ဝဏ္ဏမာန်၊ ဂျောန် ၂၀၊ ၂၀၂၀
သွက်ဂွံရုဲစှ် ညးစၞးအလံၚ်အမာတ် ပ္ဍဲကဵုပေဲါရုဲမာဲ (၂၀၂၀) ဏံဂှ် နူကဵုဂကောံရုဲစှ် ညးစၞးအလံၚ်အမာတ်ဗဟဵုတံ ပါ်လဝ်တာလျိုၚ် (၅) ဂကောံတုဲ စှေ်ဒၟံၚ်ပရေၚ်သောၚ်ကလး အကြာပွိုၚ်ဍုၚ်ဂမၠိုၚ်ရ။
နူကဵုဂကောံရုဲစှ် ညးစၞးအလံၚ်အမာတ် အဆံၚ်ဗဟဵုတံ အဃောကာလ စှေ်သောၚ်ကလး သၞောတ်သၞောဝ်ရုဲစှ် ညး စၞးအလံၚ်အမာတ် လုပ်ဒုၚ်ရုဲပေဲါရုဲမာဲဂှ်မ္ဂး သီုကဵုသောၚ်ကလးအာ သွက်ဂွံဒက်ပတန် ဂကောံရုဲစှ် ညးစၞးအလံၚ်အ မာတ် အဆံၚ်ပွိုၚ်ဍုၚ်ညးကဵုညးရ။
သၞောတ်သၞောဝ်ရုဲစှ်ဂှ် စရာဲဍာ်ဒကေဝ်အလံၚ်အမာတ် (၁၈) တၚ်၊ တၚ်သ္ဒးဒ္ဂေတ်ဗက် ကေုာံ တၚ်ဒုၚ်ဂတိ (၈) တၚ်၊ တၚ်ဒုၚ်သ္ဇိုၚ်မူဝါဒ ပရေၚ်ရုဲစှ် (၅) တၚ်၊ သၞောတ်ရုဲစှ် (၁၃) တၚ်၊ လၟေၚ်ကမၠောန်ဂကောံရုဲစှ် အဆံၚ်ဗဟဵု (၆) တၚ်ကဵု လၟေၚ်ကမၠောန်ဂကောံရုဲစှ် အဆံၚ်ပွိုၚ်ဍုၚ် (၉) တၚ်ရ။
ပ္ဍဲကဵုသၞောတ်သၞောဝ်ရုဲစှ် ညးစၞး အလံၚ်အမာတ် ကေုာံ စရာဲဍာ်ဒကေဝ်အလံၚ်အမာတ်ဂမၠိုၚ်ဂှ် မွဲတၚ်တုဲမွဲတၚ် ဗွဲ တြး ချူပတိုန်ထ္ၜးအာ ဗွဲလၟေၚ်လၟေၚ်ရောၚ်။
စရာဲဍာ်ဒကေဝ်အလံၚ်အမာတ် (၁၈) တၚ်
၁။ သ္ဒးဒှ်ကောန်ဗော်ရောၚ်။
၂။ ညးစၞးဒုၚ်ရုဲစှ်ဝွံ သ္ဒးဒှ်မၞိဟ်ဒ္ဂေတ်ဗက် သ္ဇိုၚ်သၞောဝ်ဥပဒေဒက်ပတန်ဍုၚ်ကီု၊ သၞောဝ်ဥပဒေပေဲါရုဲမာဲကီုရောၚ်။
၃။ ပရေၚ်လုပ်ပြိုၚ်ပေဲါရုဲမာဲဂှ် စိုတ်ဒးထတ်တုဲ ဇကုဇကု ဒးပ္တိုန်ဆန္ဒ သ္ဒးဒှ်ရောၚ်။
၄။ ဒ္ဂေတ်ပဋိပတ် ဒးခိုဟ်ရောၚ်။
၅။ ပရေၚ်လစွံစိုတ် ဒးခိုဟ်ရောၚ်။ (စိတ်ရၚ်းသဘောထား ကောၚ်းမွန်မှန်ကန်သူ ဖြစ်ရမည်)
