ပ္ဍဲတွဵုရးဍုင်မန်ဝွံ သြောံကသီုသၞာံဏံဂှ် သၟာင်နူဗၠိုက်ဍာ်အောန်တုဲ ဘဲအန္တရာဲစၟပလီုသြောံ အောန်ဒၟံင်ဂှ်ရ သြောံတိတ်ခိုဟ်ရောင် သၟာဗ္ၚတံ စၟဳကေတ်လဝ်ရ။
သၟာဗ္ၚတံဝွံ ဇၟာပ်သၞာံ မဒးဆဵုဂဗဒၟံင် ဘဲဒဏ်ဥတုရာသဳ၊ ဘဲစၟသြောံ၊ ၚုဟ်တဵုသြောံက္ဍင်၊ ကၠေင်စက်ဟွံရုံဂပ် ကေုာံ သၟာကမၠောန်အောန် / ဂၠာဲသၟာကမၠောန်ဝါတ်ကီုလေဝ် ကမၠောန်သြောံကသီု နူလက်ထက်ဇုဇဗဴလတံဂှ် နဲဂွံဂှ် ဆက်ကၠောန်ၜိုတ်ဒၟံင်ရ။
သွက်ဘဲအန္တရာဲစၟပလီုသြောံဂှ်မ္ဂး ပရဟ်ဒုင်ဖအိုတ်သြန် စကာလဝ်ဂဥုဲဂစိုတ်စၟ ကေုာံ ဂဥုဲစဵုဒၞာတုဲ အကာဲအရာထိင်ဒဝ်မာန်နွံဂှ်ရ သွက်သြောံဂွံတိတ်ခိုဟ်ဂှ် စၟဳကေတ်လဝ်ရောင် သၟာဗ္ၚနူထုင်မင်၊ ပွိုင်ဍုင်မုဟ်ဍုင်မွဲတၠဂှ် ဟီုရ။
“လၟုဟ် စၟစှ်ေညိညရ။ ပေင်သၠာတ် ဗီုသၞာံကၠာတေံ ဟွံသေင်ပုဟ်၊ ဓမ္မတာ ၜိုတ်ၜါကွဳ တိတ်မာန်ရ၊ ဂိတုဂတတေံတှ်ေ ရတ်ဂွံရဏောင်၊ ကျရိုဟ်သၞာံ၊ ဂဥုဲဂစိုတ်စၟနာနာကဵု ထဲဇိက်ဂှ် အိုတ်အာ (၁၆) ကိုဋ်ရ၊ လၟုဟ် ပကောံမံင် ကၠေင်ဓာတ်၊ ဒဳဇြာရ” သာ်ဝွံ ညးဟီုရ။
သၞာံတုဲကၠုင်တေံဝွံ ပ္ဍဲကဵုဝါ (၂၆) ဨကဂှ် သြောံတိတ် (၄၀၀) နဟေင်တုဲ ပ္ဍဲသၞာံဏံ ညံင်ဂွံတိတ်ဂၠိုင်ဂှ် ဆက်ကၠောန်သ္ပဒၟံင် ပရေင်ပရဟ်ဒုင်မင်မွဲစဵုဒၞာရဂှ်လေဝ် ညးဟီုရ။
ပ္ဍဲအခိင်သြောံတိတ်တေံ သြောံၚုဟ်ခိုဟ်မ္ဂး သွက်ဂွံစဵုဒၞာကဵု ပရေင်တမ်ရိုဟ်ဂှ် စၟဳကေတ်လဝ်ရောင် သၟာဗ္ၚ နူကွာန်ကၠအ်သတ်၊ ပွိုင်ဍုင်မုဟ်ဍုင်မွဲတၠဂှ် ဟီုရ။
