ဟိုတ်နူအကာဲအရာဂီုကၠီုတုဲ ဂွံတတ်ကၠောံအာကၠုၚ် သ္ကုတ်ဂၠံၚ်ကွဳစက် တဂေါန်ဒေၚ်-ပုလိၚ်-အၜေတ်၊ ပွိုၚ်ဍုၚ်လှာဒကှ်၊ တွဵုရးကရေၚ်ဂှ် ဟွံလောဲသွာဏီရောၚ် ဒပ်ပၠန်ဂတးဗလးတိကဵု ညးဒေသတံ ဟီုရ။
ကရောၚ်ပၞာန်ကမ္မယှေန်ပၞာန် မဖျေံလဝ်ဒပ် အပ္ဍဲကွာန်ပုလိၚ်ဂှ်ဝွံ ဂိတုအံက်တဝ်ဗာ (၁၄) ၊ နူတနေံဏံ အခိၚ်သဝ်တ္ၚဲဂှ် က္လေၚ်ဆုတ်တိတ်အာ ဇရေၚ်တမ်ဒပ်အၜေတ်၊ ဖျေံသဇိုၚ်မုဟ်ဍုၚ်ဂှ်တုဲ ဟွံထပ်ဒှ်ပေဲါဗ္တိုက်ဏီ ဂွံတီကေတ်ရ။
ဟိုတ်ဂှ်ရ ကွဳစက်လ္ၚဵု ဒးဒေံါဆိုအ်ဒၟံၚ် ပ္ဍဲသ္ကုတ်ဂၠံၚ်ကွဳစက် တဂေါန်ဒေၚ်-ပုလိၚ်-အၜေတ်ဂှ်မ္ဂး နဲဂွံဂှ် ဒးတတ်အာကၠုၚ်မံၚ်ကီုလေဝ် ပရေၚ်ပၞာန်ၜါလ္ပာ်ဟွံညိၚ်ဝတ်ဂှ်ရ ဒးဒှ်မံၚ်ဂဝိၚ်ကဵု အကာဲအရာပရေၚ်ဂီုကၠီုရောၚ် ညးဒေသ နူဂကောံကွာန်တဂေါန်ဒေၚ် မွဲတၠ ဟီုရ။
“ဇေတ်ဇေတ်ဂှ် အာဟွံဂွံဏီပုဟ်။ ဂကောံၜါလ္ပာ်တံ နွံမံၚ်ကြပ်တေံ ကြပ်ဏံမာန်ဏီရ။ ဂကောံပၠန်ဂတးတံလေဝ် ဟွံကဵုအခေါၚ်အာဏီပုဟ်။ သၟာကွဳစက်တံရ မုမုဠဝ်မံၚ်ဂှ် ဟွံတီရ။ ထၜေက်မတ် (ဂံၚ်) တုဲတှေ် အာမံၚ်နွံရ” သာ်ဝွံ ညးဒေသလ္တူဂှ် ဟီုရ။
တ္ၚဲဏံ ဂိတုအံက်တဝ်ဗာ (၁၅) ၊ အခိၚ်တ္ၚဲစေၚ်ဂှ် ဟိုတ်နူပရိုၚ် ဂကောံဒပ်ကမ္မယှေန်ပၞာန် ဆုတ်တိတ်အာဂှ် က္လေၚ်စိုပ်ကၠုၚ်ပၠန်ဂှ်ရ ထပ်ဗၞတ်ဗ္ၜတ်လဝ် အခေါၚ်အာကၠုၚ် သ္ကုတ်ဂၠံၚ်တဂေါန်ဒေၚ်-ပုလိၚ်-အၜေတ်ပၠန်ဂှ်လေဝ် ဂွံတီကေတ်ရ။
ဟိုတ်ဂှ်ရ ပ္ဍဲကဵုသ္ကုတ်ဂၠံၚ်ဂှ်ဝွံ သၟာၚ်နူပရေၚ်ဂိဂေၚ်ချိုတ်ဂျိုၚ်မ္ဂး လ္ပအာကၠုၚ်တုဲ ဒးဆက်မၚ်ရံၚ် အကာဲအရာပၞာန် ၜိုတ် (၃) တ္ၚဲပၠန်ဂှ်လေဝ် ဖ္တိုက်ဖၟောဝ်လဝ်ရ။
ညးကြပ်ကဵုဒပ်ပၠန်ဂတးဗလးတိမွဲတၠဂှ် “နူတနေံဏံ ကာတံ အာမံၚ်ကဵုအခိၚ်ရ။ လၟုဟ်လေဝ် ပ္ဍဲကဵုကာဒေံါဆိုအ်မံၚ်တံဂှ်တှေ် ကာဂံၚ်အာတံ အာမံၚ်ရ။ ဍေံတံ က္လေၚ်ဆုတ်အာကီုလေဝ် အန္တရာဲနွံမာန်ဏီရ။ တ္ၚဲဏံလေဝ် အဃောအကာဲအရာခိုဟ်ဂှ် ကာဒေံါဆိုအ်မံၚ်ဗွဲမဂၠိုၚ်တံ စှေ်အာရ။ ဆဂး လ္ပာ်အၜေတ်ဂှ်တှေ် ဇြဟတ်ဍေံတံ ပေၚ်မံၚ်ရ” သာ်ဝွံ ဟီုရ။
စနူဂိတုအံက်တဝ်ဗာ (၁၂) ၊ အခိၚ်သဝ်တ္ၚဲဂှ် က္တဵုဒှ်ပေဲါဗ္တိုက်ကြပ်ကွာန်ပုလိၚ်၊ ဂကောံကွာန်တဂေါၚ်ဒေၚ်ဂှ်တုဲ ပ္ဍဲပွဳပွူကွာန်ပုလိၚ်ဂှ် လ္ပာ်ကမ္မယှေန်ပၞာန်တံ ပန်မံၚ်ကဵု က္ၜၚ်ကျာ၊ လွဟ်ဇၞော် အဆက်ဆက်ရ။
အပ္ဍဲကဵုပေဲါဗ္တိုက်ဂှ်မ္ဂး ဟိုတ်နူဒးကမ်လွဟ်တုဲ ကောန်ကွာန်ဟွံအောန်နူ (၃) တၠ ဒးချိုတ်အာလဝ်ကီု သီုကွဳလိုန်ဓာတ်ဂမၠိုၚ်လေဝ် လီုလာ်အာနွံရ။
ဆေၚ်စပ်ကဵု ပရူဒဒှ်ပေဲါဗ္တိုက် ကေုာံ ပရေၚ်ဒးဘဲဝပ်ချိုတ်ဂျိုၚ်တုဲ စဵုကဵုတ္ၚဲဏံ လ္ပာ်ဂကောံကမ္မယှေန်ပၞာန်ကဵု ဂကောံဒပ်ပၠန်ဂတးတံ လလောၚ်ပ္တိတ်လဝ် ဟွံမွဲဏီရ။
သ္ကုတ်ဂၠံၚ်ကွဳစက် တဂေါန်ဒေၚ်-ပုလိၚ်-အၜေတ်ဂှ်ဝွံ ဒှ်ဂၠံၚ်ဍာန်မဆက်စၠောံလဝ် ဍုၚ်ကျာ်ပိ၊ တွဵုရးကရေၚ် ကေုာံ မန်တုဲ ဟိုတ်နူပေဲါဗ္တိုက်ဂှ်ရ ညးအာတရဴဂမၠိုၚ် ဒးဒေံါဇူဒီုဒၟံၚ် ပ္ဍဲကဵုကွာန်ကြပ်ကြပ်တံဂှ်ကီု ဂွံတီကေတ်ရ။