၆။ ခန္ဓကာယကဵု စိုတ် ထတ်ယုက် ဒးခိုဟ်ရောၚ်။
၇။ ပရေၚ်ချူခၞံသၞောဝ်၊ ပရေၚ်ပတိုန်ဂလာန်၊ ပရေၚ်ဘဏ္ဍာ၊ ပရေၚ်ကိုန်စဳဇန်၊ ပါလုပ်ပ္ဍဲကမ္မယှေန်တံဂှ်တုဲ ဍာ်ဒ ကေဝ် ပွမချူဆာဲ ပတိုန်ထ္ၜး၊ ပရေၚ်အုပ်ဓုပ်ကောပ်ကာဲ ဗၞတ်ထေက်ကြိုက် ဒးနွံရောၚ်။
၈။ တၚ်ဇကုမိက်ဂွံပတိုန်ထ္ၜးဂှ် နကဵုပါၚ်ကီုဒှ်၊ နကဵုလိက်ကီုဒှ် ညံၚ်သ္ဂောံကိတ်ညဳကဵု ပရေၚ်ပရောဂှ် ဟီုဂးဒးပတိုန် ထ္ၜးမာန်ရောၚ်။
၉။ သ္ဒးဒှ်ပူဂဵု ညးဒေသတံဆန္ဒနွံပၟိက် သ္ဒးဒှ်ရောၚ်။
၁၀။ သ္ဒးဒှ်မၞိဟ်ဒုၚ်တဲ ဓမံက်ရုပ်ရဴ လတူဂၠံၚ်တရဴ မူဝါဒ သဘဴဓဝ်ဗော်ရောၚ်။
၁၁။ သွက်ပေဲါရုဲမာဲဂှ် အခိၚ်ကာလ၊ ပွမရုန်ဂစာန်ပတိတ်ဇြဟတ်၊ ညးဒးဒုၚ်ဖအိုတ်ခရိတ် ဗၞတ်ထေက်ကြိုက်မာန် သ္ဒးဒှ်ရောၚ်။
၁၂။ သ္ဒးဒှ်ညးတီကၠိုဟ် သဘဴဓဝ်ပရေၚ်ဍုၚ်ကွာန်ကောန်ဂကူတုဲ ပရေၚ်ဆဵုဂဗ ဗၞတ်ထေက်ကြိုက် သ္ဒးနွံရောၚ်။
၁၃။ ပရေၚ်ဂကူ၊ ပရေၚ်ဘာသာ ၜက်ၜေတ်တၞုၚ်တၞး ဟွံဂွံရောၚ်။
၁၄။ သ္ဒးဒှ်ညးတီကၠိုဟ် ကွတ်စက်ဂတာပ်ခေတ် (ကွတ်ပရိုၚ်) နကဵုဂုန်ဖဵုနွံနွံ သ္ဒးသုၚ်စောဲလေပ် ဗၞတ်ထေက်ကြိုက် ရောၚ်။
၁၅။ မၞိဟ်ဒုၚ်ရုဲစှ်ဂှ် သ္ဒးဒှ်မၞိဟ်ဒေသပွိုၚ်ဍုၚ်ဂှ်၊ ဟွံသေၚ်မ္ဂး သ္ဒးဒှ်ဌာန်တိုပ်သုက်ဂှ်ရောၚ်။
၁၆။ ပရေၚ်ရုန်ဂစာန် ပံၚ်တောဲ ပ္ဍဲဗော် သ္ဒးနွံရောၚ်။
၁၇။ ဇြဟတ်အုပ်ဓုပ်ကောပ်ကာဲကဵု ပရေၚ်အာက္ဍိုပ် သ္ဒးခိုဟ်ရောၚ်။
၁၈။ ပရေၚ်စန်ဒက် သ္ဒးခိုဟ်ရောၚ်။
ဣဝွံ စရာဲဍာ်ဒကေဝ် ပရေၚ်ရုဲစှ် ညးစၞးအလံၚ်အမာတ် နွံ (၁၈) တၚ်ရ။ ဆက်တုဲ ပတိုန်ထ္ၜးအာ တၚ်သ္ဒးဒ္ဂေတ် ဗက်ကဵု တၚ်ဒုၚ်ဂတိပါၚ် (၈) တၚ်ပၠန်ရောၚ်။
