သၞာံ ၂၀၂၆၊ စနူဂိတုအံက်တဝ်ဗာ စၟတ်တ္ၚဲ (၉) စဵုစိုပ် စၟတ်တ္ၚဲ (၁၂) တ္ၚဲဏအ်ဝွံ ပ္ဍဲကၟိန်ဍုၚ်သေံ အကြာပွိုၚ်ဍုၚ်သၚ်္ခဠၜုရဳ (ဝၚ်က) ကဵု ကမ္မရဳဂှ် ဗၠာဲသၟိၚ်သေံတအ် စၟဳစၟတ်ရပ်ဂွံ ကောန်ဍုၚ်ဗၟာ ညးကၠတ်လုပ်ဍုၚ်သေံ (၃၉) တၠပၠန်ရောၚ် ဂွံတီကေတ်ရ။
လ္ပါ်ပယျဵုသေံ-ဗၟာ ဒေသကျာ်ပိဏအ် မွဲဒမြိပ်ဂၠံၚ်လုပ်ဍုၚ်သေံ လ္ပါ်ဝၚ်က၊ ထံၚ်ခၞောန်၊ ကမ္မရဳဂှ်မ္ဂး ဒှ်ပၠော်ဂၠံၚ်အဓိကမွဲတုဲ ကောန်ဍုၚ်ဗၟာတအ် သွက်သ္ဂောံလုပ်စိုပ် အာကၠောန်စကမၠောန်ပ္ဍဲဍုၚ်သေံဂှ် နူကဵုဒေသပယျဵုသေံ-ဗၟာ ကျာ်ပိဂှ်မွဲတဆံၚ် အဃောကၠတ်လုပ်ဂှ် ဒးဒုၚ်ရပ်စပ် ကုဗၠာဲသၟိၚ်သေံတအ်နွံရ။
အကြာသတ္တဟဏအ်ဝွံ ပ္ဍဲဂိတုအံက်တဝ်ဗာ စၟတ်တ္ၚဲ (၁၀) လ္ပါ်ကမ္မရဳဂှ် (၇) တၠ၊ နူကဵုတနေံဏအ် ဂိတုအံက်တဝ်ဗာ စၟတ်တ္ၚဲ (၁၁)၊ အခိၚ်နူဂယး (၇)နာဍဳ ပ္ဍဲပွိုၚ်ဍုၚ်သၚ်္ခဠၜုရဳ (ဝၚ်က)ဂှ် (၂) တၠ ကဵု အခိၚ်ဗ္တမ် (၇) နာဍဳကဝိုက်ပၠန်ဂှ် (၁၄) တၠ ရပ်စပ်ဂွံလဝ် အဆက်က်ရ။
ကောန်ဍုၚ်ဗၟာညးကၠတ်လုပ်ဍုၚ်သေံ ဒးဒုၚ်ရပ်စပ်လဝ်ဂမၠိုၚ်တအ်ဝွံ ဗၠာဲသၟိၚ်သေံတအ် စၟဳစၟတ်ကေတ်အရေဝ်တုဲမ္ဂး ကလေၚ်ပလံၚ်ကိုဟ်ပတိတ်မံၚ် လ္ပါ်ဒေသပယျဵုကျာ်ပိဂှ်နွံရောၚ် ဂွံတီကေတ်ရ။
ပယျဵုသေံ-ဗၟာ လ္ပါ်ကဵုဒေသပယျဵုကျာ်ပိဂှ်ဝွံ ပ္ဍဲဂိတုအံက်တဝ်ဗာဏအ်သၟးဂှ် ဗၠာဲသၟိၚ်သေံ၊ ဒပ်ပၞာန်မၚ်ဂီုကၠီုဒေသပယျဵုတအ် ရပ်စပ်ဂွံမံၚ် ကောန်ဍုၚ်မန်ဗၟာညးကၠတ်လုပ် ဍုၚ်သေံတအ် အဆက်က်တုဲ သရောပ်မ္ဂး လၟိဟ် (၅၃) တၠနွံရောၚ် ဂွံတီကေတ်ရ။