သတ်တိတ်နူဒေသရေဝ်၊ တွဵုရးဍုင်မန်ဂှ် ဂွံၚုဟ်ဟွံခိုဟ်ဏီဂှ်ရ သၟာကၠအ်တံ ချိင်ဆသွံဒၟံင်တုဲ ခြိုင်စွံလဝ် စဵုကဵုအခိင်ဂွံၚုဟ်ခိုဟ်တေံရောင် ဂွံတီကေတ် နူဒေင်ရာန်သတ်ကဵု သၟာကၠအ်သတ်တံရ။
ပြဟ်ပြဟ်ဏံ ပရေင်သွံသတ်ဂၠိုင်မံင်ဂှ်ရ သတ်ကှ်ကှ်မွဲပသာ ၚုဟ်နွံဒၟံင် အကြာ (၈၀၀၀၊ ၉၀၀၀) ဒကေဝ်ဟေင်တုဲ သတ်တၟိဂှ် စၟတ်လဝ်ၚုဟ် အကြာ (၆၀၀၀) ဒကေဝ်ဟေင်ရောင် ဂွံတီကေတ် နူဒေင်ရာန်မွဲတၠရ။
ဟိုတ်ဂှ်ရ ၜိုတ်စရိတ်နွံပၟိက်စကာဂှ်ဟေင်သွံတုဲ သတ်ဂမၠိုင်ဂှ် ခြိုင်စွံလဝ် စဵုကဵုၚုဟ်က္လေင်တိုန်ကၠုင်တေံရောင်။ အတိုင်ဗွဝ်ဖျာနွံပၟိက်မ္ဂး ၚုဟ်သတ်သွက်သ္ဂောံက္လေင်တိုန်ဂှ် ကၠောန်သ္ပရေင်တၠုင်မံင်ရောင် ဒေင်ရာန်သတ် ဍုင်ရေဝ်မွဲတၠ ဟီုရ။
“လၟုဟ် ညးသွံဂၠိုင်တုဲ ၚုဟ်စှ်ေမံင်ရ။ ဂိတု (၁၁၊ ၁၂) တှ်ေ ၚုဟ်ခိုဟ်ဏောင် ခယျလဝ်ရ။ ဟိုတ်ဂှ်ရ လ္ပသွံကွေံ စွံလဝ်ညိ၊ ၚုဟ်တိုန်ကၠုင်မာန်ရ။ သတ်တၟိတံလေဝ် လ္ပသွံဏီ၊ ၚုဟ်ဟွံမွဲပုဟ်။ ၜိုတ်မွဲရိုက်ၜါရိုက် စရိတ်သုင်စောဲဟေင် သွံညိ၊ ဇှ်မှ ၚုဟ်ဂှ် အလဵုလဵုတိုန်ကၠုင်ဏောင်” သာ်ဝွံ ညးဟီုရ။
ဟိုတ်နူသၞောတ်ဗ္ၜတ်လဝ် အခေါင်ပလံင်ဗ္စိုပ် လ္ပာ်ကၟိန်ဍုင်အိန္ဒိယျတေံတုဲ တင်ဝါတ်ဂါတ်နွံကီု၊ ကံက်အခေါန်ဂၠိုင်ကီုဂှ်ရ ပရေင်ရာန်သတ်အောန်တုဲ ၚုဟ်စှ်ေမံင်ရဂှ်လေဝ် ဂးလဝ်ကီုရ။
တုဲပၠန် သတ်တိတ်နူဒေသရေဝ်လ္ၚဵုတံဂှ်ဝွံ ဟွံဗကှ်လဝ်ခိုဟ်ခိုဟ်မွဲသာ် ခြိုင်စွံလဝ်ဂှ်ရ ဍာ်ဒကေဝ်ဟွံခိုဟ်တုဲ ဟွံဂွံၚုဟ်ခိုဟ်ခိုဟ်ကီု ဂးရ။
ၜိုန်ဂှ်ကီုလေဝ် သၟာကၠအ်တံဝွံ သွက်စရိတ်စကာလၟေင်တ္ၚဲ ကေုာံ သွက်ပရေင်စသုင်မံင်စံင် သ္ၚိကၟိန်တုဲ သတ်မခြိုင်စွံလဝ်ဂမၠိုင်ဂှ် ဒးသွံပ္တိတ်မံင်ဇၟာပ်ဂိတုရောင် ဗြဴတၠသ္ၚိ နူပွိုင်ဍုင်ရေဝ်မွဲတၠ ဟီုရ။
“သၞာံတုဲတေံ ၚုဟ်ခိုဟ်မံင်ညိညိဏီ။ ဒေင်လ္ၚဵုဂှ်တှ်ေ ညးတံရာန်လေဝ် ဟွံရာန်ရပုဟ်။ သတ်တၟိတိတ်တှ်ေ သွက်ၚုဟ်ဂွံခိုဟ်ကၠုင်ညိညိဂှ် စၟဳလဝ်ရ။ သတ်ၜတ်ၜတ်ဟေင် ညးၜှ်ဂၠိုင်ရ။ သတ်ခြိုင်စွံလဝ်သၞာံတုဲတေံ ပသှ်ေစွံလဝ်ညိညိတှ်ေ သွံမံင်ရိုဟ်ဂိတုရ၊ ၜိုတ်စရိတ်နွံပၟိက်သုင်စောဲဂှ်တှ်ေ” သာ်ဝွံ ညးဟီုရ။
ပြဟ်ပြဟ်ဏံ အဃောၚုဟ်မးကပေါတ်စၞစသုင် တိုန်ဒၟံင်ဏံဂှ် သၟာင်နူသတ်မ္ဂး ခၟာဲၜုက်လေဝ် ၚုဟ်စှ်ေဒၟံင်တုဲ မွဲပသာ ၚုဟ်နွံဒၟံင် အကြာ (၂၀၀၀) ဒကေဝ်ဓဝ်ဂှ်ရ သၟာကၠအ်တံ တော်စဟွံကိတ်အိုတ်ရ။