ညးစၞးအလံၚ်အမာတ်ဒုၚ်ရုဲစှ်တံ တၚ်သ္ဒးဒ္ဂေတ်ဗက်ကဵု တၚ်ဒုၚ်ဂတိပါၚ်
၁။ သ္ဒးဒ္ဂေတ်ဗက် မူဝါဒဗော်ကဵု လၟေၚ်ကမၠောန်ဗော်ရောၚ်။
၂။ ကာလသ္ဒးဒုၚ်ရုဲစှ် ခါန်ကၞက်တာလျိုၚ် ပ္ဍဲအလဵုအသဳကီု၊ ပ္ဍဲကၠတ်ထဝ်ကီုဂှ် သ္ဒးဒုၚ်ကေတ်သ္ဂုတ်သွာတ် နူဗော် ရောၚ်။
၃။ နူကဵုသြန်ပရေၚ်ဂွံဒုၚ်စသိုၚ်ဂှ် နကဵုဗော်ဗၞတ်ဗ္ၜတ်လဝ် လၟေၚ်ဂိတု သ္ဒးကဵုအာ ပရေၚ်ထံက်ပၚ်ဗော်ရောၚ်။ (ကၠတ်ထဝ်တွဵုရးမ္ဂး 10% ၊ ကၠတ်ထဝ်ကၟိန်ဍုၚ်မ္ဂး 15% ၊ ပ္ဍဲဂကောံအလဵုအသဳဂှ် (တွဵုရး၊ ကၟိန်ဍုၚ်) ကဵု ညးဇၞော်ကၠတ်ထဝ်ဂမၠိုၚ် (တွဵုရး၊ ကၟိန်ဍုၚ်) 25% ။
၄။ တၚ်ပတိုန်ထ္ၜးဂမၠိုၚ်ကီု၊ တၚ်သၟာန်ဂမၠိုၚ်ကီု ဆက်စပ်လၟေၚ်ကမၠောန်ဂမၠိုၚ်ဂှ် သ္ဒးရေၚ်တၠုၚ်ကေတ်အဆက်ကဵု ဗော်ရောၚ်။
၅။ ဇၟာပ်ကောံဓရီုကၠတ်ထဝ်တုဲဂှ် သ္ဒးဒုၚ်စဳရေၚ်ကဵုဗော်ရောၚ်။
၆။ ပရေၚ်ဍုၚ်ကွာန်၊ ပရေၚ်ကောန်ဂကူ ဆေၚ်စပ်ကဵုပရေၚ်ပတိုန်ဂလာန်သဳကၠဳ ကိစ္စနာနာသာ်ဂှ် သ္ဒးကေတ် အခေါၚ်နူဗော်ရောၚ်။
၇။ ဆေၚ်စပ်ကဵုပရေၚ်ဖေါအ်ဗြေဝ်ဒေသဂှ် သ္ဒးကေတ်တၚ်တုပ်စိုတ် နူဒေသတုဲမှ ပတိုန်ထ္ၜးရောၚ်။
၈။ ပွိုၚ်ဍုၚ်ညးစၞးကၠတ်ထဝ်ဟွံမွဲတံဂှ် တၚ်သဳကၠဳပတိုန်ထ္ၜးနွံကၠုၚ်မ္ဂး သ္ဒးကေတ်တၚ်တုပ်စိုတ်၊ ဒးပတိုန်ထ္ၜးကဵု ဗဟဵုရောၚ် သာ်ဝွံ ချူဓဇက်လဝ်ရ။
ပရေၚ်ရုဲစှ် ညးစၞးအလံၚ်အမာတ်ဂှ် တၚ်သ္ဒးဒုၚ်သ္ဇိုၚ်မူဝါဒ ပ္ဍဲအရာရုဲစှ် ညးစၞးအလံၚ်အမာတ်ဂှ် ချူပတိုန်ထ္ၜးလဝ် သာ်ဝွံရ။
၁။ ညးစၞးလုပ်ပြိုၚ်ပေဲါရုဲမာဲ နူဗော်ဝွံ ဒးအံၚ်ဇၞး သ္ဒးဒှ်ရောၚ်။
၂။ ညးစၞးဍာံဇေတ်ဂမၠိုၚ် သ္ဒးကဵုလုပ်ပြိုၚ်ရောၚ်။