“သ္ကုတ်ဂိတုဘတ်ကဵု ဝှ်ဂှ်တှ်ေ သြောံဂှ် (၄၀၊ ၅၀) ပါတ်ချာနွံရ။ အခိင်သြောံတိတ်တှ်ေ သၟာဗ္ၚတံဂှ် သွက်ဇကုပ္တိတ်လဝ်တမ်ဂှ် ဒးက္လေင်ဆာပ်နွံတုဲ အခိင်ဂှ်တှ်ေ သွံပ္တိတ်သြောံ၊ ကပေါတ်ဒးရာန်တၞဟ်တၞဟ်တံလေဝ် သၠုင်မံင်ဖအိုတ်တှ်ေ ဒးအာဗီုဏံရ။ ရတ်ကဵုစက်တှ်ေ ဒးမင်လအ်ရ” သာ်ဝွံ ညးဟီုရ။
မွဲလ္ပာ်ပၠန်ဂှ်လေဝ် လ္ပာ်ဒေသၜဳဂြာင်ကဵု လ္ပာ်ပွိုင်ဍုင်ကျာ်မြဟ်ဂှ် ညးကၠောန်ဝါဗ္ၚ အောန်စှ်ေကၠုင်သိုက်သိုက်တုဲ ဟိုတ်နူပရဲပရင် ဟွံသှ်ေဂှ်ရ ပ္ဍဲဝါဗ္ၚကြပ်ကဵုကွာန်တံဂှ် ညးကၠောန်ဝါဗ္ၚ (၁၀) တၠ ဟွံပေင်ဣရဂှ် ညးဒေသမွဲတၠ ဟီုရ။
ဟိုတ်နူအဆက်ဖဵု ညးကၠောန်ဝါဗ္ၚအောန်စှ်ေဂှ်ရ သွက်ဂွံဗ္တိုက်သရိုဟ်ဘဲအန္တရာဲ စၟခြအ် (ဖလံ) ကေုာံ စၟစၟောန်ဂမၠိုင်ဂှ် ဝါတ်ဂါတ်မံင်ရောင် သၟာဗ္ၚ ပွိုင်ဍုင်ပံင်မွဲတၠ ဟီုရ။
“စၟ (ဖလံ) ဂှ် သၞာံဏံ ညံင်ကဵုဂၠိုင်ကၠုင်ရ။ ဇၟာပ်ဝါ ဟွံကၠောန်တှ်ေ သွက်ဂွံဗ္တိုက်သရိုဟ် စံင်ပၟတ်ဂှ် ဇြဟတ်ဍိုန်ရ။ ဒှ်မံင်ဂၞဴသြောံဗု (စပါးနှံဖြူ) ဟွံအံင်ရပုဟ်။ ဂစတ်ဂဥုဲရ၊ ဆဂး ဗီုကဵုဟွံစိုပ်တရဴ” သာ်ဝွံ ညးဟီုရ။
ပ္ဍဲတွဵုရးဍုင်မန်ဝွံ တဵုလွဳသြောံကသီု ကြပ် (၇) ကိုဋ်ဨက လၟေင်သၞာံတုဲ သြောံတိတ် (၄၃၀) ကိုဋ်နပြင်ရ။ သြောံတိတ်ဂမၠိုင်ဂှ်ဝွံ သၟာင်နူစသုင်အပ္ဍဲဒေသဂှ်မ္ဂး သီုပလံင်ဗ္စိုပ် သွံဏာ ဇရေင်တွဵုရးတၞဟ်ကဵု ရးတၞဟ်တေံကီုရ။
အခိင်သြောံမံက်တိတ် ဂိတုနဝ်ဝေမ်ဗာ ကေုာံ ဒဳဇြေမ်ဗာဂတတေံမ္ဂး ဗွဲကြဴနူရတ်သီသြောံတုဲဂှ် ညံင်ဂွံဖအောန်ဖျေံ ပရေင်ဆောံလေင်သြောံကဵု သၟာဗ္ၚတံ သြန်လုပ်သ္ဂောံဂၠိုင်ဂးတုဲ သွက်ဂွံပံင်ကောံရေင်တၠုင် သၞောတ်ပအပ်ခြိုင်စွံဗၞိက်ဂှ် နူဂကောံသြောံသ္ၚုကၟိန်ဍုင်ဗၟာ ကမ္မယှေန်ပၞာန်တံ ကော်ဘိက်ဒၟံင်ရောင် ဂွံတီကေတ်ရ။