ပ္ဍဲဒေသသင်ခဠၝုရဳ (ဝင်က) ၊ တွဵုရးကာန်ချဏၝုရဳ (ကမ္မရဳ) ၊ ကၟိန်ဍုင်သေံဝွံ ပ္ဍဲဂိတုနဝ်ဝေမ်ဗာ စၟတ်တ္ၚဲ (၇) ၊ တ္ၚဲသ္ၚိသဝ်ဏံမ္ဂး သွက်ဂွံကၠောန်ဗဒှ်အာ ပေဲါတိင်တက်ကွိင်ကွိုက်ထ္ၜးပျး အခိုက်ကၞာယေန်သၞာင်ကောန်ဂကူ ညးဒေသတံ ဗွဲမမိပ်မြဟ်နွံရောင် ဂွံတီကေတ်ရ။
ပ္ဍဲကဵုပေဲါတိင်တက်ကွိင်ကွိုက်ဏံ သွက်သ္ဂောံဓမံက်ထ္ၜး အာဲကၟာဲအခိုက်ကၞာယေန်သၞာင် ကောန်ဂကူကောန်ဍုင်အရင် ညးဒေသတံဂှ် စုတ်လဝ်အစဳဇန်ဗွဲမဂၠိုင်တုဲ စပ္တံနူအခိင်နူဂယး (၇းဝဝ) နာဍဳဂှ် ကၠောန်ဗဒှ်အာ အသေအဟာန် / သဘင်ပူဇဴကလော် (နတ်ပူဇော်ပွဲ) ရ။
တုဲပၠန် အခိင်လဒေါဝ်တ္ၚဲ၊ တ္ၚဲစေင်ဂှ် လုပ်စိုပ်လ္ၚတ်ခဒမ်ထ္ၜးပျး အခိုက်ကၞာယေန်သၞာင် ကောန်ဂကူကောန်ဍုင်အရင်ဂမၠိုင်မာန်တုဲ အခိင်သဝ်တ္ၚဲ၊ ဗ္တံမ္ဂး ပွမလှေ်အခိုက်ကၞာယေန်သၞာင်ဂမၠိုင်၊ ပွမထ္ၜးလဝေင်ဇာတ်နဇိုင်နတဲဂမၠိုင် ပါလုပ်ရ။
အသေအဟာန် / ပေဲါတိင်တက်ကွိင်ကွိုက်ဏံဝွံ နူကဵုဂကောံအုပ်ဓုပ် သင်ခဠၝုရဳ (ဝင်က) က္ဍိုက်က္ဍိုပ်ပံက်အာတုဲ သီုကဵုကၠောန်ဗဒှ် အစဳဇန်ပေဲါသဳကၠဳ မပါလုပ် ညးတာလျိုင်အာတရဴ ကေုာံ တၠပညာဆေင်စပ်ကဵု အခိုက်ကၞာယေန်သၞာင် အပ္ဍဲဒေသတံနွံရ။
တုဲပၠန်မ္ဂး ကောန်ဂကူကောန်ဍုင်အရင် မံင်တန်တဴဒၟံင် အပ္ဍဲဒေသသင်ခဠၝုရဳ (ဝင်က) တံလေဝ် တိင်တက်လှေ်လဟိင်ကဵု ဒိင်သၟိင်ၜိုပ်ထဝ်၊ လှေ်ဒိင် (ဒုံးအက)၊ လှေ်ဗီုပြင်သဇိုင်အခိုက်ကၞာဂမၠိုင်ကီုရောင် ဂွံတီကေတ်ရ။
ဒေသသင်ခဠၝုရဳ (ဝင်က) မကၠောန်ဗဒှ် ပေဲါသဘင်တိင်တက်ကွိင်ကွိုက်ဏံဝွံ သၟာင်နူဒှ်ဒေသၜဳပိသွာင်ကိစ္စဇၞော်ဂှ်မ္ဂး သ္ပအစာံကဵု ဒေသပယျဵုကျာ်ပိတုဲ “ပေဲါသဘင်တိင်တက်အခိုက်ကၞာယေန်သၞာင်ဒေသၜဳပိသွာင်” “မြစ်သုံးသွယ်ဆုံရာဒေသ၏ တေးဂီတယဉ်ကျေးမှုပွဲတော်” လေဝ် ဟီုဂးစကာလဝ်ရ။
အသေအဟာန်/ပေဲါတိင်တက်ကွိင်ကွိုက်ဏံဝွံ နူဂကောံဂၠာဲသြန်ဂအုံသုတေသန ကေုာံ ဌာနတိင်တက်ကွိင်ကွိုက်(ဂဳတ) တက္ကသိုလ်မဟဳဒဝ် (Mahidol Music) တံ ပံင်ကောံတုဲ သွက်ဂွံဓမံက်/ထိင်ဒဝ် အခိုက်ကၞာယေန်သၞာင် တိင်တက်ကွိင်ကွိုက်(ဂဳတ) ကောန်ဂကူကောန်ဍုင်အရင် မၞုံအပ္ဍဲဒေသသင်ခဠၝုရဳ (ဝင်က) ကေုာံ သွက်ဂွံသၠုင်ပ္တိုန် ပရေင်ကမၠောန်အာတရဴအခိုက်ကၞာယေန်သၞာင်ဂှ် ရန်တၟံလဝ်ရောင် ဂွံတီကေတ်ရ။