ပ္ဍဲကဵုပေဲါကောံဓရီုဇၞော်သၟတ်မန် အလန်စတုတ္ထ ဌာန်ကောံသၟတ်မန် MYF မက္ဍိုက်က္ဍိုပ်ကၠောန်ဗဒှ်ဂှ်ဝွံ ဒုင်သဇိုင်လ္တူတင်ဝါတ်ဂါတ် (တင်ကော်ဆော) မဒးဆဵုဂဗမံင် ကေုာံ အကာဲအရာသၟတ်မန်တ္ၚဲဏံတုဲ သဳကၠဳဖျေံကၠုင်သ္ဂုတ်သွာတ် (၉) တင်ကဵု တင်စၞောန်ပ္ညုင် (၇) တင်နွံရောင် ဂွံတီကေတ် နူကမ္မတဳကၠောန်ဗဒှ်တံ လလောင်ပ္တိတ်လဝ်ရ။
ကောံဓရီုဇၞော်သၟတ်မန် အလန်စတုတ္ထဏံဝွံ ပ္ဍဲဂိတုအံက်တဝ်ဗာ စၟတ်တ္ၚဲ (၁၇၊ (၁၈) တုဲကၠုင်ဏံ မကၠောန်ဗဒှ်လဝ် ဒၞာဲဌာန်ပ္တန်သာသနာ၊ ဘာကျာ်ဒဵုတၟံဗြာတ်၊ ပွိုင်ဍုင်ရေဝ်ဂှ်ရောင် ဂွံတီကေတ်ရ။
သၟတ်မတိုန်စိုပ်ကၠုင်ကောံဓရီုဇၞော်ဂှ်ဝွံ သၟာင်နူတင်ကော်ဆောပရေင်ဂီုကၠီု မဒးဆဵုဂဗမံင် အပ္ဍဲဒေသဇကု၊ ပြဒ္ဒညာဂဥုဲၜူမာဲ၊ ကိစ္စကေင်ကာမူဝါဒသၟတ်မန်တုဲ ညးတာလျိုင်အဆံင်ဆံင် ဌာန်ကောံသၟတ်မန် MYF ဂှ်လေဝ် ကၠောန်သ္ပရေင်တၠုင် က္လေင်ရုဲစှ်လဝ်ရောင် ဂွံတီကေတ်ရ။
ခေတ်ကာလတ္ၚဲဏံဝွံ အဓိက သၟတ်တံ မဒးဆဵုဂဗမံင် ကိစ္စဂဥုဲၜူမာဲ ကေုာံ တင်ကော်ဆော ပရေင်ဂီုကၠီုရောင် အတိုင်သၟတ်မတိုန်စိုပ်တံ သဳကၠဳပ္တိုန်ထ္ၜးလဝ်ဂှ် ဂွံတီကေတ်ရ။
ဒုင်သဇိုင်လ္တူတင်ကော်ဆော ကေုာံ တင်ကြေပ်ဂြတ် (ဝါတ်ဂါတ်) ဂမၠိုင်ဂှ်တုဲ ဖျေံကၠုင်သ္ဂုတ်သွာတ် (၉) တင် ကေုာံ တင်စၞောန်ပ္ညုင် (၇) တင်မာန်ရောင် နူ MYF လလောင်ပ္တိတ်လဝ်ရ။
ဟိုတ်နူသၞောဝ်ဥပဒေယိုက်ဂၠေင်ပၞာန် ကေုာံ အပြံင်အလှာဲပရေင်ဍုင်ကွာန်ဂှ်ရ အပ္ဍဲဒေသမန်ဂှ် သၟတ်တံ တိတ်ဍုင်မ္ၚးဂၠိုင်တုဲ မဒးဆဵုဂဗမံင်ကဵု တင်ကော်ဆော သၟတ်ပါလုပ် ပ္ဍဲဂကောံမန်နာနာ အောန်စှ်ေကၠုင်ရဂှ်လေဝ် ညးတိုန်စိုပ်ဂမၠိုင်တံ သဳကၠဳလဝ်ရ။
ကောံဓရီုဇၞော်သၟတ်မန် အလန်စတုတ္ထဏံဝွံ သၟတ်နူပွဳဗွိုင်ဗော်ပရေင်ဍုင်ကွာန်မန်ဂမၠိုင်၊ ညးစၞးသၟတ် အဆံင်ပွိုင်ဍုင် ကေုာံ ရးဒေသဇၞော်ဂမၠိုင်၊ သၟတ်နူဂကောံသၟတ်နာနာဂမၠိုင်၊ ညးစၞးသၟတ် နူဂကောံမှာဇန်မန်ဂမၠိုင်၊ ညးစၞးနူဂကောံသင်သၟတ်ဂမၠိုင်၊ ညးတာလျိုင်တြေံ MYF ကေုာံ ညးလ္ၚတ်/ညးဘိက်ထေက်တံကီု သီုဖအိုတ် (၁၆၃) တၠ တိုန်စိုပ်လဝ်ရ။
ကောံဓရီုဇၞော်သၟတ်မန် အလန်ပထမဝွံ ပ္ဍဲသၞာံ (၂၀၁၄) ဂှ် မကၠောန်ဗဒှ်လဝ် ပ္ဍဲတိုက်လိက်ပရိယတ္တိမန်၊ သာသနာ (၂၅၀၀) ၊ ဍုင်မတ်မလီုတုဲ အကြာသၟတ်မန်တံ ညံင်ဂွံနွံကဵုမူဝါဒမွဲသာ်ကီုဂှ် ဒက်ပ္တန်ကမ္မတဳအဆံင်ဆံင်တုဲ သွက်ဂွံချူဓဇက်မူအပြောံဂှ် ၜါသၞာံမွဲဝါ ကၠောန်ဗဒှ်အာ ကောံဓရီုဇၞော်သၟတ်မန်ရောင် စဳဇန်လဝ်ရ။