၃။ ပ္ဍဲကၠတ်ထဝ်ဗၠိုၚ်နာနာဂှ်ကီု၊ ပ္ဍဲစက်ယန်အလဵုအသဳဂှ်ကီု ရေၚ်တၠုၚ်သ္ဒးခိုဟ်ရောၚ်။
၄။ ဗဗွဲဓဝ်ဍာံနွံတုဲ ပရေၚ်ကၠးဖ္ဍးကီု၊ ပရေၚ်ဗက်အဂတိဟွံမွဲကီု သ္ဒးဒှ်ရောၚ်။
၅။ သွက်ဍုၚ်ကီု၊ သွက်ဒေသဇကုကီု၊ သွက်ဂကူဇကုကီု ဒးလွဳၜံၚ်ပ္တိတ်ကဵု ညးတၠသ္ကေက်သ္ကာဂမၠိုၚ်မာန်ကီု။
သၞောတ်ပရေၚ်ရုဲစှ်
၁။ ဂကောံရုဲစှ် ညးစၞးအလံၚ်အမာတ်ဝွံ နူကဵုကမ္မတဳကေၚ်ကာဗဟဵု ရုဲစှ်တုဲ သ္ဒးကေတ်တၚ်သ္ဂုတ်သွာတ် နူကမ္မတဳ ဗဟဵုရောၚ်။
၂။ စေဝ်ပၞောန်ဂကောံကီု အခေါၚ်ကၠောန်ဂမၠိုၚ်ဂှ် နူကဵုကမ္မတဳကေၚ်ကာဗဟဵုတံ သ္ဒးစၟတ်သမ္တီသ္ပကဵုဒတန်ရောၚ်။
၃။ တၞးလိက်သွက်ဂွံဗပေၚ် ညးစၞးအလံၚ်အမာတ်ဂှ် အာတ်ကေတ်တုဲ သ္ဇိုၚ်သၞောဝ်ကီု၊ တၚ်စရာဲဍာ်ဒကေဝ် ညးစၞး အလံၚ်အမာတ် နူကဵုကမ္မယှေန်စၟတ်သမ္တီလဝ်ဂှ်ကီု ဟွံကိတ်ညဳ၊ ကိတ်ညဳ ဗွဲပဏာမ ဒးစၟဳစၟတ်ရောၚ်။
၄။ ပ္ဍဲအရာရုဲစှ် ညးစၞးအလံၚ်အမာတ်ဂမၠိုၚ်ဝွံ လၟိဟ်ညးစၞးအလံၚ်အမာတ်ဆက်စပ်ဂှ် နူကဵုပွိုၚ်ဍုၚ်တံ ဂၠိုၚ်အိုတ် (၃) ဆ ရုဲစှ်ပတိုန်ထ္ၜး (ဂကောံရုဲစှ်ဗဟဵု) မာန်ရောၚ်။
၅။ နူကဵုဂကောံရုဲစှ်ပွိုၚ်ဍုၚ်တံ ရုဲစှ်ပတိုန်လဝ်ဂမၠိုၚ်ဂှ် ဂကောံဗဟဵုတံ ရုဲစှ်သ္ပအာဒတန်ရောၚ်။
၆။ ပရေၚ်နကဵုဂကောံတုဲ ကေတ်သ္ပမာန် ညံၚ်ဟွံဂွံမံက်ဂှ် ဒးစွံသတိရောၚ်။
၇။ ပရေၚ်ရုဲစှ်ဂမၠိုၚ်ဂှ် ဗွဲကြပ်အိုတ် ကမ္မတဳကေၚ်ကာတံ သ္ပဒတန်တုဲမှ ဒှ်ဒတန်ရောၚ်။
၈။ ညးစၞးအလံၚ်အမာတ်ဒုၚ်ရုဲဂမၠိုၚ်ဂှ် ကၠတ်ထဝ်ဗၠိုၚ်လဵု ဇကုမိက်ဂွံလုပ်ဒုၚ်ရုဲဂှ် မ္ဒးပတိုန်လဝ်စရၚ်ဒတုဲရောၚ်။
