်ဝွံ တုဲကၠုၚ်ဂိတုသေတ်တေမ်ဗာဏအ်ကဵု စဵုစိုပ်ဂိတုအံက်တဝ်ဗာ စၟတ်တ္ၚဲ (၃) ဏအ်ဂှ် ဗၠာဲသၟိၚ်သေံ၊ ဒပ်ပၞာန်မၚ်ဂီုကၠီု ဒေသပယျဵုတအ် ရပ်စပ်ဂွံမံၚ် ကောန်ဍုၚ်မန်ဗၟာ ညးကၠတ်လုပ်ဍုၚ်သေံတအ် အဆက်က်တုဲ သရောပ်မ္ဂး လၟိဟ်ၜိုတ် (၆၇) တၠနွံရောၚ် ဂွံတီကေတ်ရ။
Photo: Thai News