လွဳဝၚ် – လၟုဟ် ဒပ်ပၞာန်အလဵုအသဳဗၟာ ဃောထပက်မံၚ်ပၞာန်ကဵု ဒပ်ပၞာန်သေံ (သၟဝ်ကျာ) ဏံဂှ် သာ်လဵု ဂွံကဵုအရီုအဗၚ်မာန် ဗော်ဍုၚ်မန်တၟိ ဃောဂၠာဲမံၚ်နဲကဲဖိုဟ်ရောၚ် ကေၚ်ကာဗဟဵု ဟွံမိက်ဓမံက်ယၟုမွဲတၠ ဟီုရ။
“ပိုဲ ချပ်ဗ္စာမံၚ်ဖိုဟ် ဗီုလဵုဂွံကဵု အရီုအဗၚ်ကဵုညးတံဂှ်။ ၜိုန်ရပိုဲ ဟွံဒးဒုၚ်ဗတိုက်ဏီကၠာလေဝ် ပိုဲတံ ဒးဂိသကေဝ် တုပ်မံၚ်ကဵု ဒပ်ပၞာန်သေံဇၞော် သၟဝ်ကျာတံကီု။ ပိုဲကဵုညးတံ တ္ၚဲဏံ ဘဝတုပ်မံၚ် ညးသကအ်ဏောၚ်၊ တၚ်ရန်တၟအ်လေဝ် တုပ်၊ ကံကုသဵုလေဝ် တုပ်မံၚ် ညးသကအ်ဏောၚ်” သာ်ဝွံ ကေၚ်ကာဗဟဵုဂှ် ဟီုရ။
ဒပ်ပၞာန်သေံဇၞော် သၟဝ်ကျာဝွံ ပ္ဍဲသၞာံ ၁၉၈၉ ဂိတုသေပ်တေမ်ပါဂှ် ဒေံါကၠုၚ်ပန်ပှော်ကဵု အလဵုအသဳပၞာန်ဗၟာတုဲ ပ္ဍဲသၞာံတုဲကၠုၚ်ဏံဂှ် ဒေံါပန်ပှော်လီုကၠုၚ် ညံၚ်ရဴဗော်ဍုၚ်မန်တၟိကီုရ။ လၟုဟ် ပ္ဍဲဒပ်ပၞာန်ပံၚ်ကောံ ကောန်ဍုၚ်အရၚ်ဂှ်လေဝ် ပါလုပ်မံၚ်မွဲဂကောံကီုရ။
“ယဝ်ရ ဒပ်ပၞာန်ရပ်လွဟ် ကောန်ဍုၚ်အရၚ်မွဲမွဲ လီုအာတှေ် ဇီုကပိုက်ကၠုၚ်ကဵုပိုဲ ဇၞော်ကဵုဇြဟတ်ဏောၚ်။ ဟိုတ်ဂှ်ရ ပရေၚ်ရီုဗၚ် မွဲဂကောံကဵု မွဲဂကောံဂှ် ပၟိက်ဇၞော်မံၚ်ဏောၚ်” သာ်ဝွံ ကေၚ်ကာဗဟဵု ဗော်ဍုၚ်မန်တၟိ ဆက်ဟီုရ။
လောန်ကၠုၚ် ၜါသတ္တဟတေံဂှ် ဒပ်ပၞာန်အလဵုအသဳတံ စထပက်ပၞာန်ကဵု ဒပ်ပၞာန်သေံဇၞော် ဒိုဟ်သၟဝ်ကျာတံရ။