၉။ ညးစၞးအလံၚ်အမာတ်နူကဵုပွိုၚ်ဍုၚ်တံ ပတိုန်ရုဲစှ်လဝ်ဂမၠိုၚ်ဂှ် နကဵုဗွဲလၟေၚ်ဗွိုၚ်ကၠတ်ထဝ်ဂှ် မ္ဒးရုဲစှ်အာရောၚ်။
၁၀။ ဂကောံရုဲစှ်ပွိုၚ်ဍုၚ်ဝွံ ဗွဲမကိတ်ညဳကဵုစေဝ်ပၞောန်ဂှ် ဂကောံရုဲစှ်ဗဟဵုတံ ဒးဒက်ပတန်ရောၚ်။
၁၁။ နူကဵုပူဂဵုညးဒေသဂှ် ညးလုပ်ဒုၚ်ရုဲဟွံမွဲ ဒှ်ကၠုၚ်မ္ဂး ဂကောံပွိုၚ်ဍုၚ်ကဵု ဂကောံဗဟဵု ပညဳပညပ်တုဲ ရုဲစှ်သ္ပအာ ဒတန်ရောၚ်။
လၟေၚ်ကမၠောန် ဂကောံရုဲစှ်အလံၚ်အမာတ်ပွိုၚ်ဍုၚ်
၁။ အလံၚ်အမာတ်တံဝွံ ဒးဍာ်ပေၚ်ကဵု တၚ်နၚ်ဍာ်ဒကေဝ် မူအလံၚ်အမာတ်ရောၚ်။
၂။ အလံၚ်အမာတ်တံဝွံ ညးဒ္ဂေတ်ဗက်သၞောဝ်အမာတ်မာန် ဒးဒှ်ရောၚ်။
၃။ ညးဒုၚ်ရုဲအလံၚ်အမာတ်တံဂှ် ဒးဂရၚ်ပ္တီနကဵု (form) ရောၚ်။ (form) မွဲစုမ်မ္ဂး ဒးရာန်မွဲကိုတ်ဒကေဝ်ရောၚ်။ ဂွံဒုၚ်ရုဲကီုဂှ် ဟွံဂွံဒုၚ်ရုဲကီုဂှ် သြန်ဝွံ သ္ပသြန်ဂအုံပွိုၚ်ဍုၚ်ရောၚ်။
၄။ ကမ္မတဳကေၚ်ကာဗဟဵု ကေုာံ ကမ္မတဳဗဟဵုတံဂှ် ပါလုပ်ပ္ဍဲဂကောံရုဲစှ်ဟွံဂွံ၊ ဆဂး ပါလုပ်မံၚ် ပ္ဍဲကမ္မတဳကေၚ်ကာ ပွိုၚ်ဍုၚ်မ္ဂး ပါလုပ်ဂွံ။
၅။ ဂကောံရုဲစှ်ပွိုၚ်ဍုၚ်ဂှ်ဝွံ ကမ္မတဳကေၚ်ကာပွိုၚ်ဍုၚ်တံ ဒးပါလုပ်သီုဖအိုတ်ရောၚ်၊ ဂကောံကမ္မတဳကွာန်/အရာပ် ဟွံပါလုပ်ပ္ဍဲကမ္မတဳကေၚ်ကာပွိုၚ်ဍုၚ်ဂှ် မွဲတၠ ဒးပါလုပ် ပ္ဍဲကမ္မတဳရုဲစှ်ပွိုၚ်ဍုၚ်ဂှ်ရောၚ်။
၆။ ပရေၚ်ပေဲါရုဲစှ်ဂှ် ဒးသ္ပလဝ်စၟတ်သမ္တီ ချိုတ်ချိုတ်ပၠိုတ်ပၠိုတ်ရောၚ်။
၇။ ညးဒုၚ်ရုဲစှ် အလံၚ်အမာတ်တံဂှ် ပါလုပ် ပ္ဍဲဂကောံရုဲစှ်ပွိုၚ်ဍုၚ်ဟွံဂွံ။
၈။ (၂၀၂၀) ဂိတုဂျူလာၚ် (၁၅) စွံလက္ကရဴအိုတ်တုဲ နူဂကောံရုဲစှ်ပွိုၚ်ဍုၚ်ရုဲစှ် သ္ပလဝ်ဒတန် အလံၚ်အမာတ်ဂမၠိုၚ်ဂှ် ဒးပလံၚ်ဗစိုပ်ကဵု ဂကောံရုဲစှ်ဗဟဵုရောၚ်။
