ပ္ဍဲကဵုမဒှ်အာလဝ် ပေါဲဗ္တိုက်ကဵု ဒပ်ပၠန်ဂတးဖျေံသ္ဇိုင်ဒေသ အကြာပွဳပွူကွာန်ပုလိင် ပွိုင်ဍုင်လှာဒကှ် နူတဏေံ (ဝှ် ၁ မံက်) တေံဂှ် လ္ပာ်ဒပ်ပၞာန်ဗၟာတၠအဝဵုတအ် ဒးဝပ်နွံဂၠိုင်မံင်ရောင် ဂွံတီကေတ် ပရိုင်ဗွဲကိုပ်ကၠာရ။
“တ္ရဲဏအ် ဍေံတံင်ကေတ်ဏာကာအဆဝ် ဍေံပလံင်ရဲဒးဝပ်ဍေံ ၜိုတ် ၃၀ (တၠ)” သာ်ဏအ် ညးဒေသမွဲတၠ ဗီုညးတီလဝ်ဂှ် လဴထ္ၜးကၠုင်ရ။
ဟိုတ်နူအသိင်ပေါဲဗ္တိုက်နူတဏေံတေံဂှ်တုဲ တ္ရဲဏအ် အခိင်သဝ်တ္ရဲ အကြာ ၄ နာဍဳပြင်င်ဂှ် ပဝ်ကၠုင်ကဵုက္ၜင်ကျာပၞာန် ထောံဂြာတ်ဖျေံဗမ် ဗၞတ် ၂ မရောင် ရဲဒေသမမိင်တီလဝ်ပရူဒဒှ် တၞဟ်မွဲတၠပၠန်ဂှ် လဴထ္ၜးကၠုင်ပၠန်ရ။
ဟိုတ်နူဘဲဒးဒုင်ဂြာတ်ဖျေံဗမ်ကဵုက္ၜင်ကျာပၞာန်ဗၟာသာ်ဂှ်တုဲ ပရေင်ဇီုကပိုက်ဗီုလဵုနွံ တီကေတ်ဟွံမာန်ဏီရ။
လဂွံကဵုဂလာန်ရဲဒေသဂှ်ဟီုကၠုင်လဝ်မ္ဂး သွက်ဂွံပြံင်သၠာဲမၞိဟ် ပ္ဍဲတမ်ဒပ် မၞုံကွာန်တဂေါန်ဒေင်တုဲ ဒပ်ပၞာန်ဗၟာ ထ္ပက်တိုန်ကၠုင်ကရောင်ပၞာန်ဂှ် ဒှ်အာပေါဲဗ္တိုက်ကဵုကောန်ပၞာန်မန်တအ်ရောင်ဟီုကၠာလေဝ် ကိစ္စဏအ် နကဵုဌာန်ပရိုင်ဗၠးၜးမန် သ္ပဒ္တန်ဟွံဂွံဏီရ။
“ကောန်ကွာန်သှ်ေမံင် ပ္ဍဲကွာန်ပုလိင်ဂှ် ဗမာတအ် ဟွံကဵုအခေါင်တိတ်ရ” သာ်ဏအ်လေဝ် ညးဆက်လဴထ္ၜးလဝ်အကာဲအရာတ္ရဲဏအ်ကီုရ။
ပြဟ်ဟ်ဏအ် လ္ပာ်ဒပ်ပၞာန်ဗၟာတအ် ထပ်ဂလိုင်ပ္တိုန်လဝ်ဇြဟတ်ပၞာန်တုဲ သာ်ဂှ်ကီု လ္ပာ်ရဲပၠန်ဂတးလေဝ် မင်ဂွန်ကေတ်လဝ်ဒၞါဲကီုရောင် ဂွံတီကေတ်ရ။