ပ္ဍဲဍုင်ကွာန်ဒေသမန် ဟိုတ်သၟတ်တအ် အောန်စှ်ေကၠုင်ဂှ်ရ ပ္ဍဲဗွိုင်မန်နာနာလေဝ် သၟတ်လုပ်အောန်ကၠုင်တုဲ ကဏ္ဍပရေင်ဂကူ ဇြဟတ်ဍိုန်စှ်ေကၠုင်ဂှ် ညးစိစောန်ပရေင်ဍုင်ကွာန်တအ် ဟီုရ။
သၟတ်မန်တအ်ဝွံ စိုတ်ဓာတ်ထတ်၊ ကောံကလောအ်လောဲတုဲ လုပ်ချဳဒရာင် ကေတ်မံင်တာလျိုင် ပ္ဍဲဗွိုင်ပရေင်ပညာ၊ ပရေင်ပၠန်ဂတးမန်၊ ပရေင်ဂကောံနာနာတအ်သၟးဟွံက သီုကေတ်လဝ်တာလျိုင် မင်မွဲမံင် အရေဝ်လိက်ပတ်ယေန်သၞာင် သီုစီုတ်သီုစရိုတ်ဂှ် ခေတ်အဆက်ဆက်နွံကၠုင်ရ။
ပ္ဍဲပစ္စုပ္ပန်လၟုဟ်ဏံ အကြာကွာန်မန်လ္ၚဵုတအ် သၟတ်စနူအာယုက် (၁၈) သၞာံလ္ပါ်လ္တူတအ် နွံဆဗၞတ်ညိညတုဲ သွက်ပရေင်ချဳဒရာင် အဆံင်ဂကူမန်ဂှ် လ္ပဟီုဏီ သွက်ဂွံအာက္ဍိုပ် ပရေင်ဂကောံသၟတ်ပ္ဍဲကွာန်ဂှ် စဵုကဵုဟွံမွဲဒှ်တုဲ ဒးကေတ်မံင်အရီုအဗင် နူသင်၊ ညးအုပ်ဓုပ်ကွာန်တအ် နွံဗွဲမဂၠိုင်ဂှ်လေဝ် ဂွံဆဵုကေတ်ရ။
သၟတ်စဳကၠး လ္ပါ်သွာင်စက်ဂတာပ်ခေတ်တအ် ပါလုပ်အောန်တုဲ ဂွံပ္တိုန်ထ္ၜး အကာဲအရာဂကူမန် ပ္ဍဲဂၠးတိမာန်ဂှ် ဇြိုင်မံင်ဖိုဟ်ရောင်ဂှ် ညးစိစောန် ပရေင်ဍုင်ကွာန်မန်မွဲတၠ သ္ဂးရ။
“ဇြဟတ်တိတ်မ္ၚးဂၠိုင်တှ်ေ ဇြဟတ်ဂၞိင်ဟွံမွဲ။ ဍေံဒှ်အဓိကရဏောင် ကၠောန်အလောန်မွဲမွဲ။ ဥပမာ ပ္ဍဲဗွိုင်ပရေင်ဍုင်ကွာန်ဏံ ဇြဟတ်ဂၞိင်ဟွံမွဲတှ်ေ technical team ဏံ ဍေံဟွံစိုန်သကီုပုဟ်။ တင်နင်ကီု မုကီု ဍေံအိင်လဇုဲလဇဏောင်။ အေဗီုပြင်ဂှ်ရ ဂကောံပရေင်ဍုင်ကွာန် ဍေံအိင်လဇုဲလဇဏောင်။” သာ်ဝွံ ဟီုရ။
သၟတ်တအ်အာက္ဍိုပ်တုဲ ကၠောန်ဗဒှ်မံင် ပရေင်အခိုက်ကၞာယေန်သၞာင်ကွာန် မပ္တံ ဖျာဂကောံသၟတ်၊ ပရေင်ဖောအ်ဗြေဝ်ကွာန်တအ်ဂှ် သၟတ်ဟွံမွဲတုဲ စဵုကဵုလီုလာ်အာနွံရ။
သွက်ဍာ်ဇမၠိင်ဂှ် အန္တရာယ်လက္ချန်ဂကူ ကၠေံကၠက်အာသၟးမာန်ဟွံက ဇြဟတ်သၟတ်တအ် ပါလုပ်အောန်တုဲ ပ္ဍဲဗွိုင်ဂကူမန်နာနာတအ်ဂှ် လဇုဲလအာမာန်မံင်ဏောင် ညးသ္ၚဳဂၠိပ်တအ် ထံက်ထ္ၜးရ။
“ကောန်ဂကူတၞဟ်တအ် (ဥပမာ- ချင်းတအ်) နူပၞာန်သီအဝဵုတုဲ သၟတ်ညးတအ်တိတ်ဍုင်သအာင်ဂၠိုင်ကီုလေဝ် သၟတ်ညးတအ် ဗွဲမဂၠိုင် ဂွံဖျဴနင် PhD အိုတ်တုဲ ဗီုဘာ Kimo institute တအ်ပံက်ကၠုင်မံင်နွံ၊ ဒှ်မံင်အထံက်အရီု သွက်ကောန်ဂကူညးတအ်ရ။ ပ္ဍဲမန်မ္ဂး လ္ပါ်ကတ်ပညာကီု၊ လ္ပါ်ကၠောန်ပိုန်ဒြပ်တုဲကီု ဂွံကလေင်ဒတုဲဖဵု၊ ဂွံဒှ်အထံက်အရီု ပဍဲအရာရုန်ဂ္စာန်မံင် သွက်ခေါင်ရာဗၠးၜးဂှ် ရိုဟ်လၟိဟ်ဒး၊ အောန်လောန်ရ” သာ်ဝွံ သၟတ်ညးမလ္ၚတ်မံင် ပရေင်သၟတ်မွဲတၠ သ္ဂးရ။
သွက်သၟတ်စိုပ်မံင်ဍုင်မ္ၚးတအ် ညံင်ဂွံပါလုပ်ကၠုင် ပ္ဍဲကမၠောန်ဂကူမန် မွဲနဲမွဲဗီုမာန်ဂှ် ဂကောံဗော်ဂကူမန်ဇဳတအ်၊ ညးစိစောန်တံ ညံင်သဂွံရေင်တၠုင်ဖန်ဖက်ကဵုဂှ် ပၟိက်ဇၞော်ကၠုင်ရ။
သွက်ကောန်ၚာ်သၟတ် ကတ်မံင်ပညာလၟုဟ်တအ်ဂှ်လေဝ် ညံင်ဟွံဂွံထပ်ရုဲစှ် ဂၠံင်တရဴဂၠာဲသြန်ဍုင်မ္ၚးဂှ် မိမတအ် လ္ပရန်ကဵုသြန်တုဲ ဓလိုက်တမ်ရိုဟ် ပ္ဍဲပရေင်ပညာအိုတ်ညိဂှ်လေဝ် ညးလ္ၚတ်ပရေင်ဍုင်ကွာန်တအ် ဖတိုက်ဖအောဝ်လဝ်ရ။