၉။ တၞးလိက်ဂရၚ်ပ္တီဝွံ မူတံ ကေုာံ တၞးဆာဲ အပံၚ် (၂) စုမ် ဒးပတိုန်ရောၚ်။
လၟေၚ်ကမၠောန် ဂကောံရုဲစှ်အလံၚ်အမာတ် (ဗဟဵု)
၁။ မူ၊ သၞောတ် လၟေၚ်ကမၠောန်ရုဲစှ်ဂှ် ဒးသောၚ်ကလးကဵု ပွိုၚ်ဍုၚ်ရောၚ်။
၂။ ပ္ဍဲရုဲစှ်ပွိုၚ်ဍုၚ်ဂှ် အတိုၚ်မူဗဟဵုဖျေံလဝ် သ္ဂောံရုဲစှ်အာမာန် ဂကောံရုဲစှ်ဗဟဵု ဒးပၠတရဴရောၚ်။
၃။ ကာလရုဲစှ်ဒှ်အခက်ခုဲမ္ဂး ဒးကဵုသ္ဂုတ်သွာတ် နကဵုမာဲပၞုက်တုဲ အလံၚ်အမာတ်ဂွံမာဲဂၠိုၚ်အိုတ်ဂှ် ဒှ်ဒတန်ရောၚ်။
၄။ အလံၚ်အမာတ်ပါလုပ် ပ္ဍဲဂကောံရုဲစှ် (ဗဟဵု) တံဂှ် ကာလရုဲစှ် ပွိုၚ်ဍုၚ်ဆေၚ်စပ်ကဵုဇကုမ္ဂး ပါလုပ်ဟွံဂွံ။
၅။ နကဵုဗဟဵု လလံသ္ဂောံလလောၚ်စရၚ်အလံၚ်အမာတ်ဂှ် မ္ဒးစွံလဝ်ကာပၞုက်ရောၚ်။
၆။ သၞာံ (၂၀၂၀)၊ ဂိတုဂျူလာၚ် (၃၀) စွံလက္ကရဴအိုတ်တုဲ သ္ဒးရုဲစှ် သ္ပအာဒတန်ရောၚ်။
ဂကောံရုဲစှ် ညးစၞးအလံၚ်အမာတ်ဗဟဵုဂှ် နာဲတၠနန် (နာဲတေန်အံၚ်) ဥက္ကဌ၊ နာဲလှအံၚ် (ဒုဥက္ကဌ)၊ နာဲဇၞူမန် (ဒုဥက္က ဌ)၊ နာဲဆာန်တိ (ဒုဥက္ကဌ)၊ နာဲလျးတၟး (ဖက်ဆောညးအုပ်ကာ)၊ နာဲသာန်တေန် (ဖက်ဆောညးအုပ်ကာ)၊ နာဲ သဵုမျေအ် (ဖက်ဆောညးအုပ်ကာ)၊ နာဲတာန်ယှိုဲ (ဖက်ဆောညးအုပ်ကာ)၊ အ္စာသဝ်နာဲဟံၚ်ဍုၚ် (ဖက်ဆောညး အုပ်ကာ)၊ နာဲလွဳအံၚ် (ကေၚ်ကာဗဟဵု)၊ နာဲထောန်ဖေ (ကေၚ်ကာဗဟဵု)၊ နာဲအံၚ်မန် (ကေၚ်ကာဗဟဵု)၊ မိထဝ် ဉာဏ် (ကေၚ်ကာဗဟဵု)၊ နာဲကျာန်ယျေတ် (ကေၚ်ကာဗဟဵု)၊ နာဲဗညာသာန် (ကေၚ်ကာဗဟဵု)၊ နာဲပါန်အံၚ် (ကေၚ်ကာဗဟဵု) ဖအိုတ် (၁၆) တၠရ။
ဂကောံရုဲစှ် ညးစၞးအလံၚ်အမာတ် ပွိုၚ်ဍုၚ်ဂှ် ဒုၚ်သ္ဇိုၚ်ကဵု ကမ္မတဳကေၚ်ကာ ပွိုၚ်ဍုၚ်ဂမၠိုၚ် ဒက်ပတန်လဝ် (၇၄) တၠ၊ ကွာန်ကမ္မတဳကေၚ်ကာ ဟွံလုပ်ပါလဝ်မ္ဂး မွဲကွာန်မွဲတၠ သွက်ဂွံထပ်စုတ်အာတုဲ ပွိုၚ်ဍုၚ်မွဲကဵုမွဲဂှ် လၟိဟ်တၞဟ်ခြာ နွံရ။
ကာလကၠောန်ပေဲါရုဲစှ် ညးစၞးအလံၚ်အမာတ် ပ္ဍဲပွိုၚ်ဍုၚ်ဂမၠိုၚ်ဂှ် နူဂကောံရုဲစှ် အလံၚ်အမာတ် (ဗဟဵု) တံ ကၠုၚ်စိုပ် မၚ်ရံၚ်အာရ။ နူကဵုဂကောံရုဲစှ် အလံၚ်အမာတ် (ဗဟဵု) ဂှ် အခေါၚ်သဳကၠဳဖန်ဖက် လတူပွိုၚ်ဍုၚ် ဟွံဂွံရောၚ်ဂှ် ညး တာလျိုၚ်ဗဟဵုတံ သောၚ်ကလးလဝ်ကဵု ဂကောံကမ္မတဳကေၚ်ကာပွိုၚ်ဍုၚ်တံရ။
နူလၟုဟ်မ္ဂး ဂကောံရုဲစှ် အလံၚ်အမာတ် (ဗဟဵု) တံ ပတိတ်ကဵုဒၟံၚ် တၞးလိက်သွက်ဂွံဗပေၚ်ရုဲစှ် ညးစၞးအလံၚ်အမာတ် ပ္ဍဲပွိုၚ်ဍုၚ်တံရ။ ညးစၞးအလံၚ်အမာတ် မွဲမွဲဗၠိုၚ်မ္ဂး ဥပမာ- ပ္ဍဲကဵုညးစၞးလုပ်ဒုၚ်ရုဲ ဗၠိုၚ်ကၠတ်ထဝ်တွဵုရးဂှ် ဂၠိုၚ်အိုတ် (၃) တၠ နူကဵုဂကောံပွိုၚ်ဍုၚ်ဂှ် ရုဲစှ်တုဲ ပတိုန်ဏာ ဂကောံရုဲစှ် (ဗဟဵု) ရ။ နူဂှ်မွဲအဆံၚ် ဂကောံရုဲစှ် (ဗဟဵု) တံ စၟဳစၟတ် သ္ၚဳဂၠိပ် သ္ပဒတန် (၁) တၠရ။
နူကဵုဂကောံရုဲစှ် အလံၚ်အမာတ်ပွိုၚ်ဍုၚ်ဂမၠိုၚ်ဂှ် ဂျောန် (၃၀) ပွိုၚ်ဍုၚ်ညးကုညး ညးစၞးလုပ်ဒုၚ်ရုဲတံ ညံၚ်ဂွံပလံၚ် စရၚ် ကုရုၚ်ပွိုၚ်ဍုၚ်ညးကုညးတုဲ ဂျူလာၚ် (၁၅) မ္ဂး စရၚ်ညးစၞးလုပ်ဒုၚ်ရုဲဂမၠိုၚ်တံဂှ် နူကဵုဂကောံရုဲစှ်ပွိုၚ်ဍုၚ်တံ ဒး ပလံၚ်ကဵု ဂကောံရုဲစှ်အလံၚ်အမာတ် (ဗဟဵု) ရ။ နူဂှ်မွဲအဆံၚ် ဂျူလာၚ် (၃၀) ဂှ်မ္ဂး နူဂကောံရုဲစှ်အလံၚ်အမာတ် (ဗဟဵု) တံ မ္ဒးရုဲစှ်သ္ပအာဒတန် စရၚ်အလံၚ်အမာတ်ဂမၠိုၚ်ရောၚ်။
